Mokapo 15

Yesu asali likamwisi ya liboso

ESILI koleka mokolo moko to mibale uta Andre, Petelo, Yoane mpe mbala mosusu na Yakobo, Filipe mpe Natanaele, bakomi bayekoli ya liboso ya Yesu. Sikawa bazongi na Galilai, epai kuna ezali etuka na bango nyonso. Bakei na elambo ya libala na Kana, na mboka ya Natanaele. Kana ezali kuna likolo na ngomba mike, mosika te na Nazarete, mboka epai Yesu akolaki.

Mama na Yesu akei mpe na libala yango. Emonani ete Marie, lokola azali moninga ya libota ya babalani, azali na mosala ya kokabola bilei mpe masanga epai na babyangami. Yango wana amoni nokinoki ete eloko moko ezangi, mpe noki mpenza akei koyebisa na Yesu ete: “Bazali na vinyo te.”

Na maloba oyo Marie asengi na Yesu ete asala eloko mpo na kosilisa mwa mokakatano moke oyo. Yesu andimi mbala moko te. Atuni ete: “Likambo nini biso na yo?” Ya solo, azali Mokonzi apakolami na Nzambe; libota na ye to baninga na ye bazali na mitinda ya kopesa ye te. Yango wana Marie, na mayele nyonso atiki likambo yango na maboko ya mwana na ye, kolobaka bobele epai na basali ete: “Bosala nyonso oyo akotinda bino.”

Na esika yango, ezali na mbeki motoba ya mabanga oyo moko na moko ekoki kokota balitre ntuku minei ya mai to koleka. Yesu apesi etinda epai ya basaleli ete: “Botondisa mbeki na mai.” Basali batondisi mbeki mekee na mai. Mpe Yesu abakisi ete: “Botoka sikawa mpe bokende kopesa yango na Kapita na elambo.”

Kapita na elambo akamwe na esengo nyonso na komona elengi ya vinyo yango, mpo ayebi te ete ebimi na likamwisi. Abengi mobali na libala mpe alobi na ye ete: “Bato nyonso bakopesaka vinyo malamu liboso mpe wana esili bato komela mingi, bakopesaka oyo ezali malamu mingi te. Kasi yo obombi vinyo malamu kino sikawa.”

Wana ezali likamwisi ya liboso oyo Yesu asali, mpe elendisi kondima ya bayekoli na ye ya sika. Nsima mwa moke, Yesu akei na bayekoli na ye, elongo na mama na ye mpe bandeko na ye, na Kapernaume, penepene na libeke ya Galilai. Yoane 2:1-12.

▪ Ntango nini libala na Kana esalami?

▪ Mpo na nini Yesu atemeli moke likanisi ya mama na ye?

▪ Likamwisi nini Yesu asali, mpe yango ezali na bopusi nini epai na baoyo bamoni yango?