LEZION 5
Cie se tol pa Die dant per la tiera?
1. Ciuldì ova pa Die crià la tiera?
Iehova ova dat la tiera ala persones sciche si ncësa. La prima doi persones, Adàm y Dieva, ne fova nia unides criedes per viver tl ciel. Die ova bele crià i angiuli per sté tl ciel (Giobe 38:4, 7). Iehova ova dat ala prima persona n paravis da stramp bel, tlamà verzon Eden (Genesis 2:15-17). Tlo ëssela pudù viver per for cun si descendënc. (Lijëde Salm 37:29; 115:16.)
Tl scumenciamënt fova mé l verzon Eden n paravis. Adàm y Dieva dassova mplenì la tiera cun si descendënc y la fé deventé duta n paravis (Genesis 1:28). La tiera ne n’unirà mei desdruda. La sarà per for nosc ncësa. (Lijëde Salm 104:5.)
Cialëde l video Ciuldì à pa Die crià la tiera?
2. Ciuldì ne n’ie pa la tiera śën nia n paravis?
Adàm y Dieva ne n’ova nia ulgà a Iehova y perchël fovi unii ciacei demez dal Eden. L paravis fova jit perdù y deguna persona ne n’à mei pudù l fé da nuef. Da ntlëuta incà iel sun la tiera truepa jënt ria. (Lijëde Genesis 3:23, 24.)
À pa Iehova renunzià a chël che ël se ova tëut dant per la tiera y la persones? No, nianca per idea! Die ie uniputënt y tën ite chël che ël à mpermetù (Isaia 45:18, NM). La persones puderà n di inò viver sciche ël ulova dal scumenciamënt. (Lijëde Salm 37:29, 34.)
3. Co deventerà pa la tiera inò n paravis?
La tiera deventerà inò n paravis ntan l guviern de Gejù sciche Rë dl Rëni de Die. Gejù adum cun si angiuli desdrujerà duc chëi che se mët contra Die tres na viera, tlameda Harmaghedónn. Pona unirà Satan śarà ite da Gejù per 1.000 ani. L popul de Die sëuravivrà ala desdruda ajache sarà Gejù a l avisé y a cialé lessù. Daldò vivral finalmënter per for tl Paravis sun la tiera. (Lijëde Revelazion 20:1-3; 21:3, 4.)
4. Can finerà pa la suferënzes?
Can meterà pa Die na fin al mel sun la tiera? Gejù ova dat n “sëni” per ndiché canche la fin fossa stata daujin. Chël che suzed al didancuei tl mond, po’ manacé la sëuravivënza dl’umanità y desmostra che vivon tl tëmp dla “fin dl mond”, la fin dl sistem atuel. (Lijëde Mateo 24:3, 7-14, 21, 22.)
Ntan i 1.000 ani che Gejù renierà dal ciel sun la tiera, meteral fin a duta la suferënzes (Isaia 9:5, 6 [9:6, 7, NM]; 11:9). Ël ne n’ie nia mé n Rë, ma nce n Granpreve y ël anulerà duc i picëi dla persones che à amor per Die. Nsci, tres Gejù, tulerà Die demez la malaties, la veciaia y la mort. (Lijëde Isaia 25:8; 35:5, 6.)
5. Chi puderà pa viver tl Paravis?
Tla Sala dl Rëni puderëis sté adum cun persones che à amor per Die y che uel mparé co ti plajëi
Tl Paravis vivrà chëi che olga a Die (1 Giuani 2:17). Gejù ova mandà si discepuli a crì i omli y a ti nsenië co avëi l’apruvazion de Die. Iehova njënia ca bele ncueicundì milions de persones per viver per for sun na tiera da paravis (Sofonia 2:3). Tla Sales dl Rëni di Testemonesc de Iehova mperen a deventé n miëur uem y pere, y na miëura fëna y oma. Mutons y genitores adora Die adum y mpera coche la cunescënza dla Bibia po’ miuré si vita. (Lijëde Revelazion 15:4.)
