Mokanda euti na moto oyo tolingaka

Mwasi moko ya New York, oyo atángaki buku Tópusana penepene na Yehova (na Lifalanse) akokanisaki yango na mokanda euti na moto oyo tolingaka; alobaki boye: “Mokapo mokomoko ezali mpenza kosimba motema mpe kokolisa bolingo na biso mpo na Yehova.” Abakisaki: “Sikoyo, lokola nasilisi kotánga buku yango, nakoumela te kozongela kotánga yango lisusu mobimba, ndenge tosalaka ntango tozwi mokanda euti na moto oyo tolingaka mingi.” Tóyoka makambo oyo bato mosusu balobaki mpo na buku yango.

Mwasi moko ya Kansas (États-Unis) oyo atángaki buku yango alobaki boye: “Nakómi mpenza komiyoka ete napusani penepene ya Tata na ngai ya likoló. Motema na ngai etondi mpenza na bolingo mpo na ye . . . Ntɔngɔ nyonso, nazalaka na esengo ya kotánga mwa eteni molai ya buku yango mpe nakotánga yango lisusu mobimba mbala na mbala.”

Mwasi moko ya Maine (États-Unis) akomaki boye: “Buku yango esalisi ngai námona lisusu malamumalamu ete Yehova azali moto solo! Maloba oyo ezali na lokasa 74 ezali mpenza kokitisa motema; elobi: ‘Esika nini mosusu bato oyo bakufi bakoki kobatelama malamu koleka, soki na makanisi ya Nzambe te?’” Mwasi moko ya Alaska, oyo mpe andimaki likanisi yango, akomaki boye: “Esimbaki mpenza motema na ngai tii mai ya miso ebimaki ngai.” Abakisaki: “Nakotánga yango lisusu mpe nakozongela yango mbala na mbala.”

Tokanisi ete yo mpe okosepela ndenge wana soki otángi buku yango. Soki osilisi mikapo misato ya ebandeli, buku yango ekabolami na biteni minei oyo ezali na mitó ya makambo “Atondi na nguya,” “Alingi bosembo,” “Azali na motema ya bwanya,” mpe “Nzambe azali bolingo.” Mokapo ya nsuka elobi “Bópusana penepene na Nzambe, mpe ye akopusana penepene na bino.”

Okoki kosɛnga buku yango ya nkasa 320 soki otondisi eteni ya lokasa oyo ezali awa na nse mpe otindi yango na adresi moko kati na oyo ezali na lokasa 5 ya zulunalo oyo.

□ Nalingi kozwa buku Tópusana penepene na Yehova.

□ Bóya kotala ngai mpo na koyekola na ngai Biblia kozanga kofuta mbongo.