Cie dij pa la Bibia n cont dla pandemies?
La resposta dla Bibia
La Bibia ova dit danora che ti ultimi dis fossel unì docà epidemies (Luca 21:11). La epidemies y la pandemies, ne n’ie nia straufonghes da Die. Al incontra, tres si Rëni, meterà Die tosc fin a duta la malaties, nce ala pandemies.
Ova pa la Bibia dit danora la pandemies?
La Bibia ne rejona nia de pandemies o malaties spezifiches schiche COVID-19, AIDS o la spanuela. Ma la rejona de malaties murteles coche la “pest” (Luca 21:11; Revelazion 6:8). Chëstes fej pert dl sëni di “ultimi dis”, cunesciui nce cun l’esprescion “fin dl mond” (2 Timótee 3:1; Mateo 24:3).
À pa Die mei straufà la persones per mesun dla malaties?
Tla Bibia abinons mé n valgun caji ulache Die ova straufà zachei cun na malatia. Per ejëmpl, ël ova tucà na persona cun la lepra (2 Rëiesc 5:20-27). Ma n ne possa nia paredlé n tel cajo a na pandemia che toca duc, nce i inuzënc. Chësc fova stat n giudize contra na persona che se ova arlevà contra Die.
Ie pa la pandemies de nosc dis straufonghes da Die?
No. N valguni miena che Die castiga la jënt cun la pandemies y la malaties, ma la Bibia ne nsënia chësc nia. Ciuldì pa no?
Dantaldut ajache nce persones che fej la ulentà de Die se amala. Chësc fova bele nsci nce tl passà. Per ejëmpl Timótee fova suvënz malatic per gauja de si magon (1 Timótee 5:23). Ma la Bibia ne dij nia che chësc fova n sëni dla dejapruvazion de Die. Ala medema maniera, trueps che adora Die al didancuei se giapa su malaties de uni sort. Datrai se ai tacà vel’ malatia mé ajache i fova tl fauz luech tl fauz mumënt (Qohélet [o Ecclesiastes] 9:11, NM).
Oradechël nsënia la Bibia nce che l ne n’ie mo nia ruvà l tëmp de castighé chëi che fej l mel. Vivon tl “di dla salvëza”, te n tëmp ulache Die nvieia la persones a se fé daujin a d’ël y a se salvé (2 Corìntesc 6:2). Ël fej chësc tres n’opra de perdicazion mundiela per cunedì na bona nutizia: l “vaniele dl rëni” (Mateo 24:14).
Finerà pa mei la pandemies?
Sci. La Bibia dij danora che tosc ne se amalerà plu deguni. Tres si Rëni tulerà Die demez duta la malaties (Isaia 35:5, 6). Ël meterà fin ala suferënzes, al duel y ala mort (Revelazion 21:4). Die purterà monce n vita chëi che ie morc per viver sani y nton sun na tiera da paravis (Salm 37:29; Storia di Apostuli 24:15).
Ferssli dla Bibia che rejona dla malaties
Mateo 4:23: “Ël [Gejù] jiva ncantëur te duta la Galilea, nseniova tla sinagoghes, anunziova la bona nuvela dl rëni y variva pra l popul duta la malaties y i mei”.
Senificat: I miraculi de Gejù ova dat na desmustrazion danora de chël che l Rëni de Die fajerà tl daunì per duta l’umanità.
Luca 21:11: “Dlonch ora saral [...] la pest”.
Senificat: I problems de sanità che ie da udëi sëura dut l mond, ie n sëni di ultimi dis.
Revelazion 6:8: “Cëla, chël che m’ie cumparì fova n ciaval falch. Chël che raitova lessù se tlamova la Mort, y l mond di morc ti univa do. Y l ti ie unì dat rejon [...] per destrighé la jënt cun [...] la pest”.
Senificat: Chësta profezia di cater ciavalieres apocalitics ndichea che te nosc dis fossa unides docà la pandemies.
L pudëssa Ve nteressé nce...
ESSENTIAL BIBLE TEACHINGS
Ciuldì lascia pa Die pro la suferënzes?
La resposta dla Bibia ie de gran cunfort.
BIBIA: DUMANDES Y RESPOSTES
Cie realiserà pa l Rëni de Die?
Unide sëura cie che fajerà l Rëni de Die canche l guvernerà sëura duta la tiera.
BESONDERE AKTION
Purvëde nosc curs biblich
L se trata de n curs biblich nteratif debant cun n nseniant.