Mokapo 75

Liziba na esengo

LOKOLA asalaki yango liboso, na boumeli ya mosala na ye na Galilai, Yesu azali sikawa kosala bikamwiseli na Yudea. Na ndakisa, abimisi kati na moto moko elimu mabe oyo azalaki kopekisa ye ete aloba te. Bato bakamwi, kasi bamosusu bazali kotongo Yesu lokola esalaki yango bato na Galilai ete: “Azali kobimisa bilimu mabe na nguya na Belezebula, mokonzi na bilimu mabe.” Bamosusu balingi ete Yesu apesa bango elembeteli mosusu mpo na komonisa solo ete ye azali Masiya, mpe baluki komeka ye na kosengaka ye elembo euti na likoló.

Koyebaka makanisi na bango, Yesu ayanoli na banguna na ye Bayuda lokola ayanolaki epai na baoyo ya Galilai. Amonisi bango ete bokonzi nyonso oyo ekabwani kati na yango ekolonga soki moke te. Alobi ete: “Soko mpe Satana akabwani na kati na ye, bokonzi na ye ekotelema boni?” Na nsima amonisi na banguna na ye ete bazalaki na likama monene, na kolobaka na bango ete: “Nde soko ngai nazali kobimisa bilimu mabe na mosapi na Nzambe, bokonzi na Nzambe ebimeli bino.”

Bato yango oyo bazali komona bikamwiseli na Yesu mbele basengelaki kosala lokola baoyo, bikeke mingi liboso, balobaki liboso na ekamwiseli moko esalemaki na Moïse ete: “Oyo ezali mosapi na Nzambe.” Ezali mpe “mosapi na Nzambe” nde ekomaki Mibeko Zomi likoló na bitando ya mabanga. Mpe ezali lisusu “mosapi na Nzambe,” elimu santu na ye, to bokasi na mosala, yango nde epesi nzela na Yesu ete abengana bilimu mabe mpe abikisa bato na maladi. Na bongo Bokonzi na Nzambe ebimeli mpenza banguna na Yesu, mpamba te ye, moto oyo aponamaki mpo na kozala Mokonzi kati na Bokonzi yango, azali wana, kati na bango.

Na nsima Yesu apesi lisese moko mpo na kolimbola ete likoki na ye ya kobimisa bilimu mabe emonisi ete azali na nguya mingi koleka Satana: Elombe moko ya makasi koleka alongi elombe mosusu oyo azali na bibundeli makasi mpo na komibatela mpe abotoli ye biloko nyonso ya ndako na ye. Yesu azongeli lisusu lisese oyo apesaki na Galilai na ntina na elimu mabe moko. Elimu yango ebimi kati na moto moko, kasi soki moto yango atondisi makambo malamu te na esika wana oyo etikali polele kati na ye, elimu mabe ekozonga elongo na bilimu nsambo mosusu, na boye ezalela ya moto yango ekokoma mabe koleka liboso.

Na koyokaka bandimbola wana, mwasi moko akoki lisusu kokanga motema te mpe angangi na katikati na bato ete: “Esengo na libumu libotaki yo mpe na mabɛ́le manungisaki yo.” Tokoki kopamela mwasi yango te soki toyebi ete mposa na mwasi Moyuda nyonso ezali ya kobota mosakoli, mpe mingimingi mpenza Masiya. Na ntembe te azali kokanisa ete Marie asengeli mpenza kozala na esengo mpo ete abotaki Yesu.

Kasi Yesu asemboli nokinoki likanisi na mwasi yango mpo na ntina na liziba na esengo. Ayanoli ye ete, “Esengo eleki na bango bayoki Liloba na Nzambe mpe batosi yango.” Ata mbala moko te Yesu ayebisaki ete esengelaki kopesa lokumu epai na Marie, mama na ye. Nkutu amonisaki nde likambo oyo ezali kopesa esengo ya solo, ezali kosalela Nzambe na bosembo nyonso, kasi bondeko ya mosuni te to mpe kosala makambo minene te.

Lokola asalaki yango na Galilai, bobele bongo awa na Yuda Yesu apameli mpe baoyo bazali kosenga elembo na likoló: ekopesamela bango elembo mosusu te bobele elembo na Yona. Yona akomaki elembo mpo na kofanda na ye mikolo misato kati na libumu na mbisi mpe na kosakola na ye ya molende, oyo ebendaki bato na Ninive na kobongola motema. Yesu alobi ete: “Mpe tala awa moto aleki Yona azali.” Bobele bongo, mokonzi mwasi na Saba akamwaki na mayele na Salomo. Yesu alobi lisusu ete, “Kasi tala awa moto aleki Salomo azali.”

Yesu alimboli ete, soko bapelisi mwinda, bakotyaka yango kati na libulu te to na nse na kitunga te, kasi likoló na etelemelo na mwinda, mpo ete kongenga na yango emonana polele. Mbala mosusu alingi koloba na wana ete koteya mpe kosala bikamwiseli liboso na bayoki na ye oyo bazali na motó makasi ezali lokola kozipa kongenga ya mwinda moko. Bato yango bazali na liso malamu te, elingi koloba bazali komona malamu te, yango wana bikamwiseli na ye bizali kokokisa mokano na yango te.

Yesu auti kobimisa elimu mabe moko mpe kozongisa likoki ya koloba epai na ebúbú moko. Tala likambo oyo ekokaki kobenda bato oyo bazali na liso malamu, to baoyo bazali komona malamu, na kokumisa misala minene wana mpe kosakola nsango malamu. Kasi ezali bongo te mpo na banguna na Yesu. Yango wana ye asukisi boye ete: “Na bongo keba ete moi mozali kati na yo ezala molili te. Na bongo soko nzoto na yo mobimba ezali na moi, ata ndambo moko na molili te, yango mobimba ekozala na moi lokola soko mwinda ekopelela yo na kongenga.” Luka 11:14-36; Exode 8:18, 19; 31:18; Matai 12:22, 28.

▪ Nsima wana Yesu abikisi moto, bato mosusu balobi nini?

▪ “Mosapi na Nzambe” ezali nini, mpe na ndimbola nini Bokonzi na Nzambe ebimeli bayoki na Yesu?

▪ Nini ezali liziba na esengo ya solo?

▪ Kozala na liso malamu elimboli nini?