Mokapo 24

Mpo na nini Yesu ayaki na mokili

NA KAPERNAUME, elongo na bayekoli na ye minei, Yesu asalaki mosala mokolo mobimba, mpe ntango mpokwa eingelaki, bafandi na engumba Kapernaume bayaki na bato na bokono nyonso mpo ete Yesu abikisa bango. Na bongo, Yesu azalaki na ntango te ya kotikala ye moko.

Mokolo molandi, na ntongontongo, Yesu alamuki mpe abimi wana molili ezali naino. Akei esika na ye moko epai akoki kobondela Tata na ye. Kasi akoumela ye moko te; mpo ete ntango Petelo mpe bato mosusu bayei komona ete asili kotika bango, bakei koluka ye.

Ntango bamoni Yesu, Petelo alobi na ye: “Bato nyonso bazali koluka yo.” Bafandi na Kapernaume balingi ete Yesu aumela na bango elongo. Basepeli mingi na makambo ye asali mpo na bango. Kasi Yesu ayaki na mabelé bobele mpo ete asalaka bikamwiseli ya kobikisaka bato? Ye moko alobi nini mpo na yango?

Engebene Evanzile moko, tala maloba azongisi epai na bayekoli na ye: “Tokende esika mosusu na bamboka ya pembeni mpo nasakwela bango lokola, mpamba te nabimi mpo na ntina yango.” Ata ntango bibele babondeli ye ete aumela na bango, Yesu alimbweli bango ete: “Ekoki na ngai kosakola nsango malamu na Bokonzi na Nzambe na mboka mosusu lokola, mpo ete natindami na likambo yango.”

Ee, ntina eleki monene mpo na yango Yesu ayaki na mokili ezali mpo na kosakola Bokonzi oyo ekolongisa nkombo ya Tata na ye mpe ekosilisa mpo na libela bampasi oyo ezali kotungisa bato. Kasi, mpo na komonisa ete atindami na Nzambe, asali bikamwiseli ya kobikisa bato. Bikeke mingi liboso, Moise mpe asalaki bikamwiseli mpo na komonisa ete azalaki mosaleli na Nzambe.

Mbala oyo, ntango Yesu alongwi na Kapernaume mpo na kosakola na bingumba mosusu, bayekoli na ye minei, elingi koloba Petelo mpe ndeko na ye Andre elongo na Yoane mpe ndeko na ye Yakobo, bakei na ye nzela moko. Bozali komikundola lisusu ete na poso euti koleka, Yesu abengaki bango mpo ete bazala basalani na ye elongo mpe baninga na ye na mobembo.

Elongo na bayekoli na ye minei, Yesu asakoli bipai nyonso na Galilai. Alongi mpenza kati na mosala na ye. Mpo ete, nsango na ntina na misala na ye epalangani na Siria mobimba. Bibele na bato bauti na Galilai, na Yudea mpe na ngambo mosusu na Yordani balandi Yesu na bayekoli na ye. Malako 1:35-39; Luka 4:42, 43; Matai 4:23-25; Exode 4:1-9, 30, 31.

▪ Yesu asali nini na ntongontongo, nsima na kolekisa mokolo mobimba ya mosala na Kapernaume?

▪ Mpo na nini Yesu ayaki na mokili, mpe ntina ya bikamwiseli oyo azali kosala ezali nini?

▪ Banani bazali elongo na Yesu ntango asakoli na Galilai mobimba. mpe mosala yango ebimisi litomba nini?