Die ova abinà adum i descendënc de Abràm te na nazion, tlameda “Israel”, y ti ova dat n codesc de leges. I israelic messova cialé che l’adurazion a Die y si Parola ne n’unissa nia sfauzedes (Salm 147:19, 20). Chësc ie stat nchina ncuei de benefize per persones de duta la nazions. (Lijëde Genesis 22:18.)

Die ova crì ora i israelic per vester si testemonesc. Si storia desmostra che ala persones ti vala bona mé sce les tën ite la leges de Die (Deuteronome 4:6). Tres i israelic pudova nce d’autri cunëscer l sëul vere Die (Isaia 43:10, 12, NM).

Do che i israelic ova perdù l’apruvazion de Die, i ova Die sustituii cun la cungregazion cristiana (Mateo 21:43; 23:37, 38). Da ntlëuta incà ie i drë cristians y nia plu i israelic a vester testemonesc per Iehova. (Lijëde Storia di Apostuli 15:14, 17.)

Gejù ova nstruì si discepuli per perdiché y fé proselic te duta la nazions (Mateo 10:7, 11; 24:14; 28:19, 20). Śën che l sistem atuel ie daujin a si fin, à chësta opra arjont l mascimo resultat. Per l prim iede tla storia, à Iehova abinà adum persones de duta la nazions acioche les possa l aduré coche ël uel (Revelazion 7:9, 10). Davia che i drë cristians fej pert de n popul urganisà, possi se judé y ncurajé un cun l auter. Te si reunions tenides sëura dut l mond va duc do al medemo prugram de nstruzion biblica. (Lijëde Ebrei 10:24, 25.)

Ntëur l 1870 ova na pitla grupa de studiëusc dla Bibia scumencià a purté a lum auriteies bibliches da giut desmincedes. Davia che i ova capì che Gejù ova urganisà la cungregazion cristiana per la perdicazion, ovi scumencià a cunedì l Rëni sëura duta la tiera. Tl 1931 ovi sëurantëut l inuem Testemonesc de Iehova. (Lijëde Storia di Apostuli 1:8; 2:1, 4; 5:42.)

Tl prim secul univa la cungregazions cristianes, prejëntes te plu paejes, avisedes da n cunsëi diretif che recunesciova Gejù sciche capo dla cungregazion (Storia di Apostuli 16:4, 5). Nce ncuei à i Testemonesc de Iehova n Cunsëi Diretif metù adum da uemes cun esperienza. Chësc se cruzia dl’ativiteies dla filieles di Testemonesc de Iehova ulache l vën ciancià, drucà y dat ora publicazions per studië la Bibia te plu de 900 rujenedes. L Cunsëi Diretif cëla che la plu de 100.000 cungregazions sëura dut l mond ebe nstruzion biblica y ncurajamënt. Te uni cungregazion iel uemes cumpetënc, tla ncëria de seniores, che se cruzia cun amor dl “pastrëc de Die”. (Lijëde 1 Piere 5:2, 3.)

I Testemonesc de Iehova ie urganisei per perdiché la bona nutizia. Sciche i apostuli ntlëuta, vai de cësa n cësa a crì la persones che uel jì do al ejëmpl de Gejù (Storia di Apostuli 20:20). Ëi ti pieta n curs biblich a duc chëi che ie senziermënter nteressei al’aurità. Ma i Testemonesc de Iehova ie plu che mé na urganisazion. Ëi ie na familia de fredesc y surans che se nteressea l un l auter y adora Die, n Pere plën d’amor (2 Tessalonizésc 1:3). Davia che ëi ie urganisei per fé la ulentà de Die y per judé i autri, iesi la familia plu cuntënta sun la tiera. (Lijëde Salm 33:12; Storia di Apostuli 20:35.)