LEZION 8
Ciuldì lascia pa Die pro l mel y la suferënzes?
1. Co ova pa scumencià l mel?
Die à lascià pro giut assé i guvierns dl mond per desmustré che la persones ne n’ie nia al’autëza de ressolver i problems dl’umanità
Dut ova scumencià canche Satan ova dit la prima baujia. Tl prim fovel n bon angiul ma l “ne n’ie nia stat tl’aurità” (Giuani 8:44). Ël ova scumencià a dejideré l’adurazion che spieta mé a Die. Satan ova mentì ala prima ëila, Dieva, y l’ova ciaculeda su de ulghé a d’ël mpede a Die. Adàm ti fova jit do ne ulgan nia a Die. Chësta dezijion ova purtà suferënzes y la mort. (Lijëde Genesis 3:1-6, 19.)
Purtan Dieva a ne n’ulghé nia a Die, ova Satan tizà su na rebelion contra la sovranità dl Autiscim, si dërt de guverné. La majera pert dl’umanità se à metù adum a Satan ne azetan nia Die sciche Sovran. A chësta maniera ie Satan deventà “l reniant de chësc mond”. (Lijëde Giuani 14:30; 1 Giuani 5:19.)
2. Fova pa la criazion de Die da defet?
Dut chël che Die fej ie perfet. Sibe la persones che i angiuli, che ël ova crià, fova tla cundizion de tenì ite si cumandamënc (Deuteronome 32:4, 5, NM). Davia che Die nes à dat la lidëza de ulentà, pudons crì ora sce fé l bën o l mel desmustran nsci nosc amor per Die. (Lijëde Iacun 1:13-15; 1 Giuani 5:3.)
3. Ciuldì à pa Die lascià pro la suferënzes nchina śën?
Per n tëmp limità lascia Iehova pro la rebelion contra si sovranità. Ciuldì pa? Per desmustré che l ne porta nia de bon canche la persones uel se guverné zënza tenì cont de Die (Qohélet [Ecclesiastes] 7:29; 8:9, NM; Geremia 10:23, NM). I 6.000 ani de storia dl’umanità desmostra che degun guviern ie stat bon de tò demez vieres, melfac, ngiustizies y malaties. (Lijëde Romans 9:17.)
Al incontra, nes porta l guviern de Die mé de bon resultac (Isaia 48:17, 18, NM). Iehova tulerà tosc demez duc i guvierns dla persones. Sun la tiera vivrà pona mé plu persones che se sotmët ala sovranità de Die (Isaia 11:9). (Lijëde Daniel 2:44.)
Cialëde l video Ciuldì lascia pa Die pro la suferënzes?
4. Ciuna puscibltà nes dà pa la pazienza de Die?
Satan se ova tëut a dì che la persones adora Die mé per n fin egoistich. Ulessais’a desmustré che l ne n’ie nia vëira? Chësc ie puscibl! La pazienza de Die nes dà la puscibltà de desmustré sce ulon plu gën vester guvernei da Die o dala persones (Proverbs 27:11, NM). Nosta maniera de viver desmostra nosta dezijion. (Lijëde Giobe 1:8-12; Salm 73:28.)
5. Co pudons’a desmustré che ulon se lascé guverné da Die?
Nosta dezijions dà da ntënder sce recunescion Die sciche nosc Reniant
Pudon fé chësc sce mparon tres la Parola de Die, la Bibia, coche ël uel vester adurà y fajan aldò (Giuani 4:23). Ne tulan nia pert ala politica y ala vieres, coche Gejù ova fat, desmustrons de refudé Satan sciche reniant. (Lijëde Giuani 17:14.)
Satan adrova si forza per nes purté al’imoralità y a uni azion che po’ danejé. Sce refudon chësc cumpurtamënt, pudëssa vel’ parënt o cumpani nes cuiné o nes mëter ala strëntes (1 Piere 4:3, 4). Perchël messons tò na dezijion. Chirerons’a la cumpania de persones che ama Die? Se lascerons’a avisé dai cumandamënc savesc de Die? Sce l fajeron, desmustrerons che Satan mentiva dijan che deguni ëssa ulgà a Die sota druch. (Lijëde 1 Corìntesc 6:9, 10; 15:33.)
L amor de Die per l’umanità, ie na garanzia che l mel y la suferënzes arà na fin. Chëi che desmostra cun si opres de crëier te chësta mpermetuda, vivrà per for sun la tiera. (Lijëde Giuani 3:16.)
