Adam mai Iv raru bav ira nitura, i atatu mwa sinobuga lol ureure. Ataguna gea, ira vingaga rituai ram bulu mai Setan, i vuvuri ram ivwalui Tamanda.

Kadogaha ira vingaga kea ram himai lol ureure, i ram leahi rebehira rabora kun gida atatu. Huribe ramen lai dum ira vavine, vuvuri ram lagi maira. Ira vavine kea, ra bav ira naturirigi atamwani be rabora ira atat ñañav salua, i vuvuri ran rihumaragai. Ira naturirigi kea, ram lol bidoi ginau, i rabora kun ira atat turu.

Aluna gea, ureure mwa masiri gin ira atatu be ram lol maragai aleñ hahantai. Buka Sabuga mwa bevea kunkeki be: “Atatu noto lol ureure ram lol maragai aleñ hahantai. Vuvuri, vataha mahavana binihira nu masiri ñano gin ira aleñ hahantai.”

Noa kea atat tavuha vwate non Tamanda. Jehova mwa bevea lalai Noa be, Kea vi lol wai gaivua vi rovo, huribe men wehi kaburai ira atat hahantai.

Ataguna gea, Tamanda mwa bevea lalai Noa be, Noa vi lol wag̃a gaivua vwate. I vuvuri Noa, tasalana, mai ira nitura, i tasalara, mai lalañan ginau rahu ñoto, rav haroro alolon wag̃a gaivua gea.

Noa mwa lai avoan vev sera lalai atau ñoto, be wai gaivua vi rovo. Ge vwate mwa hav roñoe tehe, atatu ram manuhi Noa, ra bev bwarebwarea, i vuvuri rituai ram hav doronia te ñano.

Ataguna be wag̃a gaivua gea mwa nogo, Noa mwa harag̃og̃o lalañan ginau rahu vai alolon wag̃a gea.