Mokapo 25

Ayoki mawa mpo na moto na maba

WANA Yesu, elongo na bayekoli na ye minei, bazali kotambola na bingumba ya Galilai, nsango epalangani na etuka mobimba na ntina na makambo ya kokamwisa oyo ye azali kosala. Nsango yango ekomi kino na mboka moko epai kuna moto moko ya maba afandaka. Monganga Luka alobi sikisiki ete “moto yango azalaki na maba na nzoto mobimba.” Nzokande, soki maladi yango ekomi mpenza makasi, ekataka malembemalembe biteni mosusu ya nzoto. Moto yango ya maba azali bongo na ezalela moko ya mawa mingi.

Ntango Yesu akomi na mboka yango, moto ya maba ayei epai na ye. Engebene Mobeko na Nzambe, moto nyonso ya maba asengeli kokebisa bato na kongangaka ete: “Mbindo, mbindo!” mpo ete bato baya penepene na ye te ete bango lisusu bazwa maladi yango te. Moto ya maba afukami mpe atye elongi na ye na nse mpe abondeli Yesu ete: “Nkolo, soki olingi, okoki kopetola ngai.”

Moto yango amonisi ete azali na kondima makasi epai na Yesu. Nzokande mpo na maladi na ye, “moto nyonso asengeli koyokela ye mawa.” Ezalela na Yesu ekozala boni? Bongo yo mbele okokaki kozala na ezalela nini? Yesu ayoki mawa mingi, atomboli loboko mpe asimbi moto yango, alobi: “Nalingi ete opetwa.” Bobele na ntango yango maladi ya maba esili na nzoto na ye.

Okolinga kozala na mokonzi motindo boye, oyo akoyokelaka bato mawa? Ezalela na Yesu epai na moto oyo na maba epesi biso nzela ya kotya elikya ete akokokisa esakweli ya Biblia oyo na boumeli ya boyangeli na ye: “Akoyokela mosokemi mpe mobola mawa.” Ee, na ntango yango, Yesu akokokisa nyonso azali na yango na motema: kosalisa bato nyonso oyo bazali na mpasi.

Nsango na mosala na Yesu esilaki kopalangana kati na Bayuda liboso ya kobikisa moto na maba. Kasi Yesu akokisi esakweli moko ya Yisaya wana epekisi ye moto oyo ye abikisi ete: “Komeka koloba yango na moto te.” Apesi ye na nsima etinda oyo ete: “Kenda komilakisa epai na nganga-nzambe mpe pesa mbeka mpo na kopetolama na yo ndenge esengami na Moise, mpo na litatoli epai na bango.”

Kasi moto yango atondi mpenza na esengo na motindo boye ete akokoka te kobomba nsango na ekamwiseli yango. Akei mpe abandi kopanza nsango epai nyonso. Emonani mpenza ete alamusi litomba mpe mposa ya bato na ndenge boye ete, Yesu akoki kokota lisusu na mboka moko polele te. Abandi nde kofanda na bisika ya ye moko mpe oyo bato bafandaka wana te, kasi bibele bauti epai na epai bazali koya epai na ye mpo ete babikisama na bokono na bango. Luka 5:12-16; Malako 1:40-45; Matai 8:2-4; Levitike 13:45; 14:10-13; Nzembo 72:13; Yisaya 42:1, 2.

▪ Maladi ya maba esalaka nini na nzoto, mpe eloko nini moto nyonso ya maba asengelaki kosala wana ezalaki ye koleka?

▪ Eloko nini moto moko ya maba asengi epai na Yesu, mpe eyano ya Yesu eteyi biso nini?

▪ Ndenge nini moto yango atosi Yesu te ntango maladi na ye esili, mpe yango ebimisi makambo nini?