Mokapo 19

Yesu ateyi mwasi Mosamaria

MPO na kolongwa na Yudea kino kokoma na Galilai, Yesu mpe bayekoli na ye basengeli koleka na Samaria. Lokola balembi mpo na mobembo, ntango midi elingi kokoka, batelemi mpo na kopema pembeni na libulu ya mai, mosika mingi te na engumba ya Sikare. Ezali libulu Yakobo atimolaki yango bikeke mingi liboso, mpe kino lelo, libulu yango ezali wana, mosika mingi te na engumba ya sika ebengami Napluze.

Wana Yesu azali kopema na esika yango, bayekoli na ye bakei na engumba mpo na kosomba bilei. Mwasi moko Mosamaria ayei kotoka mai, mpe Yesu alobi na ye ete: “Pesa ngai mai namela.”

Nzokande, Bayuda bakoyokanaka na Basamaria te. Yango wana mwasi akamwe, mpe atuni: “Mpo na nini yo Moyuda ozali kosenga ngai mai ya komela?”

Yesu ayanoli ete: “Soki oyebaki ye oyo azali koloba na yo ete, ˈPesa ngai mai namela,ˈ mbele yo olombi ye nde apesi yo mai na bomoi.”

Mwasi alobi ete, “Nkolo, yo ozali na etokeli te, mpe libulu ezali mozindo. Ozwi mai yango na bomoi epai wapi? Yo oleki tata na biso Yakobo oyo apesaki biso liziba mpe amelaki na yango, ye moko mpe bana na ye mpe bibwele na ye?”

Yesu alimboli na ye ete, “Moto na moto oyo akomela mai oyo, akoyoka mposa na komela lisusu. Nde ye oyo akomela mai makopesa ngai epai na ye akoyoka mposa lisusu te; kasi mai makopesa ngai ye makozala liziba na mai kati na ye mpo na kopesa bomoi ya seko.”

Mwasi azongisi ete: “Nkolo, pesa ngai mai yango, ete nayoka lisusu mposa na komela te mpe naya lisusu awa mosika boye mpo na kotoka te.”

Yesu alobi na ye: “Kenda kobenga mobali na yo.”

Mwasi alobi na ye ete: “Nazali na mobali te.”

Yesu amonisi ete maloba yango mazali solo: “Olobi malamu ete nazali na mobali te, mpamba te osili kozala na mibali mitano mpe ye oyo azali na yo sikawa azali mobali na yo te.”

Mwasi akamwe mpe alobi ete: “Nkolo, namoni ete yo ozali mosakoli.” Komonisaka bongo mposa na ye mpo na makambo na elimo, alobi ete Basamaria “basambelaki na ngomba oyo [Gerizime, penepene wana] kasi bino [Bayuda] bokolobaka ete esika ekoki na bato kosambela ezali na Yelusaleme.”

Kasi, Yesu amonisi ete ezali esika ya kosambela te nde ezali na ntina. Alimboli ete: “Kasi ntango ekoya, ee ezali sikawa, wana basambeli na solo bakosambela Tata na bisambeli na elimo mpe na solo. Mpo ete Tata azali koluka motindo oyo mpo na kosambela ye. Nzambe azali elimo, mpe ekoki na basambeli na ye ete basambela ye na elimo mpe na solo.”

Mwasi akamwi mingi lisusu. Alobi: “Nayebi ete Masiya akoya, ye oyo abyangami Klisto. Wana ekoya ye, akoyebisa biso makambo nyonso polele.”

Yesu azongiseli ye ete: “Ngai nazali ye, ngai oyo nazali kosolola na yo.” Kanisa naino moke! Mwasi Mosamaria oyo ayei kotoka mai na midi, ntango mosusu ezali mpo ete akutana te na basi mosusu ya mboka oyo bazali kotyola ye na ntina ya etamboli na ye. Kasi, talaka Yesu apesi ye libaku malamu mpenza. Alobeli ye polele mpenza likambo oyo naino ayebisa moto mosusu te. Mpe matomba nini yango ekobimisa?

Basamaria ebele bandimi

Ntango bayekoli balongwe na mboka Sikare mpe bazongi, na bilei, bakuti Yesu pembeni ya libulu ya Yakobo, esika batikaki ye. Kasi sikawa Yesu azali kosolola na mwasi Mosamaria. Ntango bayekoli bakomi, mwasi akei, atiki wana mbeki na ye ya mai, mpe akoti kati na mboka.

Lokola asepeli mpenza na makambo oyo Yesu alobeli ye, akei koyebisa na bato na mboka ete: “Boya kotala moto oyo alobi na ngai makambo nyonso masali ngai.” Mpe mpo na kolamusa mposa na bango, atuni ete: “Boye ye Klisto te?” Motuna mokokisi mokano na yango mpamba te, bato bakei kotala soki likambo yango ezali boni.

Na ntango yango, bayekoli bazali kobondela Yesu ete alya bilei oyo bango basombi na mboka. Kasi ye ayanoli bango ete: “Ngai nazali na bilei biyebi bino te.”

Bayekoli batunani ete: “Moto amemeli ye bilei?” Yesu alimbweli bango: “Bilei na ngai ezali boye ete nasala mokano na Motindi na ngai mpe ete nasukisa mosala na ye. Bino bozali koloba te ete, etikali naino sanza minei mpe elaka na kobuka mbuma ekokoka?” Kasi, kolobaka na ntina na kobuka mbuma na elimo, Yesu abakisi: Tala, nazali koloba na bino ete botombola miso na bino mpe botala na bilanga ete bisili kotela mpo na kobuka naino. Mobuki azali kozwa lifuti mpe azali kobuka mbuma mpo na bomoi na seko ete mokoni mpe mobuki basepelana elongo.”

Ekoki kozala ete Yesu azali kokanisa na matomba malamu mingi oyo malingi kobima na lisolo na ye elongo na mwasi Mosamaria, mpamba te baike bandimi ye mpo na litatoli na mwasi. Atatoli na bato na mboka ete: “Alobi na ngai makambo manso masali ngai.” Na yango ntango mibali ya mboka Sikare bayei kotala Yesu pembeni ya libulu ya mai, basengi na ye ete afanda epai na bango mpo ete alimbwela bango makambo mingi lisusu. Yesu andimi libyangi na bango mpe afandi wana mikolo mibale.

Basamaria bazali koyoka Yesu, mpe ebele mingi lisusu bandimeli ye. Mpe balobi na mwasi Mosamaria ete: “Tozali kondima lisusu mpo na lisolo na yo te; mpamba te toyoki ye biso mpenza, mpe toyebi ete oyo azali solo Mobikisi na mokili.” Mwasi Mosamaria oyo apesi biso ndakisa malamu mpenza mpo na oyo etali kopesa litatoli na ntina na Klisto, na kolamusaka mposa ya balobani na biso oyo tokoki kokutana na bango, mpo ete baluka koyeba makambo mingi lisusu.

Tomikundola ete likambo yango esalemi sanza minei liboso na eleko ya kobuka mbuma—na ntembe te eleko ya kobuka orge oyo kuna na mokili ya Palestine bakobukaka yango kobanda na sanza ya marsi. Makambo oyo masalami bongo na sanza ya novembre to ya decembre. Yango elingi koloba ete nsima na Pasika ya mobu 30 ya ntango na biso, Yesu mpe bayekoli na ye baumelaki lisusu sanza mwambe na Yudea, mpo na koteya bato mpe kobatisa bango. Sikawa bakomi kozonga epai na bango, na Galilai. Makambo nini mazali kozela bango kuna? Yoane 4:3-43.

▪ Mpo na nini mwasi Mosamaria akamwe na komona ete Yesu asolisi ye?

▪ Yesu ateyi ye nini na ntina na mai ya bomoi mpe na esika ya kosambela?

▪ Na lolenge nini Yesu ayebisi ye soki azali nani, mpe mpo na nini lolenge oyo Yesu amilakisi ekamwisi mingi?

▪ Litatoli nini mwasi Mosamaria apesi, mpe ebimisi litomba nini?

▪ Boyokani nini bozali kati na bilei na Yesu mpe kobuka mbuma?

▪ Ndenge nini tokoki koyeba sanza boni Yesu asalaki mosala na ye na Yudea nsima na Pasika ya mobu 30?