Mokapo 34

Yesu aponi bantóma na ye

ESILI koleka soko mbula moko na ndambo uta Yoane Mobatisi alakisaki Yesu lokola Mwana na Mpate na Nzambe, mpe Yesu abandaki mosala na ye ya kosakola. Uta ntango yango, André, Simona Petelo, Yoane mpe mbala mosusu Yakobo (ndeko na Yoane), elongo na Filipe mpe Natanaele (oyo abengamaki lisusu Bartelemi), basili kokoma bayekoli na ye ya liboso. Nsima na yango, bato mosusu mingi bakótaki na molongo yango mpo na kolanda Klisto.

Yesu akómi sikawa pene na kopona bantóma na ye. Bakozala basalisi na ye mpe bakobongisama mpo na mosala ya ntina mingi. Kasi liboso ya kopona bango, Yesu akei na ngomba mpe alekisi butu mobimba kuna na kobondelá, kosengaka epai na Nzambe mayele mpe lipamboli na Ye. Mokolo molandaki, na ntongo, abengi bayekoli na ye nyonso mpe aponi bazomi na mibale. Nzokande, lokola bazali ntango nyonso koyekola epai na Yesu, balandi kobenga bango nkombo ete bayekoli.

Yesu aponi baoyo motoba tosili kotanga nkombo, oyo bakómaki bayekoli na ye ya liboso. Aponi lisusu Matai, oyo akendaki koluka na biro ya kofutisa mpako. Mitano mosusu oyo ye aponi bazali Yuda (abengami lisusu Tadé), Yuda Iskariote, Simona moto na Kanana, Toma mpe Yakobo, mwana na Alfé. Ye Yakobo abengami lisusu Yakobo Moke, mbala mosusu mpo azali mokuse to elenge mpenza liboso na ntóma mosusu oyo abengami mpe Yakobo.

Mibali zomi na mibale oyo bazali baninga na Yesu uta mwa kala, mpe Yesu ayebi bango malamu. Nkutu, bamoko bazali bandeko na ye na mosuni. Yakobo mpe ndeko na ye Yoane bazali bana ya mamakulutu to mamaleki na Yesu. Ekoki mpe kozala ete Alfé azali ndeko na Yozefe, tata mobokoli na Yesu. Soki ezali ndenge yango, boye mwana na Alfé, ntóma Yakobo, azali mpe ndeko na Yesu na mosuni; mwana na ndeko na tata na ye mobokoli.

Yesu akokaki kobosana nkombo ya bantóma na ye te. Bongo yo ozali komikundola yango? Kanisa bobele ete ezali na ba Simona mibale, ba Yakobo mibale mpe ba Yuda mibale, ete Simona azali na ndeko na ye André, mpe Yakobo azali na ndeko moko abengami Yoane. Na bongo okoki kokanga nkombo ya bantóma 8. Kati na bango minei batikali, ezali na mokongoli moko na mpako (Matai), ntóma moko oyo na nsima atyaki ntembe (Toma) mosusu Yesu abengaki ye wana efandaki ye na nsé na nzeté moko (Natanaele) mpe moninga na ye, Filipe.

Bantóma zomi na moko bazali bato ya Galilai lokola Yesu. Natanaele azali moto na Kana. Filipe, Petelo mpe André bazali bato na Betesaida. Nzokande, Petelo mpe André bafandaki nsima na Kapernaume, engumba epai kuna, ekoki kozala ete Matai azalaki kofanda mpe wana. Yakobo mpe Yoane bazalaki babomi mbisi, mpe bango lisusu bazalaki mbala mosusu kofanda na Kapernaume to na bamboka ya pembeni wana. Yuda Iskariote oyo na nsima atekaki Yesu, akoki kozala ntóma bobele moko autaki na Yudea. Malako 3:13-19; Luka 6:12-16.

▪ Bantóma nini bazalaki mbala mosusu bandeko na Yesu na mosuni?

▪ Banani bazali bantóma na Yesu, mpe ndenge nini tokoki komikundola bankombo na bango?

▪ Bantóma bautaki na bamboka nini?