Gubweñ gaitolu g̃oro be Jisas nu mate, ira vavine rituai ra bano be ramen gita sere bwaruna. Ge ram habwea be rebehina mwa hav mom eno te lol bwaru. Jehova nu barahu muleinia nin mateana huba.

Ataguna, Jisas mwa bisirai aben ira non roroñtai.

Ue, Jehova nu lol Jisas mwa rahu mulei nin mateana, i mwa bora vui muramuraga vwate, be bwarabe vi mom mate te dum mulei. Ira roroñtai non Jisas, ram du ram gitae be Jisas mwa hae mulei vai lol ute amare.

Jisas nu liñ rahuna gi tavwen hala be atatu rav habwe dum rahuana. (Matiu 20:28) Aleña be Tamanda nu taria huri mateanan Jisas, mwa bora kun matan hala be vi lai rahuana be mosmosianana sigai lalai gida.

Jehova nu tari Jisas mwa bora Ratahigi be vi roroa g̃oro ureure. Jehova nu gitae lua atatu 144,000 be rai bulu mai Jisas lol Ute Lavoa non Jisas. Ira atatu kea ran tu wasigi mai Tamanda lol taro be ran rahu radu lol ureure, havava mwa botui taro be ram mate. Ataguna gea, Tamanda nu barahunira nin mateana, i ram hai lol ute amare. Jisas mai 144,000 atatu, rav rorovoga aten Ute Ratahigi non Tamanda be mwa dogo amare. Ute Ratahigi gea vi roroa dalis ureure, i vuvuri aleñ tavuha ñano vi togo. ​—Revelesen 14:​1-3.

Ute Ratahigi non Tamanda vi lol ureure geki vi vora paradaes. I vuvuri bwaloana vi sigai, atatu rav togo lol tamwata, aleñ hiruga vi sigai, maro vi sigai, i atatu ñoto rav dogo lol samsamwarana ñano.​—Ol Sam 145:16.