Mokapo 78

Bokengelaka!

NSIMA na kokebisa bato mpo na bilulela mpe kokebisa bayekoli na ye ete basengeli kopesa motuya mingi te na biloko na mosuni, Yesu apesi elendiseli oyo: “Banga te, etonga moke, mpo ete Tata na bino asepeli kopesa bino bokonzi.” Amonisi awa ete motuya moke mpenza na bato (144 000, lokola yango eyebisamaki sikisiki na nsima) bakosangana na Bokonzi na likoló. Ntalo eleki monene na bato oyo bakozwa bomoi na seko bakozala bafandi na mabelé na Bokonzi yango.

“Bokonzi”! Oyo nde likabo kitoko! Kolendisaka bayekoli na ye ete baluka noki kozwa likabo yango kitoko, Yesu alobi na bango ete: “Botekisa biloko bizali na bino, mpe bopesa makabo na mawa.” Ee, basengeli kosalela biloko oyo bazali na yango mpo na matomba ya elimo ya bazalani na bango, mpe na bongo bakozwa “biloko na motuya oyo bikobebaka te kuna na likoló.”

Na nsima Yesu alendisi bayekoli na ye na kosenzela mpo na bozongi na ye. Alobi ete: “Tika loketo na bino lokangama, mpe mwinda na bino epela, bino mpe bozala lokola bato bazali kozela nkolo na bango mpenza, wana ekozonga ye na bolongani, ete ekoya ye mpe ekobeta ye, bafungola mpo na ye nokinoki. Esengo na baombo yango baoyo nkolo na bango akoya mpe akokuta bango kokengela. Nalobi na bino solo ete akomikanga loketo na ye, mpe akofandisa bango na mesa, mpe akoya kosalela bango.”

Kati na lisese wana, basaleli bamonisi ete bazali kokengela mpo na koyamba nkolo na bango na bozongi na ye mpamba te batomboli nzambala na bango milai oyo bakangi yango na nse na mokaba na bango, mpe bazali kokoba kosala misala na bango na butu mpenza, na lisalisi ya miinda mitondi na mafuta. Yesu alimboli: ‘Soki nkolo akomi na katikati na butu to na nsoso na yambo, mpe soki akuti bango kosala bongo, esengo na bango mpenza!’

Nkolo afuti basaleli na ye na lolenge moko ya kokamwisa: afandisi bango na mesa mpe abandi kosalela bango, kotalelaka bango lokola baombo te, kasi lokola baninga ya sembo. Oyo nde lifuti kitoko mpo ete bakobaki kosala mosala butu mobimba mpo na nkolo na bango na kozelaka bozongi na ye! Yesu asukisi: “Ekoki na bino mpe kokengela, mpo ete Mwana na moto akoya na ntango ekokanisa bino te.”

Na bongo Petelo atuni motuna: “Nkolo, olobi lisese oyo mpo na biso to mpo na bato nyonso?”

Na esika ete ayanola mbala moko, Yesu asaleli lisese mosusu. “Nani azali kapita na sembo mpe na mayele oyo nkolo na ye akotya ye liboso na bato na ye, ete apesa bango pɔ́sɔ na bango na elaka na yango? Esengo na moombo yango, oyo nkolo na ye akokuta ye azali kosala bongo wana ekoya ye. Nalobi na bino solo ete akotya ye likolo na biloko nyonso bizali na ye.”

“Nkolo” oyo alobelami awa ezali mpenza Yesu Klisto. “Kapita” ezali “etonga moke” ya bayekoli na ye bango nyonso. Liloba “bato na ye” elakisi mpe ba 144 000 wana baoyo bakozwa Bokonzi na likoló, kasi na komonisaka mpenza misala oyo bazali kokokisa moto na moto. “Biloko nyonso” to “bozwi” oyo kapita na sembo atyami likoló na yango ezali bongo matomba na bokonzi ya nkolo awa na mabelé, kati na yango bayekoli na ye oyo bazali na elikya ya kofanda na mabelé na nse na Bokonzi na ye.

Mwa mosika kati na lisese yango, Yesu amonisi ete basangani nyonso na kelasi na kapita, to kelasi na moombo, bakotikala sembo te. Alimboli: “Nde soko moombo yango alobi na motema na ye ete: ‘Nkolo na ngai azali koumela mpo na koya,’ mpe abandi kobeta basali babali na basali basi, mpe kolya na komela na kolangwa, nkolo na moombo yango akoya na mokolo ekoyeba ye te . . . mpe akokatela ye etumbu eleki makasi.”

Yesu amonisi ete koya na ye ‘epelisi mɔ́to’ kati na Bayuda, mpamba te bamoko bazali kondima mateya na ye nzokande bamosusu bazali kotyola yango. Tala eleki sika mibu misato uta Yesu azwaki batisimo kati na mai. Kasi sikawa batisimo na ye kati na kufa ekomi kobelema na nsuka na yango, mpe tala oyo azali kooka: “Natungisami na motema kino ekokoka yango.”

Nsima na kopesa batoli oyo epai na bayekoli na ye, Yesu abaluki lisusu epai na bibele. Ayoki mawa mpo na motó makasi na bango, mpamba te atako bilembo bimonani polele, bazali kondimela ye te, nzokande yango ezali na ntina monene. Alobi na bango ete: “Soko bokomona lipata kobima epai na kolimwa na moi, bokoloba nokinoki ete: ‘Mbula ekoya,’ mpe ekozala bongo. Soko bokomona mopepe elongwi na ngele, bokoloba ete: ‘Moi ekongala,’ mpe ekozala bongo. Bino bakosi! Boyebi kolimbola motindo na mokili mpe na likoló, nde boni bozali kolimbola makambo na ntango oyo te?” Luka 12:32-59.

▪ “Etonga moke” ezali na bato boni kati na yango, mpe bakozwa nini?

▪ Ndenge nini Yesu amonisi epai na bayekoli na ye ntina ya kokengela?

▪ Kati na lisese na Yesu, “nkolo,” “kapita,” “basali na ye,” “bozwi,” elimboli nini mokomoko?