Mokapo 72

Yesu atindi bayekoli mosusu 70

TOKOMI bongo na oktobre ya mobu 32, mibu misato mikoki uta Yesu azwaki batisimo. Klisto mpe bayekoli na ye bauti koyangana na elambo ya Mingombo na Yelusaleme, mpe emonani lokola ete, baumeli naino wana zongazonga. Mpamba te, na boumeli ya sanza motoba ya nsuka ya mosala na ye, mbala mingi Yesu akobanda kozala to na Yudea, to pene wana na ngambo mosusu ya Yordani, kati na etúka ya Pelea, teritware oyo esengeli na ye mpe kosakola kati na yango.

Ezali solo ete kobanda na Pasika ya mobu 30 asili kolekisa pene na sanza mwambe na Yudea mpo na kosakola. Kasi nsima wana Bayuda bakanaki koboma ye na etuka yango na ntango ya Pasika ya mobu 31, azalaki bobele koteya na Galilai na boumeli ya mbula moko na ndambo. Na boumeli ya eleko yango, abongisaki lisanga moko monene ya basakoli balakisami malamu, likambo oyo asalaki yango naino liboso te. Sikawa, abandi mosala moko monene mpe ya nsuka mpo na koteya na Yudea.

Mpo na kobandisa mosala yango, Yesu aponi bayekoli 70 baoyo atindi bango mibalemibale. Na nyonso, ezali bongo bituluku 35 ya basakoli na Bokonzi oyo bakolekaleka mboka mobimba. Bakei liboso na Yesu kati na bingumba nyonso mpe na bisika oyo azali kokana ete akokende wana, mpenzampenza elongo na bantoma na ye.

Na esika ete atinda bayekoli 70 ete bakenda na biyanganelo, Yesu ayebisi bango ete bakota na bandako ya bato: “Soko bokokota na ndako nini, boloba liboso ete: ‘Kimya ezala na ndako oyo!’ Soko mpe moto na kimya azali wana, kimya na bino ekoumela na ye.” Yesu abakisi ete: “Boloba na bango lisusu ete: ‘Bokonzi na Nzambe ebelemi.’” Na ntina na mosala ya bayekoli 70, tozali kotanga boye kati na mokanda Commentaire de Matthew Henry (na Lingelesi): “Lokola Nkolo na bango, bisika nyonso oyo bazalaki koleka bazalaki kosakola ndako na ndako.”

Malako oyo Yesu apesi na bayekoli na ye 70 mazali ndenge moko na oyo apesaki epai na bantoma 12 mbula moko liboso, ntango atindaki bango kosakola na Galilai. Akebisi bango na ntina na botemeli oyo basengeli kokutana na yango mpe abongisi bango mpo bayeba kolakisa nsango epai ya bato, apesi bango nguya ya kobikisa bato na maladi. Na yango, ntango akokoma noki nsima na bango, akokuta ebele na bato bazali kozela na motema móto ete bamona Nkolo oyo bayekoli na ye bazali na makoki ya kosala makambo ya kokamwisa boye.

Kosakola ya bayekoli 70 mpe mosala na Yesu oyo elandaki nsima na yango eumeli ntango mokuse. Mosika te bituluku 35 ya basakoli bibandi kozonga epai na Yesu. Bayekoli batondi na esengo, balobi ete: “Nkolo, ata bilimu mabe batosi biso mpo na nkombo na yo.” Yesu asepeli mpenza na koyoka rapport ya mosala kitoko boye, mpamba te ayanoli: “Namonaki Satana kokwea na likoló lokola mokalikali. Tala nasili kopesa bino nguya na konyata nyoka mpe nkoto.”

Ayebi ete nsima na kobotama ya Bokonzi na Nzambe, na mikolo ya nsuka, Satana mpe bilimu mabe na ye bakobimisama na likoló. Kasi, mpo na sikawa, lokola bato na kosokema bakomi kobengana bilimu mabe bizangi komonana, yango elendisi elikya ete likambo yango ekosalema mpenza; yango wana Yesu azali koloba mpo na kobimisama ya Satana na likoló lokola likambo lisili kosalema. Mpe ezali bongo na ndimbola ya elilingi nde bayekoli 70 bazwi nguya ya konyata nyoka mpe nkoto. Nzokande, Yesu abakisi: “Ata bongo, bosepela oyo te ete bilimu mabe batosi bino, nde bosepela ete nkombo na bino esili kokomama na likoló.”

Yesu atondi na esengo mpe akumisi Tata na ye liboso na bato banso mpo ete apesi nguya motindo wana epai na basokemi. Kotalaka epai na bayekoli na ye, alobi ete: “Esengo na miso matali makambo matali bino! Mpo ete nalobi na bino ete basakoli mingi, na mikonzi mingi, bazalaki na mposa na komona makambo matali bino nde bamonaki yango te, mpe bazalaki na mposa na koyoka makambo mayoki bino nde bayokaki yango te.” Luka 10:1-24; Matai 10:1-42; Emoniseli 12:7-12.

▪ Epai wapi Yesu asakolaki na boumeli ya mibu misato ya liboso ya mosala na ye, mpe na teritware nini asakolaki na boumeli ya sanza motoba ya nsuka ya mosala na ye awa na mabelé?

▪ Na etúka nini Yesu atindi bayekoli 70?

▪ Mpo na nini Yesu alobi ete amonaki Satana asili kokwea longwa na likoló?

▪ Na ndimbola nini bayekoli 70 bakoki konyata banyoka mpe bankoto?