Mokapo 40

Koyokela baninga mawa

MBALA mosusu Yesu azali naino na Naïne, epai oyo auti kosekwisa mwana mobali ya mwasi moko mokufeli-mobali. Mofalisai moko abengami Simona, azali na mposa ya komona penepene moto oyo azali kosala bikamwiseli minene boye. Yango wana abengi Yesu ete aya kolya na ye elongo.

Lokola emoni ye ete bokutani yango ekozala libaku ya kosakola epai na baoyo ye akokuta kuna, Yesu andimi libyangami wana, ndenge andimaki libyangami ya bakongoli na mpako mpe basumuki. Nzokande, wana ekoti ye na ndako ya Simona, Yesu ayambami mpenza te na ndenge oyo mopaya asengeli koyambama lokola momeseno.

Soko moto alati mapapa, atamboli ntáka molai na makolo na banzela etondi na putulu, makolo makokóma móto mpe na bosoto; yango wana moyambi nyonso na bapaya akolakisa ete ayebi koyamba bapaya na kosukola na mai ya mpio makolo ya bapaya bayei epai na ye. Kasi, wana Yesu akómi, moto moko asukoli makolo na ye te. Moto moko ayei kopesa ye lipwepwe te mpo na kotombela ye boyei malamu, oyo ezali elembo ya liboso ya limemya. Epai mosusu, moto moko te asopeli ye mafuta na motó ndenge momeseno ezali kosenga mpo na koyamba mopaya.

Wana ezali bango kolya, ntango babyangami nyonso basili kofanda na mesa, mwasi moko abyangamaki te, akoti na malembe nyonso kati na ndako. Ayebani na kati na mboka ete azali na etamboli ya mbindo. Na ntembe te ayokaki liboso mateya na Yesu, lokola libyangami na ye oyo apesaki epai na ‘baoyo nyonso bazali na bozito, ete baya epai na ye mpo alendisa bango.’ Lokola makambo mamonaki ye mpe mayokaki ye masimbaki motema na ye, mwasi oyo ayei bongo epai na Yesu.

Aleki nsima na Yesu, wana efandi ye na mesa, mpe afukami na makolo na ye. Lokola apolisi yango na mpisoli na ye, apangusi yango na nsuki na ye. Bongo asopi molangi ya mafuta na nsolo kitoko likoló na yango mpe azali kopwepwa yango. Kasi Simona asepeli na likambo yango te mpe amilobi: “Mpo na moto oyo, soko azalaki mosakoli, mbele ayebi soko mwasi oyo azali kosimba ye azali motindo nini, mpo ete azali mwasi na masumu.”

Lokola ayebi likanisi na ye, Yesu alobeli ye boye: “Simona, nazali na likambo moko nalingi kolobana na yo.”

Simona ayanoli ete: “Loba na yo Molakisi.”

“Modefisi moko azalaki na bato na nyongo mibale. Moko na bango asengelaki kozongisa denali nkama mitano, mosusu denali ntuku mitano. Bazalaki na eloko na kofuta te, boye alimbisaki bango nyonso mibale. Na bongo, na kati na bango, moto nani akoleka kolinga ye?”

Simona ayanoli: “Nabanzi ete ye oyo alimbisami nyongo eleki monene.” Ayanoli bongo kokanisáká ete motuna yango etali makambo mosusu.

Yesu andimi eyano na ye, alobi: “Okati ekateli ya sembo.” Na nsima, kotalaka epai na mwasi, alobi lisusu na Simona: “Omoni mwasi oyo? Nakoti na ndako na yo nde opesi ngai mai mpo na makolo te, ye nde apolisi makolo na ngai na mpisoli mpe akombi yango na nsuki na ye. Opesi ngai lipwepwe te, nde longwa na kokota na ngai ye atiki kopwepwa makolo na ngai te. Opakoli motó na ngai na mafuta te, nde ye apakoli makolo na ngai na mafuta na malasi.”

Mwasi yango amonisi bongo ete ayoki mpenza mawa mpo na misala na ye ya kala ya mbindo. Yesu ayei kosukisa na maloba oyo: “Yango wana nalobi na yo ete, masumu na ye atako mazali mingi malimbisami, mpo ete azali na bolingo mingi. Nde ye oyo alimbisami moke azali na bolingo moke.”

Yesu apesi nzela na bosoto te mpe asepeli na yango soko moke te. Nzokande, likambo yango emonisi ete Yesu ayebi mpasi ya baninga mpe azali na mawa mpo na bato oyo basili kosala mabunga kati na bomoi na bango, kasi bamonisi ete babongoli motema mpe babelemi pene na ye mpo ete babondisama. Kopesaka bongo elendiseli ya solo epai ya mwasi oyo, Yesu alobi na ye ete: “Masumu na yo malimbisami. . . . kondima na yo esili kobikisa yo; kenda na yo na kimya.” Luka 7:36-50; Matai 11:28-30.

▪ Ndenge nini Yesu ayambami epai ya Simona?

▪ Nani akei kokutana na Yesu, mpe mpo na nini alukaki ye?

▪ Elakiseli nini Yesu apesi, mpe asaleli yango mpo na koteya nini?