Elenge moko oyo atungisamaki azwi lisalisi

SIBIA azali elenge mwasi ya mbula 13 mpe afandaka na ekólo Mexique. Amonaki ete mwana moko ya mwasi ya kelasi na bango azalaki koya na eteyelo mbala mingi na mai na miso. Sibia azalaki kosala makasi abɔndisa ye. Mokolo moko, mwana yango ayebisaki Sibia ete tata na ye azali moombo ya masanga mpe abɛtaka mama na ye mingi.

Sibia alobi boye: “Mwana yango ayebisaki ngai ete azali lisusu na mposa ya bomoi te; kutu alukaká komiboma. Alobaki ete moto moko te alingaka ye mpe bakipaka ye te. Nayebisaki ye ete ezali na moto moko oyo alingaka ye mingi, moto yango aleki bato nyonso ezala na likoló to awa na nse mpe nalimbwelaki ye mokano ya Yehova mpo na biso bato.”

Na nsima, Sibia apesaki ye buku Mituna oyo bilenge batunaka​—Biyano bibongi mpe bakómaki koyekola yango elongo mikolo nyonso na ntango ya bopemi. Mokemoke, mwana mwasi yango abongolaki ezaleli na ye ya koboya kosololisa bato mpe akómaki kosolola mpe kosɛka na bato. Na mokanda oyo akomelaki Sibia, alobaki ete: “Natɔndi yo mpo ozali mpenza moninga na ngai mpe omityaka na esika na ngai. Banda kala, nazalaki na mposa ya kozala na ndeko mwasi lokola yo. Sikoyo nayebi ete ezali na moto moko oyo atyelaka ngai likebi: Yehova.”

Ntango mosusu oyebi elenge moko oyo buku Mituna oyo bilenge batunaka ekoki kosalisa ye. Buku yango ezali na mikapo 39, na ndakisa “Ndenge nini nakoki kozwa baninga ya solo?,” “Okanisi boni mpo na kosangisa nzoto liboso ya kobala?,” mpe “Lolenge nini nakoki koyeba soki ezali solo bolingo?” Okoki kosɛnga buku yango soki otondisi eteni ya lokasa oyo ezali awa na nse mpe otindi yango na adrɛsi oyo etyami awa to oyo ebongi na yo na lokasa 5 ya zulunalo oyo.

□ Nalingi kozwa buku oyo bolakisi awa.

□ Bóya kotala ngai mpo na koyekola na ngai Biblia kozanga kofuta mbongo.