Mokapo 74

Toli epai na Malata mpe malako ya libondeli

WANA ezali naino ye kokoba mosala na ye na etuka na Yudea, Yesu akoti kati na mboka Betania. Ezali kuna nde Malata, Marie mpe ndeko na bango mobali Lazare bazali kofanda. Mbala mosusu Yesu akutanaki na bango liboso, na boumeli ya mosala na ye, mpe mbala mosusu asili mpenza kokoma moko kati na baninga na bango ya motema. Lokola momeseno, sikawa mpe akei epai na Malata mpe ye ayambi ye malamu.

Malata alingi mpenza kosepelisa Yesu. Oyo nde esengo monene, na koyamba Masiya oyo alakamaki! Na bongo abandi kolamba bilei ya mindondo mingi mpe kobongisa mwa misala misusu mpo na lokumu na Yesu.

Nzokande, Marie, ndeko na ye ya mwasi, afandi na mabelé, epai na makolo na Yesu mpo na koyoka maloba na ye. Nsima na mwa ntango moke, Malata abelemi mpe alobi na Yesu ete: “Nkolo, ezali na miso na yo likambo te ete ndeko na ngai atiki ngai kosala mosala ngai moko? Loba na ye ete aya kosunga ngai.”

Kasi Yesu aboyi koloba ata likambo moko epai na Marie. Nkutu, apameli Malata mpo azali komitungisa koleka ndelo na ntina na biloko na mosuni. Apameli ye na boboto nyonso ete: “Malata, Malata, ozali na motema likoló mpe ozali kotungisama na ntina na makambo mingi, nde bobele likambo moko esengami.” Amonisi na wana ete mpo na bolei moko, ezali na ntina te kolekisa ntango mingi mpo na kolamba nzungu mingi. Mwa ndambo ekoki, to mpe moko mpamba.

Malata azali na mikano malamu: alingi komimonisa moyambi na bapaya. Nzokande, na komitungisaka na ntina na biloko na mosuni, azangi libaku ya koteyama mpenza epai na Mwana na Nzambe. Na bongo Yesu asukisi ete: “Marie aponi oyo malamu, mpe ekobotolama na ye te.”

Mikolo mingi na nsima, na mabaku mosusu, moyekoli moko atuni Yesu ete: “Nkolo, lakisa biso kobondela lokola Yoane alakisaki bayekoli na ye.” Ekoki kozala ete moyekoli wana azalaki te mbula moko na ndambo liboso, ntango Yesu alakisaki motindo na kobondela, kati na Lisolo na ye likoló na ngomba. Yesu apesi lisusu malako na ntina na lolenge ya kobondela, kasi na nsima akobi na lisese moko oyo emonisi ntina ya kozala na etingya kati na libondeli.

Abandi boye ete: “Nani kati na bino soki azali na moninga, mpe akei epai na ye kati na butu mpe alobi na ye ete: ‘Moninga, sunga ngai na kwanga misato, mpo ete moninga na ngai moko akomi epai na ngai na mobembo, mpe nazali na eloko na kotya liboso na ye te?’ Mpe soko ye wana akozongisa monoko na kati na ndako ete: ‘Tika kotungisa ngai. Ekuke esili kozipama, mpe bana na ngai bazali na ngai elongo na mbeto. Nakoki kobima kopesa yo yango te.’ Nalobi na bino ete ata akobima te mpo na kopesa ye yango, mpo ete azali moninga na ye, nde akobima kopesa ye nyonso esengi ye mpo ete azali na molende mpe na nsoni te.”

Na ndakisa wana, Yesu alingi koloba te ete, lokola moninga oyo kati na lisolo, Jéhovah Nzambe azali na ntango te mpo na koyoka malombo oyo matindami epai na ye. Te, kasi eloko alingi komonisa, ezali ete soki ‘moninga’ moko oyo azali na bolingo malamu te asuki na kopesa eyano na malombo na etingya, ezali boni mpo na Tata na biso na likoló oyo azali na bolingo mingi? Akosala yango te? Yesu akobi: “Ngai nalobi na bino ete: Bosengaka mpe ekopesama na bino. Bolukaka mpe bokokuta. Bobetaka mpe bakozipola mpo na bino. Mpo ete molombi na molombi akozwa, moluki akokuta, mpe ekozipwa mpo na mobeti.”

Na nsima Yesu akamati ndakisa ya tata moko na mokili, mosumuki mpe azangi kokoka: “Ee, tata nani kati na bino oyo, soko mwana na ye akolomba ye mbisi, akopesa ye nyoka na esika ya mbisi? to nani, soki mpe asengi likei, akopesa ye nkotó? Na bongo soko bino bato mabe boyebi kopesa bana na bino makabo malamu, Tata na bino na likoló akoleka kopesa elimo santu na bango balombi ye te?” Oyo nde elendiseli kitoko mpo na kolendendela kati na libondeli! Luka 10:38 kino 11:13.

▪ Mpo na nini Malata azali koboma nzoto mpo na Yesu?

▪ Marie azali kosala nini, mpe mpo na nini Yesu akumisi nde ye na esika ete akumisa Malata?

▪ Nini ebendi Yesu na kozongela kopesa malako na ntina na libondeli?

▪ Na motindo nini Yesu amonisi ntina ya kolendendala kati na libondeli?