LEZION 12
Co pudons’a ti ruvé daujin a Die?
1. Scota pa Die su duta la prieres?
Die nvieia persones de uni sort a ti ruvé daujin tres la priera (Salm 65:3 [65:2, NM]). Ma ël ne scota nia su, plu avisa ne azetea nia, duta la prieres. Per ejëmpl, canche i israelic se ustinova a se cumpurté mel, se refudova Die de i scuté su. Chësc suzed nce canche n uem trata zënza respet si fëna (1 Piere 3:7). Purempò, Die scota su la prieres de chëi che à fat picëi grieves sce i se pënt. La priera ie propi n gran privilegh. (Lijëde Michéa 3:4; Isaia 55:7.)
Cialëde l video Scota pa Die su duta la prieres?
2. Co dassessans’a prië?
La priera fej pert dl’adurazion a nosc Criator, Iehova, y perchël dassessans prië mé ‘a d’ël sëul’ (Mateo 4:10; 6:9). Davia che ne son nia perfec, dassessans prië tl inuem de Gejù, che ie mort per nosc picëi (Giuani 14:6). Iehova ne uel nia che dijon su prieres scrites o mparedes adamënz; ël uel che nosta prieres vënie dal cuer. (Lijëde Mateo 6:7; Filìpesc 4:6, 7.)
Nosc Criator po’ scuté su nce prieres dites achiet (1 Samuel 1:12, 13). Ël nes nvieia a prië te uni ucajion, per ejëmpl canche scumëncia y canche fina via l di, dan maië o canche on problems. (Lijëde Salm 55:23 [55:22, NM]; Mateo 15:36.)
3. Ciuldì ie pa la reunions cristianes tan de mpurtanza?
L ne n’ie nia saurì ruvé daujin a Die ajache vivon danter truepa persones che ne crëia nia a Die y cuiona si mpermetuda de purté la pesc sun la tiera (2 Timótee 3:1, 4; 2 Piere 3:3, 13). Perchël ons de bujën de sté adum cun d’autri cristians per se ncurajé un cun l auter. (Lijëde Ebrei 10:24, 25.)
Sté deberieda cun persones che ama Die nes juda a ti ruvé plu daujin. La reunions di Testemonesc de Iehova ie ucajions per se renfurzé tres la fede di autri. (Lijëde Romans 1:11, 12.)
4. Co pudons’a ti ruvé daujin a Die?
Pudon ti ruvé daujin a Die pensan do sun chël che on mparà da si Parola, sun chël che ël à fat per nëus, sun si cunsëies y si mpermetudes. La priera y la meditazion nes juda a vester plu recunescënc per l amor y la sapienza de Die. (Lijëde 1 Timótee 4:15, 16; Salm 1:1-3.)
Mé chëi che à fede y fidanza te Die po’ ti ruvé daujin. Ma la fede ie sciche na planta che à tresora de bujën de ega. Nosta fede crësc sce ejaminon suvënz sun cie che la se stiza. (Lijëde Mateo 4:4; Ebrei 11:1, 6.)
5. Ce benefize ons’a a ti ruvé daujin a Die?
Iehova se cruzia de chëi che ël à gën. Ël po’ i stravardé da dut chël che pudëssa mëter n pericul si fede y si speranza tla vita eterna (Salm 91:1, 2, 7-10). Ël nes mët n verdia da cumpurtamënc che manacia nosta sanità y nosta cuntentëza. Iehova nes nsënia la miëura maniera de viver. (Lijëde Salm 73:27, 28; Iacun 4:4, 8.)
L pudëssa Ve nteressé nce...
BESONDERE AKTION
Percie studië la Bibia?
Milions de persones sëura dut l mond ie tl lëur de abiné tla Bibia la resposta ala dumandes mpurtantes dla vita. Ulessais’a nce Vo abiné chësta respostes?
