Mokapo 82

Yesu akei lisusu na Yelusaleme

MOSIKA te Yesu akamati lisusu nzela, koteyaka na mboka minene mpe na mboka mike. Tokanisi ete azali kati na eteni na mokili ebengami Pelea, oyo etalani na Yudea, na ngambo mosusu na Yordani. Kasi azali nde kokende na Yelusaleme.

Engebene makanisi na Bayuda, bobele ndambo moke na bato nde bakozwa lobiko. Ezali mbala mosusu mpo na yango nde moto moko atuni ete: “Nkolo, bato bakobikisama bazali mingi te?” Kati na eyano na ye, Yesu abendi bayoki na ye na kokanisa na oyo basengeli kosala mpo na kobika. Alobi na bango: “Bosala makasi [to: bobunda na mpiko nyonso, boboma nzoto] mpo na kokota na ekuke moke.”

Esengeli noki kobunda na mpiko nyonso, “mpamba te,” Yesu akobi ete, “nalobi na bino ete, bato mingi bakomeka kokota kasi bakokoka te.” Mpo na nini? Yesu alimboli ete ‘ntango mokolo na ndako akosíla kotelema kokanga ekuke, bato bakobanda kotelema na libanda kobeta na ekuke, mpe koloba ete: “Nkolo fungola mpo na biso!”, nde akoloba na bango ete: “Nayebi te soko bouti wapi. Bolongwa awa na ngai, bino nyonso basali na mabe!”’

Bato oyo batikali libanda, bayei liboso na ekuke na ngonga oyo bango bamoni yango malamu. Kasi ekuke, libaku kitoko, esili bongo kokangama. Mpo na kokota, esengelaki bakoma wana mwa ngonga malamu liboso, ata soki ngonga yango ezalaki malamu te mpo na bango. Ya solo, mawa ezali kozela baoyo bazali kozongisa nsima ntango ya kopesa esika ya liboso na losambo ya Jéhovah kati na bomoi na bango!

Bayuda epai na bango Yesu atindamaki mpo na kobikisa bango, mingi kati na bango basimbi te libaku kitoko ya kondima ebongiseli ekamatami na Nzambe na ntina na lobiko. Yango wana Yesu alobi ete bakolela mpe bakokatakata mino ntango bakobwakama libanda. Nzokande, baoyo “bakouta epai na ebimelo na ntango, na bipai na elimwelo na ntango, na likoló mpe na ngele,” ee, bato na mabota nyonso, “bakofanda kati na bokonzi na Nzambe.”

Yesu akobi: “Bamosusu bazali na nsima [bapakano batyolami, mpe Bayuda oyo banyokwami] bakozala liboso, mpe bamosusu bazali liboso [Bayuda oyo bazali malamu kati na mosuni mpe na mikumba kati na lingomba] nde bakozala bato na nsima.” Bato oyo ya goigoi mpe bazangi botondi bakozala bato na nsima na ndimbola oyo ete bakokota na Bokonzi na Nzambe te.

Bafalisai bayei sikawa epai na Yesu mpe balobi na ye ete: “Longwa awa, mpe kenda na yo, mpo ete Herode [Antipas] azali na mposa na koboma yo.” Mbala mosusu ezali Hérode ye moko nde apalanganisaki nsango wana, mpo na kopusa Yesu ete akima longwa na mboka wana. Na yango, mbala mosusu azali kobanga ete akokwea lisusu kati na libomi ya mosakoli mosusu na Nzambe, lokola kati na likambo na Yoane Mobatisi. Kasi Yesu azongisi na Bafalisai ete: “Bokenda koloba na gambala yango ete: ‘Lelo na lobi, nazali kobimisa bilimu mabe, mpe nazali kobikisa bato, mpe na mokolo na misato nakokoma na nsuka.’”

Nsima na kosilisa mosala na ye kati na etuka wana, Yesu akobi mobembo na ye na Yelusaleme, mpamba te, elobi ye, “ekoki ete mosakoli akufa epai mosusu te, bobele na Yelusaleme.” Mpo na nini esengeli ete Yesu abomama na Yelusaleme? Ezali mpo ete engumba yango ezali mboka-mokonzi, epai kuna efandi Sanedrina, Esambiselo monene oyo basangani 71 bazwami kati na yango, mpe epai kuna mbeka na banyama epesamaka. Ekoki bongo kosalema te ete “Mwana na Mpate na Nzambe” abomama epai mosusu soko na Yelusaleme te.

Yesu aleli ete: “Yelusaleme, Yelusaleme, yo oyo okobomaka basakoli mpe okobolaka na mabanga bango batindami epai na yo, mbala mingi nazalaki na mposa na koyanganisa bana na yo lokola nsoso akoyanganisaka bana na ye na nse na mapapu na ye, nde bozalaki na mposa te. Sikawa ndako na bino etikali na bino.” Lokola baboyi Mwana na Nzambe, libota yango ekweisami.

Wana Yesu akobi mobembo na ye na Yelusaleme, abyangami epai na mokonzi moko ya Bafalisai. Bazali kotalatala ye, mpamba te ezali sabata mpe moto moko oyo maboko na ye mpe makolo na ye esili kovimba na mai, azali wana. Yesu atuni Bafalisai mpe balakisi na mibeko ete: “Mibeko mipesi nzela mpo na kobikisa moto na maladi na mokolo na sabata to te?”

Bango nyonso bafandi nyee. Na bongo Yesu abikisi moto yango mpe azongisi ye na ndako na ye, na nsima atuni motuna oyo: “Nani kati na bino soki mwana na ye to ngombe na ye akwei na libulu, akobimisa ye nokinoki na mokolo na sabata te?” Ya mbala oyo lisusu, moto moko te akoki kozongisela ye liloba. Luka 13:22 kino 14:6; Yoane 1:29.

▪ Engebene Yesu, nini esengeli mpo na kozwa lobiko, mpe mpo na nini bato mingi batikali libanda?

▪ Banani bato na “nsima” baoyo bakomi bato na liboso mpe banani “bato na liboso” baoyo bakomi bato na nsima?

▪ Ekoki kozala mpo na ntina nini elobami ete Hérode azali koluka koboma Yesu?

▪ Mpo na nini ekoki ete mosakoli akufa epai mosusu te, bobele na Yelusaleme?