Gejù ne n’ova nia nsenià che duta la religions ie drëtes, ma mé una. Ël la paredlova a na streda che mëina ala vita eterna y ova spiegà: “Puec ie chëi che s’la giata ora” (Mateo 7:14). Die azeta mé l’adurazion che se stiza sun si Parola, la Bibia. Duc “chëi che adora drët” Die, ie liei adum te na unica fede. (Lijëde Giuani 4:23, 24; 14:6; Eféjies 4:4, 5.)

Cialëde l video Azeta pa Die duta la religions?

Gejù ova dit danora che fauc profec ëssa ruinà l cristianejim. Chisc ti semea ai drë cristians y nce si dliejes se tol a dì de vester cristianes. Ma co possen pa capì che i ne n’ie nia drë cristians? I drë cristians possen recunëscer da si cualiteies y da si maniera de viver. (Lijëde Mateo 7:13-23.)

Cunscidron cin carateristiches:

• I drë cristians respetea la Bibia sciche Parola de Die. Ëi se sforza de viver aldò di prinzips dla Bibia. La drëta religion se desferenzieia dala religions che se stiza sun ideies dla persones (Mateo 15:7-9). I drë cristians ie coerënc ajache ëi nstësc fej chël che ëi nsënia. (Lijëde Giuani 17:17; 2 Timótee 3:16, 17.)

•   Ëi dà unëur al inuem de Die, Iehova. Gejù fajova cunëscer l inuem de Die. Ël judova la persones a cunëscer Die y ti nseniova a prië: “L sibe santificà ti inuem” (Mateo 6:9). Ciuna religion fej pa cunëscer l inuem de Die te Vosc raion? (Lijëde Giuani 17:26; Romans 10:13, 14.)

• Ëi perdica l Rëni de Die. Die ova mandà Gejù sun la tiera a perdiché la bona nutizia dl Rëni che ie la sëula speranza per l’umanità. Monce puech dan murì ova Gejù rujenà de chësc (Luca 4:43; 8:1; 23:42, 43). Ël ova dat nce a si discepuli la ncëria de perdiché l Rëni. Sce zachei rejona cun Vo dl Rëni de Die, de ciuna religion ratëis’a che l fej pert? (Lijëde Mateo 24:14.)

• Ëi ne fej nia pert dl mond atuel plën de riedà. Ëi ne se ficia nia tla politica y ti cunflic soziei (Giuani 17:16; 18:36). Mplu se straverdi dai cumpurtamënc y dala pratiches melsanes dl mond d’al didancuei. (Lijëde Iacun 4:4.)

• I drë cristians desmostra amor straurdiner l un per l auter. La Parola de Die ti nsënia a respeté persones de uni etnia. La fauza religions à suvënz sustenì la vieres, ma i drë cristians ne fej chësc nia (Michéa 4:1-3, NM). Al incontra, adrovi gën si tëmp y si ressorses per judé y ncurajé l proscimo. (Lijëde Giuani 13:34, 35; 1 Giuani 4:20.)

Ciuna religion stiza pa duc si nseniamënc sun la Parola de Die, dà unëur al inuem de Die y cunedësc che si Rëni ie la sëula speranza per l’umanità? Chi desmostra pa amor per l proscimo y ne sustën deguna viera? Ciuna ie pa Vosta minonga? (Lijëde 1 Giuani 3:10-12.)