MAKAMA lokola koningana ya mabele, tsunami, mpe mɔtɔ ya volcan enyokolaka bato mingi na Indonésie. Soki likama ya ndenge wana esalemi, basaleli ya Yehova basalaka nokinoki mpo na kosunga baoyo bazwi likama, mingimingi bandeko na bango ya elimo. Na ndakisa, na 2005, koningana ya mabele makasi esalemaki na Gunungsitoli, engumba oyo eleki monene na esanga Nias, na Sumatra du Nord. Mbala moko, masangá ya Sumatra, esanga oyo ezali pembeni wana, mpe biro ya filiale etindaki biloko na masuwa na engumba yango. Mokɛngɛli ya zongazonga mpe momonisi ya filiale bazwaki mpɛpɔ mpe bakendaki kuna mpo na kolendisa bandeko. Yuniman Harefa, nkulutu moko ya esanga Nias alobi boye: “Bato nyonso bazalaki kobanga makasi. Kasi, ndenge ebongiseli ya Nzambe etindaki lisungi nokinoki, endimisaki biso ete tozalaki biso moko te.”