1. Petro amiyokaki ndenge nini nsima ya kokanga mbisi na likamwisi?

 PETRO alekisaki butu mobimba na koluka mbisi, kasi akangaki ata moko te. Likambo ya kokamwa, Yesu alobaki na ye: “Pusá masuwa na esika ya mozindo, mpe bókitisa minyama na bino mpo na kokanga bambisi.” (Luka 5:4) Petro andimaki te ete akokanga ata mbisi moko, kasi asalaki kaka ndenge Yesu ayebisaki ye. Minyama ekómaki kopasuka na kilo ya ebele ya mbisi oyo bakangaki. Ntango Petro ná bato oyo bazalaki elongo na ye bamonaki ete likambo yango ezalaki nde likamwisi, “bayokaki nsɔmɔ mpenza.” Petro alobaki: “Longwá pene na ngai, Nkolo, mpo nazali moto ya masumu.” (Luka 5:​6-9) Emonani ete Petro amonaki ete abongi te kotɛlɛma ata liboso ya Yesu.

2. Mpo na nini kotalela ndakisa ya Petro ekosalisa biso?

² Petro akosaki te; azalaki “moto ya masumu.” Biblia emonisi ete na bantango mosusu alobaki mpe asalaki makambo oyo na nsima epesaki ye mawa. Yo mpe omiyokaka lokola Petro? Ozali na bolɛmbu moko na bomoto na yo to mposa moko ya mabe oyo eumeli? Soki bongo, koyekola ndakisa ya Petro ekoki kopesa yo elikya. Na ndenge nini? Kanisá naino: Yehova akokaki komona malamu ete mabunga ya Petro ekomama na Biblia te. Kasi ekomamaki na litambwisi ya elimo ya Nzambe mpo tózwela yango mateya. (2 Tim. 3:​16, 17) Koyekola bomoi ya Petro, moto oyo azalaki na bolɛmbu mpe mayoki lokola biso, ekoki kosalisa biso tómona ete Yehova asɛngaka biso te  ete tózala bato ya kokoka lelo oyo. Alingi nde tólɛmba te kobundisa bolɛmbu na biso.

3. Mpo na nini tosengeli kolɛmba te kobundisa bolɛmbu na biso?

³ Mpo na nini ezali na ntina tólɛmba te? Lisese moko elobaka ete: Mokemoke ndɛkɛ atongaka zalá na ye. Tópesa ndakisa: Alangá-nzembo akoki kolekisa bambula ebele mpo na koyekola ebɛtɛlo moko ya miziki. Na bambula yango, akoki kobɛta banoti mingi ya mabe, kasi soki akobi komekameka, akoyeba kobɛta. Nzokande, ata soki akómi alangá-nzembo oyo ayebi miziki malamu, na bantango mosusu akoki kaka kosala libunga. Kasi, akotika te. Akokoba kobɛta mpo na kobongisa mosala na ye. Ndenge moko mpe, ata ntango tomoni ete tolongi bolɛmbu moko oyo tozalaki na yango, ekoki kokóma ete tókwea na yango lisusu. Kasi, tokokoba kaka kobunda mpe kobongisa. Biso nyonso tolobaka to tosalaka makambo oyo epesaka biso mawa na nsima; kasi, soki toboyi kolɛmbisa mabɔkɔ, Yehova akosalisa biso tókoba kobongisa mpe kokende liboso. (1 Pe. 5:10) Tótalela ndakisa ya Petro na oyo etali kolɛmba te kobundisa bolɛmbu na biso. Motema mawa oyo Yesu amoniselaki ye atako mabunga na ye ekoki kolendisa biso tókoba kosalela Yehova.

4. Ndenge Luka 5:​5-10 emonisi yango, Petro alobaki nini mpo na ye moko, kasi Yesu ayebisaki ye nini?

⁴ Biblia elobi te ntina oyo Petro amibengaki “moto ya masumu,” to masumu nini azalaki kokanisa. (Tángá Luka 5:​5-10.) Kasi, mbala mosusu asalaki mwa mabunga ya minene. Yesu amonaki ete Petro azalaki kobanga, mbala mosusu mpo akanisaki ete abongi te. Yesu ayebaki mpe ete Petro akokaki kotikala sembo. Na yango, na boboto nyonso, Yesu ayebisaki Petro ete: “Tiká kobanga.” Ndenge Yesu atyelaki ye motema ebongolaki bomoi ya Petro. Na nsima Petro ná ndeko na ye Andre batikaki mosala na bango ya koluka mbisi mpe bakómaki bayekoli ya Masiya bomoi na bango mobimba; ekateli yango ememelaki bango mapamboli mingi.—Mrk. 1:​16-18.

5. Mapamboli nini Petro azwaki lokola alongaki kobanga mpe andimaki kolanda Yesu?

⁵ Petro amonaki makambo mingi ya kokamwa lokola azalaki moyekoli ya Kristo. Amonaki Yesu azali kobikisa bato ya maladi, kobimisa bademo, ata mpe kosekwisa bakufi. b (Mat. 8:​14-17; Mrk. 5:​37, 41, 42) Na kati ya emonaneli moko, Petro amonaki mpe Yesu na nkembo na ye na Bokonzi ya Nzambe, mpe abosanaki likambo yango te. (Mrk. 9:​1-8;  2 Pe. 1:​16-18) Ya solo, Petro amonaki makambo wana mpo andimaki kokóma moyekoli ya Yesu. Na ntembe te, azalaki na esengo ndenge atikaki te ete mayoki ya mabe oyo azalaki na yango mpo na ye moko ezangisa ye mapamboli wana!

6. Petro alongaki mbala moko bolɛmbu na ye? Limbolá.

⁶ Atako makambo nyonso oyo amonaki mpe ayokaki, Petro azalaki kaka na bolɛmbu. Tótalela mwa bandakisa. Ntango Yesu amonisaki ndenge akomona mpasi mpe akokufa mpo na kokokisa bisakweli ya Biblia, Petro apamelaki ye. (Mrk. 8:​31-33) Mbala na mbala, Petro ná bantoma mosusu bawelanaki mpo na koyeba nani aleki baninga. (Mrk. 9:​33, 34) Na butu ya nsuka liboso Yesu akufa, Petro asalelaki mopanga mpe akataki moto litoi. (Yoa. 18:10) Kaka na butu yango, Petro abangaki bato mpe awanganaki moninga na ye Yesu mbala misato. (Mrk. 14:​66-72) Petro alelaki na mawa mingi mpo na likambo yango.—Mat. 26:75.

7. Libaku nini Petro azwaki nsima ya lisekwa ya Yesu?

⁷ Yesu asundolaki te ntoma yango oyo alɛmbaki nzoto. Ntango Yesu asekwaki, apesaki Petro libaku ya komonisa soki alingaka ye kaka. Yesu asɛngaki Petro asalela ye na komikitisa nyonso lokola mobateli ya bampate na ye. (Yoa. 21:​15-17) Petro asalaki makambo oyo Yesu alobaki. Azalaki na Yerusaleme na mokolo ya Pantekote mpe azalaki na kati ya bato ya liboso oyo batyamaki mafuta na elimo.

8. Libunga nini ya monene Petro asalaki na Antiokia?

⁸ Ata ntango akómaki mokristo oyo atyami mafuta na elimo, Petro azalaki kaka na bolɛmbu. Na mobu 36 T.B., Petro azalaki wana ntango Korneyi, oyo azalaki moto ya bikólo mpe akatamá ngenga te atyamaki mafuta na elimo, likambo oyo emonisaki ete “Nzambe aponaka bilongi te” mpe ete bato ya bikólo bakokaki sikoyo kokɔta na lisangá ya bokristo. (Mis. 10:​34, 44, 45) Banda wana, Petro amonaki ete akokaki kolya elongo na bato ya bikólo, likambo oyo azalaki kosala te liboso. (Gal. 2:12) Kasi, Bayuda mosusu oyo bakómaki mpe bakristo bamonaki ete Bayuda ná bato ya bikólo basengeli kolya elongo te. Ntango baoyo bazalaki kokanisa bongo bayaki na Antiokia, Petro akataki kolya elongo na bandeko oyo bazalaki bato ya bikólo, mbala mosusu mpo abangaki kosilikisa Bayuda oyo bakómaki bakristo. Ntoma Paulo amonaki bokosi yango mpe apamelaki Petro na miso ya bato. (Gal. 2:​13, 14) Atako akweaki lisusu na bolɛmbu, Petro alɛmbaki te. Nini esalisaki ye?

9. Ndenge nini Yoane 6:​68, 69 emonisi bosembo ya Petro?

⁹ Petro azalaki sembo; atikaki eloko moko te elɛmbisa ye libela. Amonisaki bosembo na ye na libaku moko, ntango Yesu alobaki likambo moko oyo bayekoli na ye bakangaki ntina te. (Tángá Yoane 6:​68, 69.) Na esika bázela to báluka ndimbola ya maloba na ye, mingi batikaki kolanda Yesu. Kasi Petro asalaki bongo te. Ayebaki ete kaka Yesu nde azalaki “na maloba ya bomoi ya seko.”

10. Ndenge nini Yesu amonisaki ete atyelaki Petro motema? (Talá mpe elilingi.)

¹⁰ Yesu asundolaki Petro te. Na butu ya nsuka ya bomoi ya Yesu awa na mabele, Yesu ayebaki ete Petro ná bantoma mosusu bakosundola ye. Kasi, Yesu alobaki ete ayebi ete Petro akozonga mpe akotikala sembo. (Luka 22:​31, 32) Yesu ayebaki malamu ete “elimo ezali na molende, kasi nzoto ezali na bolɛmbu.” (Mrk. 14:38) Na yango, ata ntango Petro awanganaki ye, Yesu aboyaki ntoma yango te. Ntango asekwaki, abimelaki Petro, emonani  ete ezalaki na ntango oyo Petro azalaki ye moko. (Mrk. 16:7; Luka 24:34; 1 Ko. 15:5) Na ntembe te, yango elendisaki mpenza ntoma yango oyo alɛmbaki nzoto!

11. Ndenge nini Yesu amonisaki Petro ete Yehova akosalisa ye?

¹¹ Yesu ayebisaki Petro ete Yehova akosalisa ye. Nsima ya kosekwa, Yesu asalelaki Petro ná baninga na ye bantoma likamwisi mosusu ya kokanga mbisi. (Yoa. 21:​4-6) Na ntembe te, likamwisi yango endimisaki Petro ete Yehova akoki kokokisa bamposa na ye ya mosuni kozanga mokakatano. Na libaku yango, mbala mosusu Petro akanisaki lisusu ndenge Yesu alobaki ete Yehova akokokisa bamposa ya baoyo bakobaka “koluka liboso Bokonzi.” (Mat. 6:33) Lokola akanisaki likambo yango, Petro atyaki mosala ya kosakola na esika ya liboso, kasi te mosala na ye ya koluka mbisi. Apesaki litatoli na mpiko mpenza mokolo ya Pantekote ya mobu 33 T.B., mpe asalisaki bankóto ya bato bándima nsango malamu. (Mis. 2:​14, 37-41) Na nsima, asalisaki Basamaria mpe bato ya bikólo bándima Kristo. (Mis. 8:​14-17; 10:​44-48) Ntembe ezali te ete Yehova asalelaki Petro mingi mpenza mpo na komema bato ya ndenge nyonso na lisangá.

12. Na kotalela ndakisa ya Petro, nini tosengeli kobosana te ntango tozali na bolɛmbu moko oyo eumeli?

¹² Yehova akoki kosalisa biso tólɛmba te kobundisa bolɛmbu na biso. Ekoki kozala mpasi kokende liboso, mingimingi soki bolɛmbu na biso ezali kosila te. Ntango mosusu tokoki komona lokola ete bolɛmbu na biso eleki oyo Petro azalaki na yango. Kasi, Yehova akoki kopesa biso makasi mpo tólɛmbisa mabɔkɔ te. (Nz. 94:​17-19) Tózwa ndakisa ya ndeko mobali moko oyo, liboso ayeba solo, azalaki kosangisa nzoto mibali na mibali bambula ebele. Asalaki makasi mpe atikaki mimeseno yango ya mbindo. Kasi, na bantango mosusu bamposa ya mabe eyelaki ye. Nini esalisaki ye alɛmbisa mabɔkɔ te? Alobi boye: “Yehova apesaka biso makasi.” Abakisi boye: “Na lisalisi ya elimo ya Yehova . . . , nayekoli ete tokoki kolonga [kokoba] kotambola na nzela ya solo . . . Yehova azali kosalela ngai, mpe atako mabunga na ngai, akobaka kopesa ngai makasi.”

13. Ndenge emonisami na Misala 4:​13, 29, 31, ndenge nini tokoki komekola ndakisa ya Petro? (Talá mpe elilingi.)

¹³ Ndenge tomoni yango, Petro akweaki na motambo ya kobanga bato mpe asalaki mabunga. Kasi, lokola asɛngaki Nzambe apesa ye  mpiko, alongaki kosala makambo na mpiko. (Tángá Misala 4:​13, 29, 31.) Biso mpe tokoki kotika kobanga. Tótalela likambo oyo ekómelaki Horst, elenge mobali moko oyo azalaki kofanda na Allemagne na ntango ya Banazi. Na mabaku mosusu, akweaki na mbamba oyo batyaki ye na eteyelo mpe alobaki “Heil Hitler!” Na esika baboti na ye bápamela ye, babondelaki elongo na ye, basɛngaki Yehova apesa ye mpiko. Na lisalisi ya baboti na ye, mpe lokola atyelaki Yehova motema, nsukansuka Horst azwaki mpiko ya kotɛlɛma ngwi. Na nsima alobaki boye: “Yehova asundolaki ngai ata mokolo moko te.” c

14. Ndenge nini babateli ya mpate ya bolingo bakoki kosalisa baoyo bazali koyoka ete balɛmbi nzoto?

¹⁴ Yehova ná Yesu bakosundola biso te. Petro asengelaki kozwa ekateli moko monene nsima ya kowangana Kristo. Akolɛmbisa mabɔkɔ libela, to akokoba kozala moyekoli ya Kristo? Yesu abondelaki Yehova ete kondima ya Petro elɛmba te. Yesu ayebisaki Petro libondeli yango mpe ayebisaki ye ete atye motema ete na nsima Petro akolendisa bandeko na ye. (Luka 22:​31, 32) Na ntembe te, Petro azalaki kozwa mpiko ntango azalaki kokanisa maloba yango ya Yesu! Ntango tosengeli kozwa ekateli moko ya monene na bomoi na biso, Yehova akoki kosalela babateli ya mpate ya bolingo mpo báyebisa biso makambo oyo ekosalisa biso tótikala sembo. (Ef. 4:​8, 11) Ndeko Paul, oyo azali nkulutu banda bambula mingi, asalaka makasi alendisa bandeko ndenge wana. Asɛngaka baoyo bazali kolɛmba bákanisa ndenge oyo Yehova abendaki bango na solo. Na nsima, ayebisaka bango ete lokola Yehova azali na bolingo ya sembo, akosundola bango te. Alobi boye: “Namoni ndenge Yehova asalisi bandeko mingi oyo balɛmbaki nzoto bákoba kosalela ye.”

15. Ndenge nini ndakisa ya Petro mpe ya Horst emonisi bosolo ya Matai 6:33?

 ¹⁵ Ndenge kaka Yehova akokisaki bamposa ya mosuni ya Petro mpe ya bantoma mosusu, akosala mpe bongo mpo na biso ntango totye mosala ya kosakola na esika ya liboso na bomoi na biso. (Mat. 6:33) Nsima ya Etumba ya Mibale ya mokili mobimba, Horst, oyo tolobelaki liboso, azalaki kokanisa kokóma mobongisi-nzela. Kasi, azalaki mobola mpenza, azalaki kondima te ete akobanda kozwa eloko ya kobikela mpe akokoba na mosala ya mobongisi-nzela. Asalaki nini? Amonaki malamu ameka Yehova; alekisaki pɔsɔ mobimba na mosala ya kosakola ntango mokɛngɛli ya zongazonga ayaki kotala lisangá na bango. Na nsuka ya pɔsɔ yango, akamwaki makasi ntango mokɛngɛli ya zongazonga apesaki ye anvelɔpɛ oyo ezalaki na mbongo, kasi alobaki te soki euti wapi. Ezalaki na mbongo oyo ekokaki mpo na kosunga ye na mosala ya mobongisi-nzela basanza ebele. Horst amonaki ete na nzela ya likabo wana, Yehova azalaki kondimisa ye ete akokokisa bamposa na ye. Atyaki matomba ya Bokonzi na esika ya liboso na bomoi na ye mobimba.—Mal. 3:10.

16. Mpo na nini ezali malamu tóyekola ndakisa ya Petro mpe mikanda na ye?

¹⁶ Na ntembe te, Petro azalaki na esengo mingi ndenge Yesu alongwaki pene na ye te, ndenge ye moko asɛngaki! Kristo akobaki koteya Petro mpo azala ntoma ya sembo mpe akóma ndakisa malamu mpo na bakristo. Mateya oyo Petro ayekolaki epai ya Yesu ekoki kosalisa biso nyonso. Petro alobelaki mwa mateya yango mpe mateya mosusu na mikanda mibale oyo akomaki na litambwisi ya elimo ya Nzambe, oyo atindaki na masangá na siɛklɛ ya liboso. Lisolo oyo elandi ekolobela makambo mosusu oyo ezali na mikanda yango mpe ndenge oyo tokoki kosalela yango lelo oyo.