Mokapo 2

Akumisami liboso ya kobotama na ye

ANZELU Gabriele auti koloba na Marie ete akobota mwana mobali oyo akozala mokonzi mpo na libela. Kasi Marie atuni ye ete: “Ekozala boni awa eyebani ngai na mobali te?”

Gabriele azongiseli ye monoko ete: “Elimo santu ekoya likolo na yo. Mpe nguya na Oyo-Aleki-Likolo ekozipa yo. Yango wana mwana oyo akobotama akobyangama ete mosantu, Mwana na Nzambe.”

Mpo na kosalisa Marie ete andima, Gabriele abakisi ete: “Kanisa mpo na Elizabete, ndeko na yo, ye mobange. Bato banso balobaki ete ye akoki kozwa mwana te, kasi tala sikawa sanza motoba ekoki uta esili ye kozwa zemi. Mpamba te epai na Nzambe makambo nyonso makoki kosalema.”

Marie andimi maloba ya Gabriele mpe ayanoli ete: “Tala nazali moombo na Jehovah! Tika nyonso esalema mpo na ngai lokola elobi yo!”

Nsima mwa moke wana Gabriele azongi, Marie amibongisi mpo na kokende kotala Elizabete, oyo afandi elongo na Zakaria, mobali na ye, na mboka moko na ngomba ya Yudea. Lokola ye afandi na mboka Nazarete, akosala bongo mobembo moko molai oyo ekozwa ye mikolo misato soko mpe mikolo minei.

Marie akomi epai na Zakaria. Akoti na ndako mpe apesi bango mbote. Bobele na ntango yango, Elizabete atondi na elimo santu mpe alobi na Marie ete: “Yo opambwami kati na basi nyonso mpe tika ete mwana na libumu na yo apambwama. Oyo libaku nini kitoko mpo na ngai, ete mama na Nkolo na ngai ayei epai na ngai! Tala, wana eyoki ngai mongongo na yo, mwana kati na libumu na ngai apumbwe na esengo.”

Na botondi nyonso, Marie ayanoli ete: “Motema na ngai esanzoli Jehovah, molimo na ngai esepeli na Nzambe Mobikisi na ngai. Mpo ete atali kozanga na lokumu na moombo na ye. Mpamba te, longwa sikawa mabota nyonso bakotanga ngai mwasi na esengo. Mpo ete Oyo-na-Nguya-Nyonso asaleli ngai makambo minene.” Nzokande, atako azwi boboto mingi, Marie apesi lokumu nyonso epai na Nzambe. Alobi ete: “Nkombo na ye ezali mosantu. Mawa na ye ezali mpo na bango bakobangaka ye, mabota na mabota.”

Marie alandi kokumisa Nzambe na loyembo moko ya esakweli epemami, kolobaka ete: “Na loboko na ye asalaki makasi, apalanganisi bato bakanisaki makanisi na lolendo na mitema na bango, mpe alongoli bato na nguya na kiti na bokonzi, atomboli bato na lokumu te. Atondisi bato na nzala na biloko malamu, mpe azongisi bazwi na maboko mpamba. Asungi Yisraele mosaleli na ye, akanisi mawa na ye, lokola elobaki ye na bankoko na biso, na Abrahame mpe na libota na ye libela.“

Marie akofanda elongo na Elizabete sanza soko misato. Na ntembe te akosalisa mingi Elizabete na boumeli na mikolo ya nsuka ya zemi na ye. Ya solo, ezali likambo ya ntina ete basi oyo mibale na sembo oyo nyonso mibale bazwi zemi na likamwisi ya Nzambe, bakoka kofanda naino esika moko mpo na eleko wana ya esengo mingi ya bomoi na bango.

Osili komona lokumu lopesameli Yesu liboso ya kobotama na ye? Elizabete abengaki ye “Nkolo na ngai,” mpe mwana kati na libumu na ye apumbwaki na esengo ntango Marie akomaki. Nzokande, bato mosusu bakumisaki Marie te mpe bakumisaki te mwana oyo ye abotaki, lokola tokomona yango liboso. Luka 1:26-56.

▪ Gabriele alobi nini epai na Marie mpo na komonisa ye motindo nini akozwa zemi?

▪ Ndenge nini Yesu akumisami liboso ya kobotama na ye?

▪ Marie alobi nini kati na nzembo moko ya esakweli mpo na kokumisa Nzambe?

▪ Ntango boni Marie afandi epai na Elizabete? Mpo na nini ebongi mpenza ete azala esika moko na ye na boumeli ya eleko oyo?