Mokapo 71

Bafalisai baboyi kondima

EBYANGAMI bango liboso na Bafalisai, baboti na mosengi oyo azaláki mokufeli miso bazali na mitema likoló. Bayebi ete ekateli ezwamaki ete moto nyonso oyo akondima Yesu, akobimisama na eyanganelo. Nzokande ekoki kozala mpenza mpasi mingi koleka, mingi mpenza mpo na libota ya bobola, na komona ete boyokani nyonso ekatani elongo na bato mosusu ya mboka. Yango wana baboti bazali kokeba.

Bafalisai batuni ete: “Oyo nde mwana na bino, oyo bolobi ete abotami na miso makufi? Boye ayebi komona sikawa na nzela nini?”

Baboti bandimi ete: “Toyebi ete oyo azali mwana na biso mpe ete abotami na miso makufi. Nde na nzela nini ayebi sikawa komona, biso toyebi yango te; toyebi mpe te soki nani afungoli miso na ye.” Na ntembe te mwana na bango ayebisaki bango lolenge makambo malekaki, kasi bazali kobomba maloba na bango: “Botuna ye moko. Asili kokoma mokolo. Akoloba malamu ye moko.”

Na bongo Bafalisai babengi moto yango mpe, mbala oyo, bameki kobangisa ye na koyebisaka ye ete bazwi bilembeteli nyonso ya mabe na ntina na Yesu. Balobi na ye ete: “Pesa Nzambe lokumu, biso toyebi ete moto oyo azali na masumu.”

Kozanga kotelemela efundeli na bango, alobi na bango ete: “Soki ye azali moto na masumu ngai nayebi te.” Nzokande abakisi lisusu ete: “Likambo moko liyebi ngai ete nazalaki mokufeli miso nde sikawa nazali komona.”

Komekaka kozwa mwa libunga kati na litatoli na ye, Bafalisai batuni ye lisusu: “Asalaki yo nini? Motindo nini afungoli yo miso?”

“Nasili koloba na bino liboso nde boyoki te. Mpo na nini bolingi koyoka yango lisusu? Bino mpe bolingi nde kozala bayekoli na ye?”

Eyano yango epesi nkanda na Bafalisai. Balobi na ye ete: “Yo nde moto ozali moyekoli na ye, biso tozali bayekoli na Moïse. Toyebi ete Nzambe asololáki na Moïse; kasi, mpo na moto oyo, biso toyebi te soki auti wapi.”

Na kokamwa nyonso, mobola oyo, mosengi na makabo angangi: “Likambo oyo ezali na kokamwa solo: ete boyebi te soko auti wapi, nzokande asili kofungola ngai miso.” Nini esengeli kokata likambo yango? Mobola oyo mosengi na makabo abimisi lilako moko endimami na bato nyonso: “Toyebi ete Nzambe akoyokaka bato na masumu te nde soko moto akotosaka Nzambe mpe akosalaka mokano na ye, Nzambe akoyokamela ye. Longwa na ebandeli, eyokami naino te ete moto afungoli miso na oyo abotami na miso makufi.” Na bongo likambo yango ekatami: “Soko moto oyo auti na Nzambe te, mbele akoki kosala eloko te.”

Maloba oyo ya solo mpe ya polele ekangisi minoko na Bafalisai. Koboyaka kondima solo, babandi kofinga moto yango: “Yo obotami kati na masumu solosolo, mpe yo ozali kolakisa biso?” Babwaki ye bongo na libanda, emonani ete babengani ye ete aya lisusu te na eyanganelo.

Koyokaka likambo oyo basali, Yesu akei kokutana na moto oyo ye abikisaki mpe alobi na ye ete: “Yo ozali kondima Mwana na moto?”

Mpo na koyanola, moto yango atuni ete: “Ye nani, Nkolo, ete nandima ye.”

Yesu ayanoli ye ete: “Ye oyo azali kosolola na yo ezali nde ye.”

Nokinoki moto yango angumbami liboso na Yesu mpe alobi ete: “Nandimeli ye, Nkolo.”

Na nsima Yesu alimboli na ye ete: “Nayei na mokili mpo na kosambisa ete baoyo bazali komona te bamona mpe baoyo bazali komona bakufa miso.”

Bafalisai mosusu oyo bayoki maloba wana, bazongisaki ete: “Biso mpe tokufi miso?” Soki bandimi ete bazali bakufi miso kati na makanisi, mbele bakozala na lilimbisi kati na botemeli na bango liboso na Yesu. Ezali yango nde Yesu ayebisi bango: “Soki bozalaki bakufi miso, mbele bozali na masumu te.” Nzokande, babateli na molende nyonso likanisi na bango oyo ete bazali bakufi miso te mpe ete bazali na mposa ya pole na elimo te. Na bongo Yesu alobi na bango boye: “Nde awa ezali bino koloba ete: ‘Tozali komona.’ Bongo lisumu na bino eumeli.” Yoane 9:19-41.

▪ Mpo na nini baboti na mosengi oyo liboso azalaki mokufeli miso bazali na mitema likoló ntango babyangami liboso na Bafalisai, mpe mpo na yango, biyano nini ya bokengi bapesi?

▪ Ndenge nini Bafalisai basali mpo na kobangisa moto oyo afungwamaki miso?

▪ Liloba nini ya sembo mobali wana alobi yango oyo epesi Bafalisai nkanda?

▪ Mpo na nini Bafalisai bazali na lilimbisi soki moke te mpo na kotemela Yesu?