Mokapo 29

Asali malamu na mokolo na sabata

OZALI pene na nsuka ya marsi mpe ebandeli ya aprili na mobu 31. Mwa basanza esili koleka uta ntango oyo Yesu, eutaki ye na Yudea mpo na kokende na Galilai, asololaki na mwasi Mosamaria penepene na libulu ya mai.

Nsima na koteya mingi kati na Galilai mobimba, sikawa Yesu azongi lisusu na Yudea, mpe kuna azali koteya kati na biyanganelo. Soki Biblia elobi mingi mpo na mosala na Yesu na Galilai, nzokande elobi se moke mpo na mosala oyo Yesu azali kokokisa na Yudea na boumeli ya mobembo oyo mpe na boumeli ya basanza oyo alekisaki kuna nsima na Pasika ya mobu 30. Emonani lokola ete, mosala na ye eyambamaki malamu te na Yudea lokola ezalaki bongo na Galilai.

Mosika te, Yesu akamati lisusu nzela mpo na kokende na Yelusaleme, engumba monene na Yudea, mpo na kokumisa Pasika ya mobu 31. Penepene na ekuke moko ya mboka, ebengami ete Ekuke na Bampate, ezali na etima ebengami Betesata, esika bato mingi ya maladi bazali kokende wana bakisa bakufeli miso mpe bibosono. Bazali kokanisa ete maladi na bango ekosila soki bakoti na etima ntango mai na yango maningani.

Ezali mokolo na sabata, mpe Yesu amoni pembeni ya etima mobali moko azali na bokono uta mibu 38. Lokola ayebi ete moto yango azali konyokwama na maladi na ye uta kala, Yesu atuni ye: “Ozali nde na mposa na kobika?”

Azongiseli Yesu eyano ete: “Nkolo, nazali na moto te oyo akoki kokitisa ngai na liziba, soki mai maningani; kasi wana ezali ngai kokoma, moto mosusu asili kokita liboso na ngai.”

Yesu alobi na ye ete: “Telema, kamata kitikwala na yo mpe tambola!” Ntango Yesu alobi boye, mobali yango akomi na nzoto kolongono mbala moko, akamati kitikwala na ye mpe abandi kotambola!

Kasi ntango Bayuda bamoni ye, balobi na ye: “Ezali sabata mpe ebongi na yo komema kitikwala oyo te.”

Nde ye azongiseli bango ete: “Ye oyo abikisi ngai alobi na ngai ete, ˈKamata kitikwala na yo mpe tambola.ˈ”

Batuni ye: “Nani moto alobi na yo ete, ˈKamata kitikwala na yo mpe tambola?ˈ” Yesu amibendi mpo bato baleki mingi, mpe moto oyo ye abikisi ayebi nkombo na ye te. Nsima ya mwa ntango bayei kokutana na tempelo, mpe mobali yango ayei koyeba ete moto abikisaki ye na bokono, ezali bongo Yesu.

Na bongo, akei kokutana na Bayuda mpo na koyebisa bango ete ezali Yesu nde moto abikisi ye na bokono. Ntango Bayuda bayoki bongo, bakei kokutana na Yesu. Mpo na nini? Bazali na mposa ya koyeba soki nguya na ye ya kokokisa misala malamu, ezali kouta epai na nani? Te; ezali mpo na komonisa ye ete asali mabe na ndenge akokisi misala malamu na mokolo na sabata. Mpe babandi nkutu kokanela ye! Luka 4:44; Yoane 5:1-16.

▪ Ntango boni esili koleka uta Yesu akitaki na mbala ya nsima na etuka ya Yudea?

▪ Mpo na nini bato mingi bazali kokende na etima ya Betesata?

▪ Ekamwiseli nini Yesu akokisi na etima yango, mpe Bayuda balobi nini mpo na yango?