SPINOZA, filozofe moko ya Pays-Bas, akomaki boye: “Natyolaka misala ya bato te, namilelaka mpe te mpo na yango, mpe nayinaka yango te, kasi nalukaka nde koyeba yango malamu.” Lokola ozali molakisi, ozali na mokumba monene ya koluka koyeba makanisi, mimeseno mpe makambo oyo bana-kelasi na yo bandimaka, ezala mpe ya bana-kelasi oyo bazali bana ya Batatoli ya Yehova. Na bantango mosusu, bana ya Batatoli ya Yehova bakoki kosala makambo mosusu oyo ekeseni na oyo ya bana-kelasi mosusu. Kasi soki emonani ete makambo yango euti nde na mateya ya lingomba na bango mpe bizaleli malamu oyo bateyá bango, ebongi otyela yango likebi. Batatoli ya Yehova babimisi mwa buku oyo mpo na kosalisa yo oyeba malamu bana-kelasi oyo bazali Batatoli ya Yehova. Tozali kolikya ete okozwa ntango ya kotánga mwa buku yango malamumalamu.

Koyeba malamu makambo ya losambo oyo moto mosusu andimaka esɛngi te ete ondima yango to olanda yango, mpe soki moto ayebisi yo makambo ya losambo oyo ye andimaka, yango elingi koloba te ete azali koluka kokómisa yo mondimi ya lingomba na ye. Na nzela ya mwa buku oyo, tozali koluka te kondimisa yo to bana-kelasi na yo makambo oyo Batatoli ya Yehova bandimaka. Mposa na biso ezali ya koyebisa yo mitinda mpe makambo oyo bana-kelasi na yo mosusu bandimaka, oyo baboti na bango oyo bazali Batatoli ya Yehova bateyaka bango, mpo ozala na mokakatano te mpo na koyeba bango malamu mpe koteya bango. Kasi, tóyeba ete bana basalaka ntango nyonso te makambo oyo bateyaka bango na ndako, mpo mwana na mwana azali koyekola kokolisa lisosoli na ye.

Lokola baboti mingi, Batatoli ya Yehova balingi ete bana na bango bázwa matomba mingi na kelasi na bango. Yango wana, bateyaka bango báyokanaka malamu na balakisi na bango. Batatoli ya Yehova mpe bana na bango basepelaka komona balakisi bazali komitya na esika na bango mpe kosalela bango makambo na limemya.

Batatoli ya Yehova bazali bakristo oyo bayebani na mokili mobimba. Nzokande, na bantango mosusu bato bayebaka makambo na bango malamu te. Yango wana, elikya na biso ezali ete mwa buku oyo ekosalisa yo oyeba malamu bana-kelasi na yo oyo bazali Batatoli ya Yehova. Tozali kolikya ete okoyeba mingi mpenza ntina oyo, na makambo mosusu, bakoki kosɛnga ete básala lokola bana-kelasi nyonso te.