Mokapo 9

Baboti mpe bandeko na Yesu

NAZARETE, epai kuna Yesu azali kolekisa bomwana na ye, ezali engumba moke ya Galilai, kati na etuka na bangomba, mosika te na lobwaku kitoko ya Yizelele.

Wana Yesu azalaki na mbula soko mibale, baboti na ye, Yozefe mpe Marie, bakumbaki ye longwa na Ezipito kino na Nazarete. Emonani ete azali mwana bobele moko ya Marie mpo na sikawa, kasi mpo na ntango molai mingi te. Mosika te, Yakobo, Yozefe, Simona mpe Yuda, elongo na bana basi, bakobotama. Na nsuka, Yesu akozala na baleki motoba, mibali mpe basi.

Kasi Yesu azali na bandeko mosusu. Tosili koyeba ndeko na ye ya mobali Yoane, oyo abotamaki na mama mosusu mpe azali mokolo na ye, azali kofanda na bakilometele mwa mingi mosika, kuna na Yudea. Penepene, na Galilai, Salome, ndeko mwasi ya Marie azali kuna. Ye abalani na Zebedai. Bana na bango ya mibali Yakobo mpe Yoane bazali bandeko na Yesu babotami na mama mosusu. Toyebi te soki na bolenge na ye, Yesu alekisaki ntango mingi elongo na bana mibali oyo mibale, kasi, lokola tokomona yango, na nsima bakokoma baninga na ye ya motema.

Yozefe azali kosala makasi mpo na koleisa libota na ye oyo lizali koya monene. Azali mosali na mabaya. Azali kobokola Yesu lokola mwana na ye mpenza. Yango wana bato bazali koloba na ntina na Yesu ete azali “mwana na mosali na mabaya.“ Yozefe alakisi Yesu mosala oyo mpe azali koyekola malamu. Nsima na yango bato bakobenga ye “Mosali na mabaya.”

Bomoi ya libota ya Yozefe etambwisami na losambo ya Jeho-vah Nzambe. Kolandaka mobeko ya Nzambe, Yozefe mpe Marie bazali kopesa epai ya bana na bango mateya ya elimo ˈwana efandi bango na ndako, wana ezali bango kotambola na nzela, wana elali bango mpe wana elamuki bango.ˈ Na Nazarete, ezali na eyanganelo epai kuna Yozefe azali komema libota na ye mbala na mbala mpo na kosambela. Nzokande bazali kozwa esengo eleki monene ntango bazali kokende na tempelo ya Jehovah na Yelusaleme. Matai 13:55, 56; 27:56; Malako 15:40; 6:3; Deteronome 6:6-9.

▪ Yesu azalaki na baleki boni ya mibali mpe ya basi, mpe oyebi nkombo ya bamoko kati na bango?

▪ Pesa nkombo ya bandeko mibali mosusu misato ya Yesu oyo toyebi bango malamu mpe babotamaki na bamama mosusu?

▪ Mosala nini Yesu ayekolaki?

▪ Liteya nini eleki ntina, Yozefe apesi yango na libota na ye?