ELOBELI TITRE YA EZIPELI | OZALI NA BOKONZI LIKOLÓ YA BOMOI NA YO?
Mokakatano: Makambo oyo tokoki kobongola te
MALADI oyo esilaka te, koboma libala to liwa ya ndeko to moninga esilisi yo esengo ya bomoi? Ntango okutani na makambo oyo okoki kobongola te, okoki komiyoka lokola okokoka kosala lisusu ata likambo moko te kasi okoki kolinga ete likambo yango ebongwana. Ndenge nini okoki kozala lisusu na bokonzi likoló ya bomoi na yo?
NDAKISA YA BIBLIA: PAULO
Ntoma Paulo asalaki mibembo mingi na siɛklɛ ya liboso mpo azalaki misionɛrɛ ya molende mpenza. Kasi mibembo yango ekatanaki ntango bakangaki ye kozanga ete asala likambo ya mabe mpe na nsima batyaki ye na ndako moko oyo basoda bazalaki kokɛngɛla ye na boumeli ya mbula mibale. Na esika abungisa elikya, Paulo atyaki makanisi nde na makambo oyo akokaki kosala. Azalaki koyebisa baoyo nyonso bazalaki koya kotala ye makambo ya Nzambe mpe kobɔndisa bango. Akomaki kutu ebele ya mikanda oyo ezali lelo na Biblia.—Misala 28:30, 31.
OYO ANJA ASALAKA
Ndenge tolobaki yango na lisolo eleki, Anja akɔtá ndako. Alobi boye: “Kanser ebongolá makambo nyonso ya bomoi na ngai. Lokola nabangaka kozwa bamikrobe, yango wana nakendaka lisusu mosala te mpe nasalaka lisusu mpenza makambo elongo na basusu te.” Ndenge nini Anja asalaka mpo na kolonga makambo wana oyo akoki kobongola te? Alobi boye: “Kobongola programɛ na ngai esalisaki ngai mingi. Natyaki makambo oyo eleki ntina na esika ya liboso mpe nasalaki programɛ na kotalela makoki na ngai. Yango esalisi ngai nazala na mwa bokonzi likoló ya bomoi na ngai.”
“Nayekoli, na makambo ata ya ndenge nini, kosepela na oyo nazali na yango.”—Maloba ya Paulo oyo ezali na Bafilipi 4:11
OYO OKOKI KOSALA
Soki makambo oyo okoki kobongola te ezali kokonza bomoi na yo, meká kosala makambo oyo elandi:
-
Tyá miso na makambo oyo okokoka kosala. Na ndakisa, okoki kozala mpenza te na bokonzi likoló ya sante na yo kasi okoki kosala ngalasisi, kolya bilei oyo etongaka nzoto mpe kolalaka mingi.
-
Zwá ekateli mpo na makambo oyo okolinga kosala na bomoi. Luká makambo oyo okoki kosala mpo okokisa mokemoke mokano na yo. Mokolo na mokolo salaká mwa makambo oyo ekosala ete okokisa mokano yango.
-
Saláká misala ata ya mike, na ndakisa kopangwisa mesa to kosukola basaani mpo omona ete osali likambo moko mpe oyoka esengo. Latáká kitoko. Saláká makambo oyo eleki ntina na ntɔngɔ.
-
Talá matomba oyo mikakatano na yo ekoki komemela yo. Na ndakisa, likambo oyo ekómeli yo esalisi yo oyeba mpenza ndenge ya kolonga mikakatano? Okoki kosalela boyebi yango mpo na kosalisa basusu?
Na mokuse: Okoki te kozala na bokonzi likoló ya makambo oyo ekómeli yo, kasi okoki koyeba ndenge ya kosala na makambo yango.
Talá mpe...
BIYANO NA MITUNA YA BIBLIA
Biblia ekoki kosalisa ngai soki nazali na maladi oyo eumeli mingi?
Ɛɛ! Talá makambo misato oyo ekoki kosalisa yo soki ozali na maladi oyo eumeli mingi.
LINƆ́NGI YA MOSƐNZƐLI
Okosala nini soki mwana na yo azali ebɔsɔnɔ?
Talá mikakatano 3 oyo okoki kokutana na yango mpe ndenge oyo bwanya oyo ezali na Biblia ekoki kosalisa.
LINƆ́NGI YA MOSƐNZƐLI
Ntango molongani azali na maladi oyo ezali kosila te
Tángá makambo misato oyo ekoki kosalisa babalani ntango moko azali na maladi oyo ezali kosila te.
LINƆ́NGI YA MOSƐNZƐLI
Ndenge ya kokende liboso ata soki libala ekufi
Bato mingi oyo babomá mabala bamonaka ete bomoi na bango ekómaka lisusu mpasi koleka ndenge oyo bazalaki kokanisa. Batoli ya Biblia ekoki kosalisa yo olonga mpenza mikakatano yango.
LINƆ́NGI YA MOSƐNZƐLI—NIMERO YA BOYEKOLI
Ndenge ya kosala ntango mwasi to mobali na yo akufi
Mpasi oyo moto ayokaka ntango mobali to mwasi na ye akufi ezalaka mabe mpenza mpe eumelaka mingi. Talá ndenge oyo elikya ya lisekwa oyo ezali na Liloba ya Nzambe ebɔndisaka mpenza.
