BIBLIA ELOBI NINI?
Masiya
Biblia esakolaki ete Masiya akoya na mokili mpe akosikola bato na maladi, bampasi mpe liwa. Masiya yango ezali nde Yesu Kristo?
Ndenge nini bato balingaki koyeba Masiya?
Na kotalela bisakweli ya Biblia, Masiya to Kristo, asengelaki koya mpo na kokokisa mikumba mibale, oyo esɛngaki ntango molai mpo akokisa oyo ya mibale. * Mpo na kokokisa mokumba na ye ya liboso, asengelaki kokóma moto. Mpo bato báyeba ye, bakomi ya Biblia basakolaki makambo mingi oyo etali bomoi mpe mosala na ye. Kutu, bisakweli ya Biblia epesamaki libosoliboso nde mpo na “kotatola mpo na Yesu.”—Emoniseli 19:10.
Ntango azalaki moto, Yesu asalaki kaka mwa makamwisi mpo na komonisa oyo akosala na mokili mobimba lokola ekelamu ya elimo ya nguya
OYO BIBLIA ELOBI
Masiya asengelaki . . .
-
Kozala mokitani ya mokonzi Davidi.—Yisaya 9:7; Luka 3:23-31. *
-
Kozala moto oyo akobotama na engumba Beteleme.—Mika 5:2; Luka 2:4-7.
-
Kozala mosakoli ya komikitisa ya “nsango malamu.”—Yisaya 61:1; Luka 4:43.
-
Kotyolama mpe komonana mpamba.—Yisaya 53:3; Matai 26:67, 68.
-
Kotɛkama na shekele ya palata 30.—Zekaria 11:12, 13; Matai 26:14, 15.
-
Kofanda nyɛɛ liboso ya bafundi na ye atako bakokatela ye etumbu ya liwa kozanga kosala likambo ya mabe.—Yisaya 53:6, 7; Matai 27:12-14.
-
Kozala “Mwana-Mpate,” oyo akokabama lokola mbeka mpo na kolongola masumu mpe kosalisa bato bámonana pɛto na miso ya Nzambe.—Yisaya 53:7; Yoane 1:29, 34, 36.
-
Kobomama kozanga ete ata mokuwa na ye moko ebukana.—Nzembo 34:20; Yoane 19:33, 36.
-
Kokundama esika moko na bato ya bozwi.—Yisaya 53:9; Matai 27:57-60.
-
Kosekwa nsima ya mikolo misato.—Matai 16:21; 28:5-7.
Yesu akokisaki bisakweli wana nyonso mpe bisakweli mingi mosusu. Abikisaki bato ya maladi mpe asekwisaki bakufi. Asukaki kaka te na komonisa ete azali mpenza Masiya, kasi asalisaki mpe biso tókóma na kondima makasi na bilaka ya Biblia ete akosala makambo yango na mokili mobimba na mikolo ezali koya. (Luka 7:21-23; Emoniseli 21:3, 4) Nsima ya lisekwa na ye, Yesu afandaki na “lobɔkɔ ya mobali,” ya Nzambe mpo na kozela ntango oyo akosilisa mokumba na ye ya Masiya.—Nzembo 110:1-6.
“Ntango Kristo akoya, akosala nde bilembo mingi koleka oyo moto oyo asali?”—Yoane 7:31.
Ndenge nini Masiya akosilisa mosala na ye?
Bayuda ya ntango ya Yesu bamizelaki ete Masiya alongola bango na nse ya bokonzi ya Baroma mpe ayangela na bokonzi ya Yisraele oyo esengelaki kozongisama. (Misala 1:6) Kaka na nsima nde Bayuda oyo bazalaki bayekoli ya Yesu bakangaki ntina ete asengelaki kosilisa mokumba na ye na likoló lokola ekelamu ya elimo ya nguya oyo bapesi ye bokonzi mingi.—Matai 28:18.
OYO BIBLIA ELOBI
Na mokumba na ye ya mibale, Masiya asengelaki . . .
-
Koyangela lokola Mokonzi ya Bokonzi ya Nzambe, guvɛrnema kaka moko mpo na mokili mobimba.—Danyele 7:13, 14; Emoniseli 11:15.
-
Kozala lipamboli mpo na bato nyonso oyo bazali komonisa kondima epai na ye.—Ebandeli 22:17, 18; Nzembo 72:7, 8.
-
‘Kosutukisa bikólo mingi’ mpe bakonzi na bango ntango akosukisa bango mpo bazali kotɛmɛla ye.—Yisaya 52:15; Emoniseli 19:19, 20.
-
Kobatela “ebele mpenza ya bato” ya sembo ya mokili mobimba na mokili ya sika ya kimya.—Emoniseli 7:9, 10, 13-17.
-
Kosekwisa bakufi elongo na Yehova Nzambe mpo bázala na bomoi na paradiso awa mabele.—Luka 23:43; Yoane 5:21, 28, 29.
-
Koteya bato oyo akoyangela ndenge ya kozala na kimya ya solosolo.—Yisaya 11:1, 2, 9, 10.
-
Kolongola lisumu, oyo ememelaka biso maladi mpe liwa.—Yoane 1:29; Baroma 5:12.
-
Kobebisa mpo na libela misala nyonso ya Satana mpe kosangisa libota ya bato na nse ya boyangeli ya Yehova Nzambe.—1 Bakorinti 15:25-28; 1 Yoane 3:8.
Yesu akokisaki mokumba na ye ya liboso lokola Masiya. Akokokisa mpe oyo ya mibale. Yango wana, moto ya bwanya, ayekolaka ye malamumalamu, mpo Yesu alobaki: “Ngai nazali nzela mpe solo mpe bomoi.”—Yoane 14:6.
“Na mikolo na ye, moyengebene akokola lokola matiti ya sika, mpe kimya ekokóma mingi kino sanza ekozala lisusu te. Mpe akozala na bato oyo ye akoyangela . . . kino na nsuka ya mabele.”—Nzembo 72:7, 8.
^ par. 5 Liloba “Masiya” euti na Ebre. “Kristo” euti na Grɛki, nyonso mibale ezali na ndimbola moko.—Yoane 1:41.
^ par. 7 Na bavɛrsɛ oyo batyé awa, ya liboso ezali bisakweli mpe ya mibale kokokisama ya bisakweli yango.