Mokapo 21

Kati na eyanganelo na mboka na ye

TOKANISA naino yikiyiki oyo ekotaki na Nazarete ntango Yesu azongi epai na ye. Atikaki mboka yango esili koleka mbula mobimba na mwa basanza mpo ete akende kozwa batisimo epai ya Yoane. Kino ntango yango, Yesu ayebanaki bobele lokola mosali na mabaya. Kasi, tala sikawa asili kozwa lokumu ya moto oyo azali kosala bikamwiseli. Bafandi ya Nazarete balingi mpenza ete ye asala makamwisi kati na bango.

Mposa na bango eyei lisusu makasi ntango bamoni Yesu, lokola momeseno, akei na eyanganelo. Na kati ya likita, atelemi mpo atanga, mpe bapesi ye mokanda na mosakoli Yisaya. Amoni eteni oyo kati na yango elobelami mpo na moto moko oyo Jehovah apakoli ye na elimo na ye, lelo oyo boye, eteni yango ezali kati na Yisaya mokapo 61 na Biblia oyo tozali na yango.

Nsima wana atangi ete moto yango akosakola kosikolama epai na bakangami, epai na bakufi miso akosala ete bamona lisusu, mpe akosakola mbula na boboto na Jehovah, Yesu azongisi mokanda epai na mosaleli mpe afandi. Bato nyonso babandi kotala ye. Ekoki kozala ete alobi mwa mingi epai na bato, mpe asukisi na polele nyonso ete: “Lelo oyo, liloba oyo ya Makomami oyo bouti koyoka ekokani.”

Bayoki na ye bakamwe na “maloba na ye matondi na elengi“ mpe babandi kotunana: “Oyo mwana na Yozefe te?” Kasi lokola ayebi ete balingi komona ye asala bikamwiseli, Yesu abakisi: “Na solo bokoloba na ngai lisese oyo ete, ˈMonganga, bikisa nzoto na yo mpenza! Makambo nyonso mayoki biso mabimaki kuna na Kapernaume, sala bongo mpe awa na mboka na yo!ˈ” Na yango bato na mboka na kala na Yesu bamoni ete esengelaki na Yesu ete abanda kosala bikamwiseli ya kobikisa bato na mboka na ye, mpo ete bango bazala bato ya liboso ya kozwela yango litomba. Bamoni lokola ete Yesu asaleli bango nko.

Lokola ayebi makanisi na bango, Yesu akundweli bango makambo mosusu maleka kala mpe matali bango: Ezalaki na bakufeli-mibali ebele kati na Yisraele na mikolo ya Elia, kasi Elia atindamaki ata epai na moko te kati na bango. Akendaki nde epai na mwasi-mokufeli-mobali, Moyisraele te, na mokili na Sidona, mpe abikisaki bomoi na ye na ekamwiseli. Bobele bongo, bato na maba bazalaki mingi na mikolo ya Elize, kasi ye apetolaki bobele Namana moto na Siria.

Makambo nyonso oyo ya kala makweisi bato bazali wana na eyanganelo, mpamba te, mamonisi polele ete batondi na moimi mpe bazangi kondima. Nkanda ezwi bango. Bayuda batelemi mpe bapusi Yesu kino libanda ya mboka. Bameki kokweisa ye na lobwaku longwa na ngomba likolo na yango mboka na bango etongami. Kasi Yesu aleki na kati na bango, mpe akei na ye. Luka 4:16-30; 1 Mikonzi 17:8-16; 2 Mikonzi 5:8-14.

▪ Mpo na nini yikiyiki ekoti na Nazarete?

▪ Bayuda bakanisi nini mpo na maloba na Yesu, kasi eloko nini etumoli nkanda na bango?

▪ Bato yango bameki kosalela Yesu eloko nini?