Mokapo 20

Likamwisi ya mibale na Kana

NTANGO Yesu azongi na etuka na ye, nsima na mobembo molai oyo asali na Yudea, ezali te mpo ete apema. Abandi nde mosala monene kati na Galilai, etuka epai ye abokwamaki. Kasi na esika ete bafanda esika moko na ye, bayekoli na ye bazongeli mabota na bango mpe babandi lisusu kosala misala na bango oyo batikaki.

Nsango nini Yesu abandi kosakola? Yango oyo boye: “Bokonzi na Nzambe ebelemi. Bobongola mitema mpe bondima nsango malamu.” Matomba nini mamonani epai na bato na Galilai? Bazali kondima Yesu mpe bango nyonso bazali kokumisa ye. Nzokande, ezali mpenzampenza te mpo na mateya na ye, kasi mpo ete mingi kati na bango bazalaki na Yelusaleme na ntango ya Pasika, mwa basanza liboso, mpe bamonaki bilembo minene oyo Yesu asalaki kuna.

Emonani lokola ete mosala monene ya Yesu kati na Galilai ebandi na Kana. Omikundola lisusu: Esili koleka mwa ntango, ezali kati na engumba oyo Yesu abongolaki mai makomaki vinyo na elambo ya libala, wana eutaki ye sika na Yudea. Na boumeli ya mikolo oyo Yesu ayei kolekisa na mbala ya mibale na Kana, mwana ya mosali moko monene epai na Herode Antipas azali na maladi makasi. Ntango moto yango ayoki ete Yesu alongwe na Yudea mpe asili kokoma na Kana, ye asali mobembo molai longwa Kapernaume, engumba epai azali kofanda, mpo na koya komona ye. Na mpasi nyonso ezalaki na ye, abondeli Yesu ete: ˈOya noki naino mwana na ngai akufi te.ˈ

Yesu ayanoli ye ete: ˈKenda, mwana na yo asili kobika.ˈ Moto yango andimeli ye mpe abandi kozonga na nzela na ye molai; akutani na basali na ye oyo bazali koya epai na ye mpe bazali na motema moto mpo na koyebisa ye ete makambo manso mazali malamu, mpamba te mwana na ye asili kobika. Nde ye atuni bango: ˈAkomaki malamu uta ntango nini?ˈ

Basali bazongiseli ye ete: ˈUta lobi na ngonga na liboso nsima na midi.ˈ

Moto yango asosoli ete ezali bobele na ngonga oyo Yesu alobaki na ye: ˈKenda, mwana na yo asili kobika!ˈ Nsima na yango, moto yango mpe libota na ye mobimba bakomi bayekoli ya Klisto.

Kana ezali bongo mboka oyo ezwi mabaku malamu mingi. Yesu asali makamwisi mibale kuna, wana euti ye na Yudea na mobembo ya liboso mpe na mobembo na mibale. Ya solo, ezali bobele makamwisi mibale te oyo ye asali uta abandi mosala na ye, kasi makamwisi yango mazali na ntina monene, mpamba te mazali komonisa ete ye azongi na Galilai.

Yesu abandi kokende sikawa na Nazarete, mboka epai kuna libota na ye efandi. Likambo nini ekokomela ye kuna? Yoane 4:43-54; Malako 1:14, 15; Luka 4:14, 15.

▪ Wana ezongi Yesu na Galilai, bayekoli na ye basali nini, mpe bato bayambi ye ndenge nini?

▪ Likamwisi nini Yesu asali mpe bato bazwi litomba na likamwisi yango basali nini?

▪ Ndenge nini mboka ya Kana ezwi libaku malamu epai na Yesu?