Mokapo 17

Yesu ateyi Nikodeme

WANA ezali ye koyangana na Pasika ya mobu 30, Yesu asali makamwisi minene. Makamwisi na ye mapusi bato mingi na kondima ye mpe yango ebendi likebi na Nikodeme, mosangani moko ya Sanedrina, Esambiselo eleki monene ya Bayuda. Nikodeme alingi kotuna ye mpo ete azwa ndimbola na makambo mosusu mingi; yango wana akei kokutana na Yesu. Mpo na yango aponi kokende na butu, na ntembe te ezali mpo azali kobanga ete akotyolama epai na mikonzi misusu ya Bayuda soko moto moko amoni ye.

Alobi ete, “Moteyi, toyebi ete yo ozali molakisi oyo auti epai na Nzambe, mpamba te moto moko te akoki kosala bikamwiseli oyo ozali kosala, soki Nzambe azali elongo na ye te.” Yesu ayanoli epai na Nikodeme ete, mpo na kokota na Bokonzi ya Nzambe moto asengeli ˈkobotama lisusu.ˈ

Ndenge nini moto akoki kobotama lisusu? Nikodeme atuni ete: “Ekokoka na ye kokota lisusu kati na libumu ya mama na ye mpe kobotama?”

Te, kobotama lisusu ezali motindo wana te. Yesu alimboli ete, “Solo solo nazali koloba na yo ete, soko moto akobotama na mai mpe na elimo te, akokoka koingela na Bokonzi na Nzambe te.” Ntango Yesu azwaki batisimo mpe elimo santu ekitaki likolo na ye, ezali na ntango wana nde abotamaki “na mai mpe na elimo santu.” Na ntango yango Nzambe alobaki uta na makolo ete: “Oyo azali Mwana na ngai na bolingo, nasili kondima ye.” Na likambo wana, Nzambe ayebisaki ete auti kobota mwana moko ya elimo oyo azali na elikya ya kokota kati na Bokonzi ya likolo. Mikolo mingi na nsima, na Pantekote ya mobu 33, bayekoli mosusu basilaki kobatisama, bazwaki elimo santu mpe na bongo babotamaki lisusu lokola bana na Nzambe na elimo.

Kasi mokumba ya Mwana na Nzambe lokola moto ezali ya lobiko. Yesu alobi na Nikodeme: “Mpe lokola Moise atombolaki nyoka kati na esobe, boye ekoki na Mwana na moto kotombwama, ete moto na moto oyo akondimela ye azala na bomoi na seko.” Na yango, lokola Bayisraele oyo baswamaki na banyoka mabe basengelaki kotala epai na nyoka ya ebende mpo na kobikisama, bobele bongo bato nyonso basengeli kozala na kondima epai na Mwana na Nzambe mpo na kosikolama na liwa.

Kobendaka likebi likolo na bolingo oyo Jehovah amonisaki kati na likambo yango, Yesu alobi lisusu epai na Nikodeme ete: “Nzambe alingaki mokili na motindo boye ete apesi Mwana na ye bobele moko ete moto na moto oyo akondima ye abebisama te kasi ete azala na bomoi na seko.” Tala motindo nini, na Yelusaleme, bobele sanza motoba nsima na kobanda mosala na ye, Yesu amonisi polele ete azali esaleli oyo Jehovah Nzambe azali kosalela mpo na kobikisa bato.

Alimboli lisusu na Nikodeme ete: “Mpo ete Nzambe atindi Mwana na ye kati na mokili ete asambisa mokili te,” elingi koloba ezali te mpo ete akweisa yango mpe akatela bato nyonso etumbu ya liwa, kasi alobi ete ezali nde “mpo ete mokili ebika mpo na ye.”

Nikodeme, ye oyo azali kobanga, ayei kokutana na Yesu na butu. Ekoki bongo ete Yesu asukisa lisolo elongo na ye na maloba oyo: “Kosambisa ezali boye ete moi [oyo Yesu azali komonisa kati na bomoi na ye mpe mateya na ye] esili koingela kati na mokili, nde bato baponi molili liboso na moi mpo ete misala na bango mizali mabe. Mpamba te moto na moto oyo azali kosalaka mabe ayini moi mpe akoyaka epai na moi te ete misala na ye mipamelama te. Nde ye oyo azali kosalaka sembo akoyaka epai na moi ete misala na ye mimonisama ete misalami kati na Nzambe.” Yoane 2:23 kino 3:21; Matai 3:16, 17; Misala 2:1-4; Mituya 21:9.

▪ Nini epusi Nikodeme na kokende kokutana na Yesu, mpe mpo na nini akei na butu?

▪ ˈKobotama lisusuˈ elimboli nini?

▪ Elakiseli nini Yesu asaleli mpo na komonisa mokumba oyo azali kokokisa mpo na lobiko na biso?

▪ Elimboli nini ete Yesu ayei mpo na kosambisa mokili te?