Lisolo 18: Yakobo akei na Harane
OYEBI bato oyo Yakobo azali kosolola na bango? Ezali babateli ya mpate. Nsima ya mobembo ya mikolo mingi, Yakobo akutani na bango pene na libulu ya mai, ná bampate na bango. Yakobo atuni bango ete: ‘Bino bouti wapi?’
Bazongisi ete: ‘Na Harane.’
Yakobo abakisi: ‘Boyebi Labana?’
Bandimi: ‘Ɛɛ! Kutu talá Rashele, mwana na ye, ye wana azali koya na bampate ya tata na ye.’ Omoni Rashele na elilingi oyo?
Ntango Yakobo amoni Rashele azali koya na bampate ya nɔkɔ na ye Labana, akei kolongola libanga na monɔkɔ ya libulu mpo bampate bámɛla mai. Na nsima, Yakobo ayambi Rashele mpe amiyebisi epai na ye. Rashele asepeli mpe akei mbangu koyebisa tata na ye Labana.
Labana ayambi Yakobo na ndako na ye na esengo. Ntango Yakobo asɛngi ete abala Rashele, Labana asepeli. Kasi asɛngi Yakobo asalela ye naino mosala mbula nsambo mpo abala Rashele. Yakobo andimi, mpo alingaki Rashele mingi. Kasi boyebi eloko nini esalemaki na mokolo ya libala?
Labana apesaki Yakobo nde Lea, mwana na ye ya liboso, na esika ya Rashele. Lokola Yakobo andimaki kosalela lisusu Labana mbula nsambo, apesaki ye mpe Rashele. Na ntango wana, Nzambe atikaki mibali bábalaka basi mingi. Kasi lelo oyo, Biblia elobi polele ete mobali asengeli kozala kaka na mwasi moko.
Mituna
- Elenge mwasi oyo ozali komona na elilingi oyo nkombo na ye nani, mpe Yakobo asalaki nini mpo na ye?
- Yakobo andimaki kosala nini mpo abala Rashele?
- Labana asalaki nini na mokolo ya libala ya Yakobo ná Rashele?
- Yakobo andimaki kosala lisusu nini mpo abala kaka Rashele?
Mituna mosusu
- Tángá Ebandeli 29:1-30.
Ata ntango Labana akosi Yakobo, ndenge nini Yakobo amonisaki ete azali moto oyo ayebi kobatela lokumu na ye, mpe liteya nini tokoki kozwa na likambo yango? (Eba. 25:27; 29:26-28; Mat. 5:37)
Ndenge nini ndakisa ya Yakobo emonisi bokeseni oyo ezali kati na bolingo mpe bilingalinga? (Eba. 29:18, 19, 30; Loy. 8:6)
Tángá nkombo ya basi minei oyo bafandaki na Yakobo mpe abotaki na bango bana. (Eba. 29:23, 24, 28, 29)
