LEZION 9
Co possen pa avëi na familia cuntënta?
1. Ciuldì iel pa mpurtant vester maridei per avëi na familia cuntënta?
Iehova Die, che nes dà chësta bona nutizia, uel che la families sibe cuntëntes (1 Timótee 1:11). Ël à costituì l matrimone. Per l bën dla familia iel mpurtant che ël y ëila sibe maridei, acioche i mutons possa crëscer scunei y segures. I cristians muessa respeté la leges dl luech n cont dl matrimone. (Lijëde Luca 2:1, 4, 5.)
Die uel che l matrimone sibe n liam danter n ël y n’ëila che dura per for. Ël uel che uem y fëna sibe fediei un cun l auter (Ebrei 13:4). Ël odia l devorz (Malachia 2:16, NM). Purempò lascia Iehova pro al maridà cristian che ne n’à nia fat picià de adultere, de devurzië y de se maridé inò. (Lijëde Mateo 19:3-6, 9.)
2. Co dassëssa pa uem y fëna se cumpurté danter ëi?
Iehova ova crià l ël y l’ëila a na maniera che i pudova vester n aiut cumplementer l un per l auter (Genesis 2:18). L uem à la respunsabltà de cialé sun la familia, de la mantenì y de la avisé tenian cont dla Parola de Die. Ël dassëssa mustré amor altruistich ala fëna. Uem y fëna dassëssa se avëi gën y se respeté. Davia che tramedoi ne n’ie nia perfec, muessi mparé a perduné per vester cuntënc tl matrimone. (Lijëde Eféjies 4:31, 32; 5:22-25, 33; 1 Piere 3:7.)
3. Dassëssen pa se lascé sce n ie melcuntënc tl matrimone?
Sce uem y fëna à problems danter ëi, messëssi fé l puscibl per se traté cun amor (1 Corìntesc 13:4, 5). Aldò dla Parola de Die ne n’ie l se spartì nia la soluzion di problems che vën suvënz dant tl matrimone. (Lijëde 1 Corìntesc 7:10-13.)
4. Cie uel pa Die per i mutons?
Iehova uel che i mutons possa crëscer cuntënc y perchël àl lascià scrì tla Bibia de bon cunsëies per viver na bela junëza. Ël uel che ëi possa se nuzé dl’esperienza di genitores (Colossésc 3:20). Iehova, nosc Criator, uel nce che i possa purvé la gran sudesfazion che n à fajan si ulentà y chëla de si Fi. (Lijëde Qohélet [Ecclesiastes] 12:1; Mateo 19:13-15; 21:15, 16.)
5. Cie adrova pa i mutons per vester cuntënc?
I genitores muessa se cruzië de fé avëi ai mutons da maië, l furnì y na cësa (1 Timótee 5:8). Ora de chësc, per vester cuntënc, à i mutons de bujën de mparé a cunëscer miec Die y si cumandamënc (Eféjies 6:4). L cuer di mutons vën tucà tl plu sot sce i vëija che i genitores à amor per Die. I nseniamënc di genitores, tëuc ora dala Bibia, po’ nfluenzé positivamënter la maniera de pensé di mutons. (Lijëde Deuteronome 6:4-7; 2 Timótee 3:15.)
Ai mutons ti fejel bon a vester ncurajei y laudei, ma ëi à nce de bujën de regules y de bona crianza. Nsci vëni stravardei da cumpurtamënc che pudëssa i danejé (Proverbs 22:15, NM). Chësc ne n’uel nia dì che n dëssa vester grovesc o riei limpea. (Lijëde Colossésc 3:21.)
I Testemonesc de Iehova publichea libri scric propi per judé genitores y mutons. I cunsëies ie tëuc ora dala Bibia. (Lijëde Salm 19:8, 12 [19:7, 11, NM].)
