Yango nde likambo oyo ekipi moko ya balukiluki ya mikili mingi endimisamaki na yango mpo na mbongwana ya klima. Soki ondimaka ete Mozalisi moko azali mpe atyelaka bato likebi, makambo yango oyo bato ya siansi balobi ekoki kokundwela yo biloko mingi oyo Nzambe asalá, na ndenge emipetɔlaka yango moko.

Kasi, lokola bato bazali kobebisa mabele mingi mpenza, yango wana mabele ekoki lisusu komibikisa yango moko te. Mpo na nini tosengeli kondima ete Nzambe akosala mwa eloko mpo na yango?

Talá ndenge bavɛrsɛ oyo ezali na etanda ezali kosalisa biso tózala na kondima ete mabele ekobebisama nyonso te.

• Nzambe nde akelaki mabele. “Na ebandeli Nzambe azalisaki likoló mpe mabele.”—Ebandeli 1:1

• Nzambe nde asalá mabele. “Mabele mpe biloko oyo etondisi yango ezali ya Yehova a.”—Nzembo 24:1.

• Nzambe asalaki mabele na biso mpo ezala seko. “Atyá mabele na miboko na yango; Ekolongwa na esika na yango te libela na libela.”—Nzembo 104:5.

• Nzambe alaki ete bomoi ekokoba kozala na mabele na biso mpo na libela. “Nzambe ya solo, Moto oyo asalaki mabele, Mokeli na yango, Moto oyo atɛlɛmisaki yango makasi, Moto oyo asalaki yango kaka mpamba te, kasi asalaki yango nde mpo bato báfanda.”—Yisaya 45:18.

• Nzambe alaki ete bato bakofanda na mabele mpo na libela. “Bato ya sembo bakozwa mabele, mpe bakofanda wana mpo na libela.”—Nzembo 37:29.

Nzambe azalisaki mabele mpo moto asepela na bomoi kozanga ete abebisa yango. Biblia esakolá ete na ntango oyo ebongi mpenza Yehova Nzambe akotya nsuka na bato nyonso oyo bazali kobebisa mabele mpo na lokoso na bango.—Emoniseli 11:18.

Biblia elaki ete mosika te Nzambe akokómisa mabele na biso esika moko ya malamu, paradiso moko ya kitoko mpe akofongola lobɔkɔ na ye mpo na “kokokisa mposa ya ekelamu nyonso oyo ezali na bomoi.”—Nzembo 145:16.