Adam ma Iv eu peani piakirikiri laapa doko maramana. Go agelo maga waina eu dausi Satana, eu mari rip̃a Sup̃e.

Go eu po suwo umai paki maramana, po dape napatokoni naatam̃oli maga naga euga viragi nagoroi maga, po madeada visolaki natura maga. Eu pei naatam̃oli warua maga, eu kasua, go eu mila.

Go naatam̃oli sa maga deu laapa maramana. Tusi Tapu e naga: “Yehovah e punusia naga namarileosana, eu p̃arua maramana, go nap̃ora maga e sa saranaleatia.”

Noa e pei naatam̃oli wia sikai. Yehovah e noa ki Noa asa naga ega wo mari noai warua sara, go mari sa ki naatam̃oli sa maga.

Go Sup̃e e noa ki Noa asa naga ega davagi ak warua sikai. Noa e piraki nagoroi go natuna maga, go lomauri seara eu sili paki ekopuni ak wanogoe.

Noa e pakalaapa noa sai naatam̃oli maga asa naga noai warua e go sara, ma naatam̃oli maga eu karai takidorongo. Naatam̃oli seara eu pasa sa ki Noa go seara eu midoa ki matakinia.

Ragi waina Noa e davagi ki sua ak, e mari lomauri maga eu sili paki ekopu.