LEZION 6
Ce speranza iel pa per i morc?
1. Ciuna bona nutizia iel pa n cont di morc?
Canche Gejù fova ruvà a Betania, daujin a Gerusalem, fova si cumpani Lazaro bele mort da cater dis. Gejù fova jit cun Marta y Maria, surans dl defont, pra la fòssa. Te puech tëmp se ova abinà adum na gran cumpëida de persones. Pudëis’a Ve nmaginé la gran legrëza de Marta y Maria canche Gejù ova ressuscità Lazaro? (Lijëde Giuani 11:21-24, 38-44.)
Marta cunesciova bele la bona nutizia n cont di morc. Ëila savova che Iehova ëssa purtà inò n vita i morc per viver sun la tiera. (Lijëde Giobe 14:14, 15.)
2. Cie suzed pa canche na persona mor?
Die ti ova dit a Adàm: “Stuep ies tu, y stuep deventeres inò” (GENESIS 3:19)
La persones ie unides fates cun “stuep de tiera de ciamp” (Genesis 2:7; 3:19). Nëus ne n’on nia n’ana che viv te nosc corp. Chësc uel dì che deguna pert de nëus viv inant canche murion. Nce nosc cervel y nosc pensieres mor. Per chësta rejon ne n’ova Lazaro cuntà nët nia de chëi dis che l fova mort. Chësc ajache i morc ne se nsà nia. (Lijëde Salm 146:4; Giuani 11:11-14.)
Turmënta pa Die la persones tl fuech do la mort? Davia che la Bibia dij che i morc ne se nsà nia, iel tler che l nseniamënt dl infiern ie fauz y che l calunieia Die. L sëul pensier de turmenté la persones tl fuech ie sgricëus per Die. Iehova, n Die d’amor, ne fajëssa mei patì la persones a na tel maniera. (Lijëde 1 Giuani 4:8.)
Cialëde l video Cie suzed pa canche na persona mor?
3. Possa pa i morc rujené cun nëus?
I morc ne po’ no rujené no audì (Salm 115:17). Ma l ie angiuli riei che pudëssa rujené cun la persones dajan da crëier de vester i defonc (Giuda 6). Iehova pruibësc uni tentatif de rujené cun i morc (Deuteronome 18:10, 11, NM). (Lijëde Gàlatesc 5:20, 21.)
4. Chi unirà pa inò purtà n vita?
Milions de morc unirà inò purtei n vita sun la tiera. Danter i ressuscitei saral nce persones che ne n’à nia cunesciù Die y che se à cumpurtà mel. (Lijëde Salm 37:29; Storia di Apostuli 24:15.)
I ressuscitei puderà mparé l’aurità n cont de Die y desmustré cun si ubedienza de avëi fede te Gejù (Revelazion 20:11-13). Sce ëi se cumpurterà coche Die uel, puderai viver per for sun la tiera. (Lijëde Giuani 5:28, 29.)
5. Cie nes nsënia pa la ressurezion n cont de Iehova?
La ressurezion ie n sëni dl amor de Die y de si buntà che perdrët ne se meriton nia. On na speranza per i morc, ajache Die à mandà si Fi a dé ca si vita per nëus. Chi Ve ncunfertëis’a a udëi canche la persones unirà ressuscitedes? (Lijëde Giuani 3:16; Romans 6:23.)
