Mokapo 36

Kondima monene ya mokonzi na basoda

NTANGO Yesu asali lisolo na ye likolo na ngomba, wana asili kokokisa pene na katikati ya mosala na ye. Yango elingi koloba ete etikali na ye bobele mbula moko na sanza libwa mpo ete asilisa mosala na ye awa na mabele.

Yesu akoti sikawa kati na engumba ya Kapernaume, epai atyaki centre ya mosala na ye. Na ntango yango mikolo ya Bayuda bayei mpo na kosenga ye lisalisi. Batindami na komanda moko ya basoda Baloma, ye Mopakano to moto oyo azali Moyuda te.

Moto yango azali na mosali moko oyo ye alingaka mingi, mpe ye azali pene na kokufa na ntina na maladi makasi oyo ezwaki ye, mpe alingi ete Yesu abikisa ye. Bayuda babondeli Yesu makasi mpo ete asalisa komanda yango; balobi ete: “Abongi ete osalela ye bongo, mpo ete alingi libota na biso, mpe atongeli biso eyanganelo.”

Kozanga kokakatana Yesu alandi bango. Nzokande, lokola ezali bango kobelema penepene na ndako, komanda atindi baninga na ye kolobela ye ete: “Omitungisa te, Nkolo, mpo ete nabongi te ete okota na ndako na ngai; yango wana mpe nakanisaki ete nabongi kokomela yo te.”

Komanda oyo azali ntango nyonso na momeseno ya kopesa bato mosusu mitindo amonisaki solo elembo monene ya komikitisa. Kasi ekoki kozala lisusu ete akanisaki na ntina na Yesu, lokola ayebaki motindo oyo epekisaki Bayuda ete bazala na boyokani te elongo na Bapakano to bato oyo bazali Bayuda te. Petelo ye moko alobaki ete: “Bino boyebi ete ekoki na mobali Moyuda kosangana soko kobelema na bato na libota mosusu te.”

Koboyaka mbala mosusu ete Yesu abuka mobeko yango, mpe kozwa mpasi na nsima, komanda atindaki baninga na ye mpo na kosenga ye ete: “Loba bobele koloba, mpe mosali na ngai akobika. Mpo ete ngai mpe nazali na basoda nsima na ngai. Nakoloba na oyo ete: ˈKenda!ˈ mpe akokenda, mpe na mosusu ete, ˈYaka!ˈ mpe akoya, mpe na moombo na ngai ete, ˈSala boye!ˈ mpe akosala bongo.”

Ntango Yesu ayoki bongo, akamwi mingi mpenza. Ayanoli ete: “Nalobi na bino solo ete nakuti kondima monene boye na kati na Yisraele te.” Nsima na kobikisa mosali ya komanda, Yesu asaleli libaku yango mpo na koyebisa ete bato na mabota mosusu oyo bazali na kondima bakozwa mapamboli matyolami na Bayuda bazangi kondima.

Yesu alobi ete: “Mingi bakolongwa na epai na ebimelo na ntango mpe epai na elimwelo na ntango mpe bakofanda kolya esika moko na Abrahame mpe na Yisaka mpe na Yakobo na bokonzi ya likolo. Nde bana na bokonzi bakobwakama libanda kino molili tuu, wana kolela ezali mpe kokatakata na mino.”

“Bana na bokonzi . . . baoyo babwakami na libanda kino molili tuu” ezali Bayuda ya mosuni baoyo baboyi kondima likabo oyo lipesami liboso mpenza epai na bango, elingi koloba koyangela esika moko na Klisto. Abrahame, Yisaka mpe Yakobo bazali komonisa Bokonzi ya Nzambe. Na yango, Yesu asakoli ete Bapakano bakondimama na mesa ya likolo, “kati na bokonzi ya makolo.” Luka 7:1-10; Matai 8:5-13; Misala 10:28.

▪ Mpo na nini Bayuda babondeli Yesu ete asunga komanda moko mopakano?

▪ Ekoki kozala mpo na bantina nini komanda asengi na Yesu ete akota na ndako na ye te?

▪ Yesu alingi koloba nini na maloba na ye ya nsuka?