MBALA ya liboso oyo nayokaki makambo etali Batatoli ya Yehova ezalaki na eteyelo, na engumba Koutaïssi. Moto moko ya kartye ayebisaki ngai ete Batatoli ya Yehova basalelaka bikeko te na losambo na bango mpe bandimaka te ete Yesu azali Nzambe Mozwi-ya-Nguya-Nyonso. Yango eyokanaki te na mateya ya Ɔrtɔdɔkse oyo nazalaki kolinga mingi.

Na 1992 na eleko ya molunge, nazongaki na Tsageri, engumba oyo nabotamá mpe nakutanaki na Batatoli ya Yehova. Mama ayokaki makambo mingi ya malamu etali Batatoli ya Yehova. Lokola nazalaki kaka kokanisela bango mabe, mama ayebisaki ngai, “Yo moko kende koyoka makambo oyo bateyaka.”

Mbala mingi bandeko mibali mibale Pave ná Paata, oyo bazalaki babongisi-nzela bazalaki koya kotala libota moko pene na biso. Bato mingi na esika tozalaki kofanda bazalaki kosepela  koyoka bango mpe kotuna bango mituna. Yango wana nazwaki ekateli ya kolanda masolo yango. Mbala nyonso oyo nazalaki kotuna mituna, bandeko yango bazalaki kofungola Biblia mpe kosɛnga ngai natánga yango. Yango ekamwisaki ngai mpenza. Namonaki na miso na ngai moko oyo Biblia elobi!

Eumelaki te nakɔtaki na etuluku ya bato oyo bandeko yango bazalaki koyekola na bango Biblia. Na eleko ya molunge ya mbula oyo elandaki, tozalaki bato zomi oyo tozwaki batisimo. Na nsima mama mpe akómaki Motatoli ya Yehova.

Soki nakanisi, nasepelaka ndenge bandeko bazalaki kotika ngai moko natánga Biblia mpo nazwa biyano na mituna na ngai nyonso. Yango esalisaki ngai nalongola nkanda oyo nazalaki na yango ntango bazalaki kotyela mateya ya lingomba na ngai ntembe. Komona ndenge batikaki ngai moko natánga na Biblia esalisaki ngai, nasalelaka mpe mayele yango mpo na kosalisa basusu básepela na solo!