Mokapo 54

“Limpa ya solo liuti na likolo”

YESU asalaki misala mingi na mokolo mouti koleka. Aleisaki bankoto na bato na ekamwiseli mpe na nsima alimwaki ntango bibele balingaki kozalisa ye mokonzi. Na nsima, na butu atambolaki likolo na mai matomboki, na libeke na Galilai. Asungaki Petelo, oyo abandaki kozinda ntango amekaki kotambola likolo na mai matombokisami na mopepe makasi. Na nsuka, alembisaki kotomboka na mai, mpe abikisaki bongo bayekoli na ye mpo ete bazinda te.

Sikawa, bato oyo Yesu aleisaki na ekamwiseli, na nord-est na libeke na Galilai, bayei komona ye lisusu pembeni na Kaper-naume mpe batuni ye ete: “Ntango nini okomi awa?” Yesu apameli bango, alobi na bango ete bazali koluka ye na elikya ete baleisama lisusu ofele. Alendisi bango na kosala, mpo na bilei oyo bikobeba te, kasi mpo na bilei oyo bikoumela mpo na bomoi na seko. Bongo, balobani na ye batuni ye ete: “Tosala nini mpo na kokokisa misala na Nzambe?”

Yesu atangi se mosala moko, kasi ezali na motuya monene mpenza. Alimboli ete: “Mosala na Nzambe ezali boye ete bondima motindami na Ye.”

Kasi, ata bikamwiseli nyonso oyo Yesu asali, bibele bazali na kondima epai na ye te. Likambo na kokamwa, ata nsima na misala nyonso na nguya oyo auti kosala, ayoki bango kotuna ete: “Okosala elembo nini ete tomona mpe tondima yo? Ozali kosala nini? Bankoko na biso balyaki mana kati na esobe lokola esili kokomama ete, ˈApesaki bango mampa longwa na Likolo ete balya.ˈ”

Lokola basengi elembo, Yesu amonisi polele Eutelo ya bilei wana ya ekamwiseli, kolobaka ete: “Moïse apesaki bino limpa longwa na Likolo te kasi Tata na ngai azali kopesa bino limpa ya solo euti na likolo. Limpa na Nzambe ezali yango oyo ekiti longwa na likolo mpe oyo ekopesa bomoi na mokili.”

Bongo balobi na ye ete: “Nkolo, pesa biso limpa oyo ntango nyonso.”

Mpe Yesu ayanoli: “Ngai nazali limpa na bomoi, ye oyo akoya epai na ngai, akoyoka nzala te mpe ye oyo akondima ngai akoyoka lisusu mposa na mai te. Kasi nayebisi bino ete bosili komona ngai mpe ata bongo bozali kondima ngai te. Nyonso ekopesa Tata epai na ngai, ekoya na ngai mpe ye oyo akoya epai na ngai, nakobwaka ye libanda soko moke te, mpo ete nasili kokita longwa na Likolo ete nasala mokano na ngai moko te, kasi mokano na Motindi na ngai. Mokano na Motindi na ngai ezali boye ete, nabungisa moko te kati na bango basili ye kopesa ngai, kasi ete nasekwisa bango na mokolo na nsuka. Mpo ete oyo ezali mokano na Tata na ngai: ete moto na moto oyo akomona Mwana mpe akondima ye azwa bomoi na seko.”

Na maloba oyo Bayuda babandi bongo koimaima mpo na Yesu, mpamba te alobi: “Ngai nazali limpa oyo euti na likolo.” Lokola bayebi baboti na ye, balobeli ye bobele ndenge bafandi na Nazarete balobelaki ye liboso ete: “Oyo Yesu, mwana na Yozefe te? Toyebi tata na ye mpe mama na ye te? Ndenge nini akoki koloba ete auti na likolo?”

Kasi Yesu ayanoli bango ete: “Boimaima kati na bino te. Moto akoki koya epai na ngai te bobele soko Tata, Motindi na ngai, akobenda ye, mpe nakosekwisa ye na mokolo na nsuka. Ekomami kati na basakoli ete: ˈBango nyonso bakolakisama na Jehovah.ˈ Boye moto na moto oyo ayoki epai na Tata mpe ayekoli, akoya epai na ngai. Moto amoni Tata te, bobele ye oyo auti na Nzambe; ye asili komona Tata. Solosolo nazali koloba na bino ete, ye oyo akondima ngai azali na bomoi na seko.”

Yesu azongeli lisusu maloba oyo abimisaki na ebandeli: “Ngai nazali limpa na bomoi. Bankoko na bino balyaki mana kati na lisobe mpe bakufaki. Oyo ezali limpa oyo ekiti longwa na Likolo ete moto nani akolya yango akufa te. Ngai nazali limpa na bomoi oyo ekiti longwa na likolo. Soko moto nani akolya limpa oyo, akozala na bomoi libela.” Na yango, soki bato bandimeli Yesu, motindami na Nzambe, bakoki kozwa bomoi ya seko; oyo bakoki kozwa yango te na kolyaka mana to limpa mosusu.

Emonani lokola ete, lisolo oyo na lolenge na ntembe ebandaki mwa ntango nsima wana bibele oyo balukaki Yesu bamonaki ye lisusu, pene na Kapernaume. Ekolandana lisusu makasi wana Yesu akoteya kati na eyanganelo na Kapernaume. Yoane 6:25-51, 59; Nzembo 78:24; Yisaya 54:13; Matai 13:55-57.

▪ Likambo nini esalemaki liboso ete Yesu asolola na ntina na limpa ya likolo?

▪ Na kotalela ekamwiseli oyo Yesu auti kosala, mpo na nini ezali likambo na mayele te ete bibele basenga elembo?

▪ Ntango Yesu alobi ete ye azali limpa ya solo oyo ekiti longwa na likolo, mpo na nini Bayuda bazali koimaima na ntina na ye?

▪ Lisolo na ntina na limpa oyo ekiti longwa na likolo, esalemi epai wapi?