LEZION 13
Ciun sarà pa l daunì dla religions?
1. Azetea pa Die duta la religions?
Te duta la religions iel persones omles y senzieres. La bona nutizia ie che Die les vëija y che les ti sta a cuer. Ma n muessa dé pro che la religion ie suvënz unida adurveda per i fauc fins (2 Corìntesc 4:3, 4; 11:13-15). Aldò di media ie la religions trates ite te terorism, genozisc, vieres y meltratamënc sun mëndri. Per la persones senzieres ie chësc n drë scandul! (Lijëde Mateo 24:3-5, 11, 12.)
La drëta religion dà unëur a Die, la fauza religion al incontra, l dejunerea tres fauc nseniamënc che ne n’ie nia da abiné tla Bibia. Pra chisc iel baujies n cont de Die y sun la cundizion di morc. Mpo uel Die che la persones possa cunëscer l’aurità sun si cont (Ezéchiel 18:4, NM). (Lijëde Romans 6:23; 1 Timótee 2:3-5.)
2. Cie nsënia pa la Bibia sun l daunì dla religions?
Die ne se lascia nia ngiané dala religions che dij de fé si ulentà ma desmostra de avëi gën l mond de Satan (Iacun 4:4). Tla Parola de Die vën adurveda l’esprescion “Babilonia, la granda” per ndiché duta la fauza religions (Revelazion 17:5). Babilonia fova la zità ulache ova abù scumenciamënt la fauza religion do l deluve ti dis de Noé. Tosc tulerà Die demez duta la religions che ngiana y sotmët la persones. (Lijëde Revelazion 18:2, 3, 8.)
Ma te duta la fauza religions iel persones senzieres y Iehova ne se desmëncia nia de chëstes. Ël les lieia adum ti nsenian l’aurità. (Lijëde Giuani 6:45.)
3. Cie dassëssa pa fé la persones che chier Die cun senzierità?
La drëta religion lieia adum la persones
A Iehova ti sta a cuer la persones che ama l’aurità y la giustizia. Perchël les ncurajeiel a zapé ora dala fauza religion. Chëi che à gën Die uel fé mudamënc per ti plajëi. (Lijëde Revelazion 18:4.)
Do la mort de Gejù ova la persones senzieres tëut su cun legrëza la bona nutizia perdicheda dai apostuli. Les ova mparà na nueva maniera de viver che ti ova dat speranza y na vita cun n fin. Chëla persones ie n bon ejëmpl per nëus ajache les ova azetà la bona nutizia metan Die al prim post te si vita. (Lijëde 1 Tessalonizésc 1:8, 9; 2:13.)
Iehova dà l bënunì a chëi che se destaca dala fauza religion y uel l aduré. Sce tulon su si nvit, pudons avëi si amezizia, l amor de na familia cristiana mundiela y la vita eterna. (Lijëde Mateo 19:29; 2 Corìntesc 6:17, 18.)
4. Cie fajerà pa Die per purté pesc y cuntentëza sun duta la tiera?
L ie na bona nutizia savëi che Die meterà tosc fin ala fauza religion. Nsci unirà duta l’umanità delibreda dala uprescion. La fauza religion ne puderà mei plu ngiané y spartì la persones. Duc chëi che sëuravivrà, adurerà adum l sëul vere Die. (Lijëde Revelazion 18:20, 21; 21:3, 4.)
