Be tam doronia be Jehova vi roñ mwandavuha gin gida, nu tavuha be tav roroñtai vingaga muramuraga vwate be mwa do lol ute amare. Jehova nu lol vingaga kea amua, vuvuri mwa siv lol Adam.

Ataguna gea, Jehova mwa dao rahun vingaga kea mwa hivo lol sibweñin vavin daulato vwate, ihana be Meri. Vuvuri, Meri mwa bav naturigi kea lol ute Betlehem, i ram dari ihana be Jisas.​—Jon 6:​38.

Batena be Jisas nu lako lol ureure, aleñana nu seserai aleñan Tamanda. Kea nu lol aleñ mag̃emu, i nu dabe atatu, i sinobu ram roñ mwandavuha ginia, i ram mai sosoria. Jisas binihina nu wasi huribe men bakahi atatu la avoan mwasigi non Tamanda.

Ira muai tataroi ram hav doron te Jisas ñano. Ginibe kea nu seserai nora silovagahi dentene, i mulei nu seserai nora aleñ hahantai.

Jisas nu lai mulei rahuana lalai atatu be ram haro, i mulei nun lol atatu be ran mate huba, ram rahu mulei.

Ira muai tataroi ram sokai ata Rom, be rav bivilis Jisas, i ram wehia mwa mate.