Na ekólo Philippines, Jonathan azalaki kozela akutana na monganga. Lokola mwasi oyo asalaka na esika bayambaka bato amonaki ete Jonathan alataki malamu mpenza, atunaki ye soki asalaka na kompanyi ya asiransi. Jonathan ayebisaki mwasi yango ete azali Motatoli ya Yehova mpe ayaki wana mpo na kosalisa Motatoli mosusu ya Yehova oyo azalaki na  mposa ya mwa lisalisi. Mwasi yango oyo nkombo na ye Laila, ayebisaki Jonathan ete tata na ye, oyo autaki kokufa azalaki kotánga Linɔ́ngi ya Mosɛnzɛli mbala na mbala. Jonathan atángelaki ye Yoane 5:28, 29 mpe apesaki ye trakte Elikya nini ezali mpo na balingami na biso oyo basili kokufa?

Ntango Jonathan ayaki lisusu na lopitalo yango, amemelaki mwasi yango mikanda mosusu mpe amemelaki ye ndeko mwasi moko oyo akómaki koyekola Biblia ná Laila.  Eumelaki te, mobali ya Laila, leki na ye ya mwasi mpe mama na ye oyo bazalaki kofanda na ye bakómaki mpe koyekola Biblia.

Rose, moninga ya Laila ya kartye, ayaki epai ya Laila mpe atunaki ye mpo na nini bapaya mingi bayaka na ndako na ye. Laila ayebisaki ye ete Batatoli ya Yehova bazalaki koyekola na ye Biblia. Yango wana, Rose mpe akómaki koyekola Biblia mpe ntango akendaki kotala leki na ye ya mwasi na mboka na bango, na esengo nyonso ayebisaki leki na ye makambo oyo azalaki koyekola. Makambo oyo leki na ye Abigail ayokaki ebendaki likebi na ye, yango wana ye mpe asɛngaki báyekola na ye Biblia. Mama ya Rose mpe andimaki koyekola Biblia.

Laila autaki kozwa batisimo na liyangani ya etúká oyo euti kosalema. Mama na ye auti mpe kozwa batisimo. Moninga na ye Rose mpe leki ya Rose bazwaki batisimo na mbula oyo eleki. Mama ya Rose akómi sikoyo koyangana mbala na mbala na makita. Bandeko mosusu ya Laila bazali kokoba koyekola Biblia. Ebele wana ya bato bayambi solo na nzela ya moto moko mpamba oyo basakwelaki na lopitalo!

Kosakola na elobeli ya bababa ezali kobota mbuma mpenza na Sri Lanka. Na 2015, Bandeko bazalaki na baadrɛsi soki 80 ya bababa mpe bakomaki baadrɛsi yango na mwa eteni ya papye. Kobanda wana, lisangá ya liboso na elobeli ya bababa esalemaki na Sri Lanka mpe batyaki na ordinatɛrɛ bankombo ya bato soki 420 ná baadrɛsi mpe ndenge ya komona baadrɛsi yango na Internet. Bandeko basololaki na bababa mingi (80%) ezala na nzela ya video to na bamesaje. Ndeko-mwasi moko ná mobali na ye oyo bazali bamisionɛrɛ balobi boye: “Sikoyo tokoki kopesa basakoli oyo bazali bababa teritware ya kosakola. Liboso, bazalaki kokende kotala kaka bababa oyo bango bayebaki.”

Bandeko na biso na Mongolie bazali kopesa mabɔkɔ mpenza na programɛ moko ya sipesiale ya kopesa litatoli na bingumba ya minene ata ntango malili ezali makasi mpenza (-30°C). Mokonzi moko ya Leta azwaki mikanda na shario ya mikanda mpe na nsima akomaki mwa mokanda mpo na kopesa matɔndi. Akomaki boye: “Nazali mondimi ya Buda. Kasi naluká mpe koyeba makambo ya mangomba mosusu mpo nalandaka likanisi oyo elobaka ete tosengeli te kolanda kaka nzela moko, tosengeli koyeba mpe banzela mosusu. Nsima ya kotánga mwa mikanda na bino oyo bokomá, nazwaki ekateli ya kokoma mokanda oyo mpo na komonisa ndenge namiyoki. Namoni polele ete esɛngaki bino ntango mingi mpe makasi mpo bólobela makambo oyo ebongi mpe ezali kosalisa bato. Moko ya makambo nayekoli na mikanda na bino ezali ete Biblia ezali buku oyo moto nyonso asengeli kotánga yango. Buku yango elobaka solo. Biblia epesaka litambwisi ya malamu mpo na bomoi na biso. Nalingi kopesa matɔndi na baoyo nyonso bamipesaka mpenza na kobongola mikanda na monɔkɔ ya Mongolie. Nalingi mpe kopesa matɔndi na baoyo nyonso bapesaka bato mikanda yango mpo na kosalisa bango ata ntango moi to malili ezali makasi mpenza.”

Na Hong Kong, ndeko mobali moko na nkombo Brett oyo azali mobongisi-nzela asololaki na elenge mobali moko ya mbula koleka 20 mpe apesaki ye trakte Nini epesaka esengo na libota? Ntango elenge mobali yango azwaki trakte yango, atángisaki mai ya miso. Alobaki ete abokwamá na libota ya Batatoli ya Yehova kasi ntango akómaki na mbula 16 akimaki ndako. Mbula mitano oyo elandaki azalaki kolala na balabala mpe akómaki moombo ya drɔgɛ tii ntango ebongiseli moko oyo esalisaka bato ekutanaki na ye mpe esalisaki ye.

Alobaki ete mokolo oyo akutanaki na ndeko Brett na ntɔngɔ, autaki kobondela Nzambe ete “soki lingomba na ngai  ya bomwana ezali lingomba ya solo, nabondeli yo, lakisá ngai elembo moko lelo.” Amonaki ete libondeli na ye eyokamaki. Ye ná ndeko yango bakendaki na mwa restora oyo ezalaki pene wana mpe batalelaki makambo oyo ezali na mwa buku Zongelá Yehova. Lokola elenge yango asengelaki kozonga na France na mpokwa ya mokolo yango, bapesanaki banimero mpe baadrɛsi. Nsima ya mikolo, elenge mobali yango akomelaki ndeko Brett boye: “Ndeko na ngai, Yehova ayanolaki na mabondeli na ngai. Mokolo ya lomingo, nakokende na Ndako ya Bokonzi oyo ezali pene.” Akutanaki na Batatoli ya Yehova na France mpe akómaki koyekola Biblia mpe koyangana na makita.