Mokapo 76

Akei kolya epai ya Mofalisai moko

YESU auti kobikisa ebúbú moko mpe ayanoli epai na baoyo bazali kotya ntembe na ntina na eutelo ya nguya na ye. Tala ye sikawa abyangami mpo na kokende kolya epai na Mofalisai moko. Liboso na kolya, Bafalisai bakosukolaka maboko kino na mabolongo engebene motindo na bango. Basalaka yango ezala liboso to mpe nsima na bolei mpe ata ntango basilisi bolei moko mpo na kobanda mosusu. Mobeko wana na bonkoko, kozanga ete etemela mibeko mikomami na Nzambe, nzokande elekisi mpenza ndelo na kotalela masengisi na Nzambe mpo na likambo litali bopeto ya losambo.

Komonaka ete mobyangami na ye atosi mobeko yango te, Mofalisai akamwe, atako alobi likambo moko te. Yesu, ye oyo asosoli bokamwi na ye, alobi na ye ete: “Na bongo bino Bafalisai bokopetolaka libanda na kopo mpe na saani, nde katikati na bino etondi na lokoso mpe na mabe. Bilema! Oyo asali yango ezali na libanda, asali mpe yango ezali na kati te?”

Na bongo Yesu atondoli bokosi ya Bafalisai oyo bazali kosukola maboko engebene milulu na bango, kasi bazali kosala molende te mpo na kopetola mitema na bango na mabe. Apesi bango toli oyo: “Bopesa nde yango ezali na kati lokola makabo na mawa, mpe nokinoki biloko nyonso bizali mpeto na bino.” Makabo na bango masengelaki kosalema na bolingo kasi ezali mpo na kozipa bamosusu miso te na nzela na boyengebene na lokuta.

Yesu akobi na kolobaka ete: “Mawa na bino Bafalisai! mpo ete bozali kopesa ndambo na zomi na lumbalumba, na ndembe, na ndunda nyonso mpo na makabo, nde bozali kotika boyengebene mpe bolingo na Nzambe. Ekokaki na bino kosala makambo oyo nyonso mpe kozanga kolongola makambo oyo wana.” Mibeko oyo Nzambe apesaki na Yisraele mizalaki na ebongiseli ya kosenga ndambo na zomi, kati na milona ya bilanga. Lumbalumba mpe ndembe ezali milona na nsolo kitoko oyo bakotyaka na nzungu mpo na kopesa elengi na biloko. Bafalisai bazali kofuta ndambo na zomi na milona mikemike wana kozanga kokakola yango, nde Yesu apameli bango mpo na mabunga na bango kati na likambo litali kosalela bolingo, boboto mpe bopolo, masengami maleki ntina.

Yesu azongeli lipáléli na ye: “Mawa na bino Bafalisai! mpo ete bozali kolinga bifandelo na lokumu kati na biyanganelo, na losako na zando. Mawa na bino! mpo ete bozali lokola mayita oyo bazali komona yango te, mpe bato batamboli na likoló na yango kozanga koyeba yango.” Na bongo, mbindo na Bafalisai ezali komonana polele te epai na bato. Lingomba na bango ezali ína, ezali bobele bokosi.

Koyokaka bongo, moko na balakisi na mibeko, mobali na boyebi mingi na Mibeko na Nzambe, amoni mabe mpe alobi na Yesu ete: “Molakisi, ezali yo koloba makambo oyo, ozali kofinga biso lokola.”

Yesu, ye oyo akweisi mpe balakisi na mibeko, ayanoli ete: “Mawa na bino balakisi na mibeko! mpo ete bozali kopesa bato mikumba makasi na kokumba, mpe bino mpenza bokosimba mikumba yango na moko na misapi na bino te. Mawa na bino! mpo ete botongi mayita na basakoli, nde bankoko na bino babomaki bango.”

Mikumba oyo Yesu azali kolobela awa ezali mibeko na bonkoko oyo balakisi na mibeko balingaki kokitisa yango ata moke te mpo na kolongola kilo epai ya bato. Yesu ayebisi ete balakisi na mibeko bandimaki ata nkutu kobomama ya basakoli, mpe ayebisi bango ete “makila na basakoli nyonso masopani longwa na kozalisa na mokili makotunama na maboko na libota oyo, longwa na makila na Abele kino makila na Zakaria oyo abomamaki kati na Tempelo, penepene na etumbelo na mbeka.” Yesu abakisi lisusu ete: “Nalobi na bino solo ete makotunama na maboko na libota oyo.”

Mokili na bato oyo bakoki kosombama ebandaki ntango Adam mpe Eva babotaki bana; tokoki bongo koloba ete Abele azalaki na bomoi “longwa na kozalisa na mokili.” Nsima na kobomama ya Zakaria, mokili na Yudea ebebisamaki na banguna oyo bautaki na mokili na Sulia. Nzokande, Yesu ayebisi ete na ntina na mabe na bango monene, bato ya ntango na ye bakozwa mpasi eleki monene. Yango esalemaki mwa mibu 38 na nsima, na mobu 70 ya ntango na biso.

Yesu akobi maloba na ye ya kokweisa: “Mawa na bino balakisi na mibeko! mpo ete bolongoli fungola na mayele; bino mpenza bokoti te, mpe bopekisi bango balingaki kokota.” Balakisi na mibeko bazali na mokumba ya koteya Liloba na Nzambe epai na bato mpe kofungolela bango ndimbola na yango polele. Kasi bazali kosala yango te, nkutu, bazali nde kopimela bato likoki ya kokanga ndimbola na yango.

Bafalisai mpe balakisi na mibeko basiliki mpo ete Yesu apameli bango. Babandi kosukuma ye makasi ntango abimi na ndako mpe kotuna ye mituna mingi, kokanisaka ete bakozwa kati na maloba na ye ekweli moko oyo ekotinda bango ete bakangisa ye. Luka 11:37-54; Deteronome 14:22; Mika 6:8; 2 Ntango 24:20-25.

▪ Mpo na nini Yesu akweisi Bafalisai mpe balakisi na mibeko?

▪ Mikumba nini balakisi na mibeko bazali kotya yango likoló na bato?

▪ Ntango nini “kozalisa na mokili” ebandaki?