Mokapo 99

Yesu ateyi na Yeriko

MOSIKA te, Yesu mpe bibele oyo bazali kosala mobémbo elongo na ye bakómi na Yeriko, mboka oyo esengeli kotambola mokolo mobimba mpo na kokóma na Yelusaleme. Emonani lokola ete Yeriko ezali engumba oyo ekabolami na biteni mibale, engumba ya kala na Bayuda, oyo etangwi pene na ntáká ya kilometele moko na ndambo na engumba ya sika na Baloma. Bato oyo bauti na engumba ya kala, bazali kosala makelele kino ebendi likebi ya bakufeli miso, balɔmbi na mosolo. Moko na basengi yango abengami na nkombo Balatimai.

Eyoki bango ete Yesu nde azali koleka, Balatimai mpe moninga na ye bangangi ete: “Nkolo, yokela biso mawa, ee Mwana na Davidi.” Na mongongo makasi, bato balobi na bango ete batika makelele, nde bango bangangi lisusu makasi koleka, ete: “Nkolo, Mwana na Davidi, bikisa biso.”

Na makelele wana, Yesu atelemi mpe asengi na baoyo bazali kotambola na ye ete babenga bato wana bazali konganga. Bato oyo bazali kosala mobémbo elongo na ye, bakei epai na bakufeli miso mpe balobi epai na moko na bango ete: “Yika mpiko, telema, azali kobyanga yo.” Na lombango nyonso, abwaki elamba na ye ya likoló, atelemi mbala moko mpe akei epai na Yesu.

Yesu atuni: “Bolingi ete nasalela bino nini?”

Bakufeli miso wana balɔmbi Yesu ete: “Nkolo, miso na biso mafungwana.”

Yesu aoki mawa mpe asimbi miso na bango, engebene lisoló ya Malako, alobi na moko na bango ete: “Kenda na yo, kondima na yo esili kobikisa yo.” Nokinoki, balɔmbi wana babandi komona; na ntembe te bango mibale babandi kokumisa Nzambe. Emoni bango makambo oyo masalemi, bato babandi kokumisa Nzambe. Kozanga kokakatana, Balatimai mpe moninga na ye balandi Yesu.

Wana ezali ye kokatisa Yeriko, Yesu azingami na ebele na bato. Moto nyonso alingi komona ye oyo abikisi bakufeli miso. Bato bazingizingi ye epai na epai na boye ete bamosusu bakoki ata komona ye te. Zakai azali kati na bato yango, ye moko na bakongoli na mpako na Yeriko mpe bato mosusu ya bamboka ezali zingazinga. Nzokande, mobali wana azali mokuse mpenza mpe akoki te komona makambo oyo mazali koleka.

Akimi mbango na liboso mpe amati na nzeté na mowiti ezali pembeni na nzela epai Yesu azali koleka. Azali na esika malamu mpo na komona makambo manso. Wana bibele bazali kopusana, Yesu atomboli miso na likoló na nzeté mpe abengi ete: “Zakai, kita noki, mpo ete ekoki na ngai kofanda na ndako na yo lelo.” Na esengo nyonso, Zakai akiti mpe akimi mbango na ndako na ye komibongisa mpo na koyamba mopaya na ye monene.

Kasi, emoni bango likambo yango, bato nyonso babandi koimaima, mpamba te bamoni mabe ete ayambama na moto lokola Zakai. Esengeli koyeba ete Zakai akómaki mozwi mpo na kozanga sembo na ye, na kobotóláká bato misolo na bango na nzela ya mosala na ye ya mokongoli na mpako.

Bato mingi bazali kolanda Yesu mpe, ekɔti ye na ndako na Zakai, basepeli te mpe balobi ete: “Akei kofanda na ndako na moto na masumu.” Nzokande, Yesu asosoli ete Zakai azali moto oyo akoki kobongwana. Mpe makanisi na ye makokisami mpamba te, Zakai atelemi mpe alobi ete: “Yoka Nkolo; nakopesa babólá ndambo na mibale na biloko na ngai. Soko mpe nabotólaki moto eloko, nakozongisa yango mbala minei.”

Zakai amonisi kobongwana ya sembo na kopesáká ndambo na bozwi na ye epai na babólá, mpe na kozongisáká ndambo na mosolo mosusu epai na bato oyo ye ayibaki. Na lisalisi ya mikanda na ye ya mosala, akoki koyeba mosolo oyo asengeli kozongisa. Yango wana akati ndai ete azongisa mbala minei, na boyokani na mobeko na Nzambe oyo elobi ete: ‘Soko moto ayibi mpate, akozongisa mpate minei mpo na mpate moko.’

Yesu asepeli mingi na lolenge oyo Zakai alaki kokabola bozwi na ye, mpamba te alobi ete: “Lelo kobikisama eyei na ndako oyo, mpo ete ye mpe azali mwana na Abrahame. Mpamba te Mwana na moto ayei koluka mpe kobikisa yango ebungani.”

Wana liboso, Yesu amonisaki ezalela ya ‘basumuki babungani’ na lisese ya mwana oyo atikaki ndako ya baboti na ye. Na lisese wana, tozali na ndakisa ya moto oyo abungaki mpe amonani lisusu. Atako bakonzi ya mangomba mpe bandimi na bango bazali koimaima mpe bazali kofunda Yesu mpo ete amonisi bolingo epai na bato lokola Zakai, Yesu azali sé koluka mpe kobikisa bana na Abrahame oyo basili kobunga. Matai 20:29-34; Malako 10:46-52; Luka 18:35 kino 19:10; Exode 22:1.

▪ Epai wapi Yesu akuti balɔmbi bakufeli miso, mpe asali nini mpo na bango?

▪ Zakai azali nani, mpe mpo na nini amati likoló na nzeté?

▪ Lolenge nini Zakai amonisi kobongwana na ye?

▪ Liteya nini tokoki kozwa na lolenge oyo Yesu ataleli Zakai?