Mokapo 132

Na loboko na mobali na Nzambe

KOSOPAMA na elimo santu na Pantekote ezali elembo ete Yesu asili kozonga na likoló. Emonaneli oyo moyekoli Etienne amoni mwa ntango moke nsima, emonisi mpe ete asilaki mpenzampenza kokóma na likoló. Wana Etienne azali kobomama na mabanga na ntina na litatoli na sembo oyo apesaki, alobi ete: “Namoni likoló lizipwani, mpe Mwana na Moto kotelema na loboko na mobali na Nzambe.”

Na loboko na mobali na Nzambe, Yesu azali kozela ete Tata na ye apesa ye etinda oyo ete: “Zala na bokonzi kati na bayini na yo.” Kasi wana ezali ye kozela ete abundisa banguna na ye, Yesu azali kosala nini? Azali kokamba, to koyangela, bayekoli na ye bapakolami, kotambwisaka bango kati na mosala ya kosakola mpe kobongisaka bango na kokoma, na nzela na lisekwa, bakonzi elongo na ye kati na Bokonzi ya Tata na ye.

Na ndakisa, Yesu aponi Saulo (ayebani mingi na nkombo na ye ya moloma ete Paulo) mpo ete akolisa mosala ya kozalisa bayekoli kati na mikili misusu. Saulo azali na molende mpo na Mibeko na Nzambe, kasi azimbisami epai na mikóló na mangomba ya Bayuda. Na yango, andimi bobele liwa ya Etienne te, kasi akei na Damaseke na ndingisa ya nganga monene Kayife mpo na kokanga bayekoli nyonso na Yesu oyo akokuta kuna mpo na koya na bango na Yelusaleme, mibali mpe basi. Nzokande, wana Saulo azali na nzela, kongenga makasi ebimi lokola mokalikali zingazinga na ye, mpe akwei na mabelé.

Mongongo mouti longwa na esika ezangi komonana motuni ete “Saulo! Saulo! Ozali konyokola ngai mpo na nini?” Saulo atuni, “Yo nani, Nkolo?”

Mongongo moyanoli ete: “Ngai Yesu oyo yo ozali konyokola.”

Yesu alobi na Saulo, oyo miso na ye mazalaki komona lisusu te na ntina na kongenga ya ekamwiseli oyo ye amoni, ete akota na Damaseke mpe azela malako. Na nsima Yesu abimeli Anania moko na bayekoli na ye, kati na emonaneli. Kolóbáká na ntina na Paulo, Yesu ayebisi Anania ete: “Moto yango nasili kopona ye ete amema nkombo na ngai liboso na bapakano, mpe na mikonzi, mpe na bato na Yisraele.”

Na yango, na lisungi na Yesu, Saulo (sikawa ayebani na nkombo ya Paulo) mpe bapalanganisi mosusu na nsango malamu bazwi elonga monene kati na mosala na bango ya kosakola mpe koteya. Ya solo, mibu 25 nsima wana Yesu abimelaki ye na nzela ya Damaseke, Paulo akomi ete “nsango malamu” esili “kosakolama na bato nyonso na nsé na likoló.”

Nsima na bambula mingi Yesu atindi ebele na bimonaneli epai na Yoane, ntóma na ye molingami. Ezali na nzela na bimonaneli wana, oyo bikomami kati na mokanda ya Emoniseli, nde Yoane aumeli ntango molai mpo na komona kozonga na Yesu kati na nguya ya Bokonzi. Yoane alobi ete “kati na elimo” amemamaki kino na “mokolo na Nkolo.” Mokolo yango mozali nini?

Boyekoli ya sikisiki ya bisakweli na Biblia, bakisa na oyo Yesu apesaki na ntina na mikolo na nsuka, emonisi ete “mokolo na Nkolo” ebandaki na 1914, mbula oyo bato bakoki kobosana yango te, elingi koloba kati na libota oyo ya lelo. Ezali bongo na 1914 nde Yesu azongaki, na lolenge ezangi komonana mpe kozanga kobeta kelelo, mpe bobele basaleli na ye ya sembo nde basosolaki bozongi na ye. Na mbula wana, Jéhovah apesaki etinda na Yesu ete akenda koyangela kati na banguna na ye.

Kotosaka etinda ya Tata na ye, Yesu apetolaki likoló na kobenganaka Satana mpe bilimu mabe na ye mpe abwakaki bango na mabelé. Nsima na kozwa emonaneli ya likambo wana, Yoane ayokaki mongongo longwa na likoló ete: “Sikawa lobiko, na nguya, na Bokonzi na Nzambe na biso, na bokonzi na Klisto na ye esili koya.” Ya solo, Yesu abandaki koyangela na 1914.

Oyo nde nsango kitoko mpo na basambeli na Jéhovah oyo bazali kati na makoló! Bapesameli elendiseli oyo ete: “Bosepela, ɛ likoló, mpe bino bofandi wana!” Kasi ezali boni mpo na baoyo bazali awa na mabelé? Mongongo mouti na likoló mokóbi na koloba ete: “Mawa na mokili mpe na mai monene! Mpo ete Satana akiteli bino na kongala mingi, awa eyebi ye ete azali na mwa elaka mokuse.”

Tozali kobika sikawa kati na ntango yango. Bato bazali kokabolama, to mpo na kokota kati na mokili ya sika, to mpo na kobomama. Ya solo, bomoi na biso etaleli lolenge oyo tozali koyanola liboso na kosakolama na nsango malamu oyo ezali kosalema na mokili mobimba, na litambwisi na Klisto.

Ntango kokabolama yango ekosila, Yesu Klisto akosala lokola Mosali na Nzambe mpo na kolongola na mabelé, ebongiseli nyonso ya biloko na Satana mpe baoyo nyonso bazali kopesa yango maboko. Akolongola mabe wana nyonso na ntango ya etumba oyo Biblia ezali kobenga ete Armagedon. Nsima na yango, Yesu Klisto, Moto ya lokumu mingi kati na molóngó mobimba, nsima na Jéhovah Nzambe ye moko, akokanga Satana mpe bilimu mabe na ye, mpe akobwaka bango kati na “libumu mozindo,” oyo elimboli ezalela ya kozanga kosala mosala lokola na liwa, mpo na mibu nkoto wana ekosila bango kokangama minyololo. Misala 7:55-60; 8:1-3; 9:1-19; 16:6-10; Nzembo 110:1, 2; Baebele 10:12, 13; 1 Petelo 3:22; Luka 22:28-30; Bakolose 1:13, 23; Emoniseli 1:1, 10; 12:7-12; 16:14-16; 20:1-3; Matai 24:14; 25:31-33.

▪ Nsima wana Yesu azongi na likoló, azali esika nini, mpe azali kozela eloko nini?

▪ Likoló na banani Yesu azali koyangela nsima na kozonga na likoló, mpe ndenge nini boyangeli na ye bozali komonana?

▪ “Mokolo na Nkolo” mobandaki ntango nini, mpe nini ezwaki esika na ebandeli na yango?

▪ Mosala nini ya bokaboli mozali lelo kotalela moto na moto , mpe yango ezali kosalema engebene likambo nini?

▪ Likambo nini ekosalema na ntango mosala yango mokosila?