“Moto nyonso oyo azali kokoba kotala mwasi tii ayoki ye mposa asali na ye ekobo na motema.”​—Matai 5:28.

MPO NA NINI EZALI NA NTINA?

Lelo oyo pornografi epalangani mingi mpe kotala yango ezali lisusu mpasi te ndenge ezalaki liboso. Soki olingi kosepelisa Nzambe mpe kozala na bomoi ya esengo, osengeli koyeba ndenge oyo Nzambe atalelaka pornografi.

OYO BIBLIA ELOBI

Biblia elobeli pornografi na ndenge ya polele te. Ata bongo, kotala pornografi eyokani te na makambo mingi oyo Biblia elobi.

Na ndakisa, Biblia elobi polele ete soki mobali oyo abalá azali “kokoba kotala mwasi” mosusu mpe ayoki mposa ya kosangisa na ye nzoto; ekoki komema ye na ekobo. Toli ya vɛrsɛ yango etaleli mpe moto nyonso oyo “azali kokoba kotala” bililingi ya pornografi oyo ekoki kopesa ye mposa ya kosala pite to ekobo; azala monzemba to abalá. Ezaleli ya ndenge wana ezali mabe na miso ya Nzambe.

“Na yango, bóboma binama ya nzoto na bino . . . na likambo ya pite, mbindo, mposa ya kosangisa nzoto, mposa oyo eyokisaka mpasi, mpe bilulela.”​—Bakolose 3:5.

OYO BATO BALOBAKA

Bato mosusu ya mayele bandimaka te ete pornografi esalaka ete moto akóma na bizaleli mabe ya kosangisa nzoto. Ata soki ezali bongo, kotala pornografi ezali mpenza malamu?

OYO BIBLIA ELOBI

Biblia emonisi ete “masɛki ya nsɔni” ezali mabe. (Baefese 5:3, 4) Ndenge nini tokoki koloba ete pornografi ezali malamu? Mikolo oyo, pornografi ekómi na bakasɛti-video oyo ezali komonisa mpenza ndenge bato bazali kosala ekobo, kosangisa nzoto mibali na mibali to basi na basi mpe lolenge mosusu ya pite. Na yango, kosepela kotala makambo mabe ya kosangisa nzoto ndenge wana epesaka mpenza Nzambe nkanda koleka koloba maloba ya bosoto.

Bato ya mayele bazali kokoba kopesana makanisi mpo na koluka koyeba nini mpenza etindaka bato basala makambo oyo batalaka na pornografi. Kasi, Biblia emonisi polele ete kotala pornografi epesaka Nzambe nkanda mpe ebebisaka boyokani ya moto ná Nzambe. Biblia epesi toli oyo: “Na yango, bóboma binama ya nzoto na bino . . . na likambo ya pite [mpe] mposa ya kosangisa nzoto.” (Bakolose 3:5) Bato oyo batalaka pornografi basalaka bongo te; na esika baboma bamposa ya ndenge wana, bakómisaka yango nde makasi.

“Bóluka oyo ezali malamu, kasi oyo ezali mabe te . . . Bóyina oyo ezali mabe, mpe bólinga oyo ezali malamu.”​—Amose 5:14, 15.

OYO BIBLIA ELOBI

Biblia elobeli bato oyo kala, bamipesaki na pite, na kolangwa masanga, na koyiba kasi na nsima batikaki bizaleli wana ya mabe. (1 Bakorinti 6:9-11) Ndenge nini? Basalelaki batoli ya bwanya oyo ezali na Liloba ya Nzambe, mpe bayekolaki koyina oyo ezali mabe.

Kokanisa malamumalamu makama minene oyo pornografi ebimisaka ekoki kosalisa yo oyina yango mpenza. Iniversite ya Utah na États-Unis elobeli ankɛtɛ moko oyo euti kosalema kala mingi te mpe emonisi ete baoyo batalaka pornografi “banyokwamaka na makanisi, balingaka kofanda bango moko, babebisaka boyokani na bango ná basusu,” mpe bakutanaka na makambo mosusu ya mabe. Lisusu, kaka ndenge tolobeli yango na ebandeli, kotala pornografi epesaka Nzambe nkanda mpe esalaka lisusu likambo moko ya mabe koleka. Epekisaka moto akóma moninga ya Nzambe.

Biblia ekoki kosalisa biso tóyekola kolinga oyo ezali malamu. Soki tozali kotánga Biblia mingi, tokokóma kolinga mingi bizaleli malamu oyo yango elobelaka. Bolingo yango ekosalisa biso tóboya mpenza pornografi mpe tókóma na makanisi ndenge moko na mokomi ya Nzembo oyo akomaki boye: “Nakotya eloko moko te ya mpambampamba liboso ya miso na ngai.”​—Nzembo 101:3.