Mokapo 38

Yoane azangaki kondima?

YOANE Mobatisi, oyo azali na boloko eleki mbula mobimba sikawa, ayoki ete Yesu asekwisi mwana ya mwasi moko mokufeli-mobali na Naïne. Kasi alingi mpenza koyeba ndimbola ya ekamwiseli wana uta na Yesu ye moko; yango wana atindi bayekoli na ye mibale mpo na kokende kotuna ye ete: “Yo ozali oyo akoya, to esengeli na biso kozela mosusu?”

Motuna oyo ekoki komonana ete ezali na nzela te, mpo ntango abatisaki Yesu, esili koleka pene na mbula mibale, Yoane amonaki elimo ya Nzambe kokita likoló na ye mpe ayokaki mongongo ya Nzambe kondima ye. Motuna na Yoane etindi mbala mosusu bamoko na kokanisa ete kondima na ye elembaki. Nzokande, ezali bongo te. Mbele Yesu akokaki kolobela Yoane na maloba ya lokumu te, ndenge asali yango na libaku oyo, soki Yoane abandaki kobeta ntembe. Na yango, mpo na nini Yoane atuni motuna oyo?

Mbala mosusu alingi bobele ete Yesu ye moko andima ete azali Masiya. Tala likambo oyo ekolendisa Yoane, ye oyo azali bobele kozela kuna na boloko. Kasi emonani lokola ete azali na bantina mosusu ya kotuna motuna oyo. Alingi koyeba soko moto mosusu akoya, elingi koloba mokitani oyo akosukisa bisakweli nyonso oyo Masiya asengeli kokokisa.

Engebene bisakweli ya Biblia, oyo Yoane ayebi yango, Mopakolami na Nzambe asengeli kozala mokonzi, mosikoli. Nzokande, Yoane azali naino mokangami kati na boloko, basanza mingi nsima na batisimo na Yesu. Emonani bongo polele ete likambo Yoane azali kotuna na Yesu ezali oyo ete: ‘Yo nde moto okotelemisa Bokonzi na Nzambe kati na nguya, to tosengeli kozela moto mosusu, lokola mokitani, ete akokisa bisakweli nyonso bitali nkembo na Masiya?’

Na esika ete ayanola epai na bayekoli na Yoane: ‘Ee ya solo, ngai nazali ye oyo asengeli koya!’ Yesu amonisi bango bobele na ntango yango ete ezali boye solo, mpo ete asali bikamwiseli, kobikisáká bato ebele na maladi ndenge nyonso. Na nsima atindi bayekoli yango ete: “Bokenda koloba na Yoane makambo masili bino komona mpe koyoka; bato bakufelaki miso bazali kotala lisusu, batengumi bazali kotambola, bato na maba bazali kopetwa, bato bakufelaki matoi bazali koyoka, bakufi bazali kosekwa, mpe nsango malamu esakolami na babola.”

Na maloba mosusu, motuna na Yoane ekoki kotinda na kokanisa ete atyaki elikya ya komona Yesu asala makambo mosusu koleka oyo, na ndakisa, abimisa ye na boloko. Nzokande, Yesu alobi na Yoane ete amizela te na komona eloko mosusu koleka bikamwiseli oyo azali kosala.

Ntango bayekoli na Yoane bakei, Yesu abaluki epai na bibele mpe alobi na bango ete, Yoane azali “momemi na nsango” to ntoma ya Jéhovah oyo asakolamaki kati na Malaki 3:1, mpe azali lisusu mosakoli Elie oyo asakolamaki na Malaki 4:5, 6. Azali bongo kokumisa Yoane, kokokisáká ye na basakoli oyo bazalaki na bomoi liboso na ye, lokola maloba malandi mamonisi yango: “Nazali koloba na bino solo ete, moto moko te abimi kati na baoyo babotami na basi, oyo aleki Yoane Mobatisi. Nde ye oyo aleki moke kati na Bokonzi na Likoló, aleki ye na monene. Longwa na mikolo na Yoane Mobatisi kino lelo, Bokonzi na likoló ezali eloko oyo bato bazali kotya molende ete bazwa yango.”

Yesu amonisi awa ete Yoane akozala kati na Bokonzi na likoló te, mpamba te ye oyo azali moke kati na Bokonzi yango aleki ye na monene. Yoane abongisaki nzela na Yesu, kasi akokufa liboso ete Klisto asala kondimana elongo na bayekoli na ye, mpo ete bayangela na Bokonzi na ye. Ezali ntina mpo na yango Yesu amonisi polele ete Yoane akozala kati na Bokonzi na Nzambe te. Akozala bongo mofandi na mabelé oyo ekoyangelama na Bokonzi na Nzambe. Luka 7:18-30; Matai 11:2-15.

▪ Mpo na nini Yoane atuni soki Yesu azali Ye oyo asengeli koya to soki basengeli kozela moto mosusu?

▪ Engebene Yesu, bisakweli nini Yoane akokisi yango?

▪ Mpo na nini Yoane Mobatisi akozala na likoló te esika moko na Yesu?