Mokapo 12

Batisimo na Yesu

YOANE azali kosakola uta pene na sanza motoba. Yesu, ye oyo akomi sikawa na mibu ntuku misato, ayei epai na ye na Yordani. Mpo na nini? Ayei bobele kotala ye mpo na koyeba ndenge nini mosala na ye ezali kotambola? Te. Ayei kosenga ete abatisa ye.

Nokinoki Yoane aboi. Alobi na ye ete: “Ngai nazali na mposa ete nabatisama na yo nde yo oyei epai na ngai?“ Yoane ayebi ete ndeko na ye Yesu azali moto lokola bato mosusu te; azali Mwana na Nzambe. Omikundola lisusu ete, wana Marie azalaki na zemi ya Yesu, akomaki epai na Elizabete, Yoane apumbwaki na esengo kati na libumu ya mama na ye. Na ntembe te, Elizabete, mama na Yoane, boye ayebisaki ye yango na nsima. Ayebisaki mpe ye na ntina na anzelu oyo asakolaki kobotama ya Yesu, mpe na ntina na baanzelu bautaki likolo mpe babimelaki babateli na mpate na butu oyo ye abotamaki.

Tala mpo na nini Yesu azali mopaya te mpo na Yoane. Mpe ye moko ayebi malamu ete batisimo na ye ezali mpo na Yesu te. Yango ebongisami mpo na baoyo bazali kobongola motema na masumu na bango; nzokande Yesu azali na lisumu te. Kasi atako Yoane azali koboya, Yesu alobi ete: “Tika ezala boye sikawa. Mpamba te ebongi na biso ete tokokisa makambo nyonso na boyengebene.”

Mpo na nini elongobani ete Yesu abatisama? Mpamba te mpo na ye batisimo elimboli te ete abongoli motema na masumu na ye kasi elimboli ete amilakisi epai ya Tata na ye mpo na kosala mokano na ye. Kino wana Yesu azalaki bobele mosali na mabaya; kasi ntango ekoki sikawa ete abanda mosala mpo na yango Nzambe atindaki ye awa na mabele. Okanisi ete Yoane azali komizela na likambo moko ya kokamwa ntango azali kobatisa Yesu?

Na nsima, ye alobaki boye: “Nde ye oyo atindi ngai kobatisa na mai, ye wana alobi na ngai ete, Ye oyo okomona elimo kokita mpe koumela likolo na ye, ye wana azali mobatisi na elimo santu.” Na yango, Yoane azali komizela ete elimo ya Nzambe esopama likolo na moko na baoyo bakobatisama epai na ye. Ekoki kozala ete akamwi mpenza te ntango ˈelimo ya Nzambe ekiti likolo na Yesu lokola ebengaˈ wana ezali ye kobima na mai.

Kasi likambo mosusu lisalemi na ntango Yesu azwi batisimo. ˈMakolo mafungwameli ye.ˈ Yango elimboli nini? Ekoki kozala mpenza ete, na ntango azwi batisimo, makambo nyonso na bomoi na ye lokola ekelamu ya elimo kuna na likolo ekundolami epai na ye. Na yango, sikawa Yesu abandi mpenza kokanisa lisusu malamumalamu bomoi na ye ya mwana na elimo na Jehovah Nzambe, bakisa mpe makambo nyonso oyo Nzambe alobaki na ye kati na likolo na boumeli ya bomoi na ye lokola ekelamu ya elimo.

Lisusu, na ntango ya batisimo na ye, mongongo moko mouti na likolo mosakoli boye ete: “Oyo Mwana na ngai na bolingo, nasepeli na ye mingi.” Mongongo yango mozali mongongo ya nani? Oyo ya Yesu? Te! Ezali nde mongongo ya Nzambe. Emonani polele ete Yesu azali Mwana ya Nzambe, kasi azali Nzambe ye moko te, lokola bato mosusu bakolobaka yango.

Nzokande, Yesu azali mwana na Nzambe awa na mabele, lokola moto ya liboso, Adam azalaki mpe mwana na Nzambe. Moyekoli Luka, nsima na kolobela batisimo na Yesu, ayebisi sikisiki ete: “Yesu ye mpenza azalaki na mbula soko ntuku misato wana ebandaki ye mosala na ye. Azalaki lokola bato babanzaki, mwana na Yozefe, mwana na Eli, . . . mwana na Davidi . . . mwana na Abrahame, . . . mwana na Noa, . . . mwana na Adam, mwana na Nzambe.”

Adam azalaki moto, “mwana” na “Nzambe”; Yesu mpe azali moto, mwana na Nzambe. Yesu azali moto aleki bato nyonso kati na bileko nyonso; ntembe mpo na yango ezali te soki totaleli bomoi na ye. Nzokande, na batisimo na ye Yesu akoti na boyokani na sika elongo na Nzambe: akomi mpe Mwana na ye na elimo. Sikawa, tokoki koloba ete Nzambe abandi kobenga ye lisusu na likolo, na kobendaka ye na kobanda bomoi mosusu ya sika oyo ekomema ye na kotika mpo na libela bomoi na ye lokola moto, kopesaka yango mbeka mpo na libota na bato oyo likweisami. Matai 3:13-17; Luka 3:21-38; 1:34-36, 44; 2:10-14; Yoane 1:32-34; Baebele 10:5-9.

▪ Mpo na nini Yesu azali mopaya te mpo na Yoane?

▪ Mpo ete Yesu asali lisumu te, mpo na nini abatisami?

▪ Na kotalela makambo oyo Yoane ayebi na ntina na Yesu, mpo na nini tokoki kokanisa ete boye akamwi te wana emoni ye elimo ya Nzambe koya likolo na Yesu?